Read lubukusu 2 Ke Ch. 36 Bible Online

2 Ke Ch. 36 - lubukusu bible

2 Ke Ch. 36

¹Babaandu ba Yuda barobora Yoahasi okhwa Yosia, bamukhola aaba omwami mu Yerusalemu mu bweyaangu bwa raraawe.

²Yoahasi aaba ne bukhulu bwe kimiiko kamakhumi kabili na kitaru nga aarakikha khukhwamiia. Amiia khulwe kimieesi kitaru mu Yerusalemu.

³Nio omwami owa Misiri arusia Yoahasi mu bwami mu Yerusalemu. Ne omwami owa Misiri aruungia babaandu ba Yuda busuuru bubwola bitonyi emia ndala bie efwesa ne sitonyi sie esahabu.

⁴ Omwami owa Misiri akhola Eliakimu wandaaye owa Yoahasi aaba omwami owa Yuda ne Yerusalemu ne khukaluukhasia lisina liewe lia Eliakimu liaba Yehoyakimu mala abukula Yehoahasi wandaaye owa Yehoyakimu amuyila e Misiri.

⁵ Yehoyakimu aaba ne bukhulu bwe kimiiko kamakhumi kabili ne kiraano nga aarakikha khukhwamiia. Amiia khu miiko ekhumi ne mulala mu Yerusalemu. Akhola kaali kamamayaanu ebweeni wa Wele Omunyali Owa Bioosi, Wele wewe.

⁶ Omwami Nebukadinesa owa Babiloni ebwaakala Yuda mala aamba Yehoyakimu, amuboa kiminyololo mala amubukula amuyila e Babiloni.

⁷Nebukadinesa abukula bibiindu bilala khukhwama mu nju ya Wele Omunyali Owa Bioosi, abiyila e Babiloni mala abira mwichipi liewe.

⁸Nono bibiindu bibiindi nibio Yehoyakimu akhola, ne bibiindi bisinyisia nibio akhola nende buli siindu nisio akhola anyolelakho kumusaango, biaandikwa mu sitabu sie babaami ba Isiraeli ne Yuda. Omwana wewe Yehoyakini amiia mu bweyaangu bwewe.

⁹Yehoyakini aaba ne bukhulu bwe kimiiko munaane nga aarakikha khukhwamiia. Amiia kimieesi kitaru ne chindaalo ekhumi mu Yerusalemu. Akhola kaali kamamayaanu ebweeni wa Wele Omunyali Owa Bioosi.

¹⁰ Mu fula eye khurakikha kumwiiko omwami Nebukadinesa arumania baamba Yehoyakini mala areerwa e Babiloni alala ne bibiindu bie bukusi bwe angaaki bie mu Lukaangu lwa Wele Omunyali Owa Bioosi biayilwa e Babiloni. Nebukadinesa akhola Sedekia wandaaye owa Yehoyakini aaba omwami owa Yuda ne Yerusalemu.

¹¹ Sedekia aaba ne bukhulu bwe kimiiko kamakhumi kabili ne kumwiiko mulala nga ne aarakikha khukhwamiia. Ne amiia mu Yerusalemu khulwe kimiiko ekhumi na mulala.

¹²Sedekia aakhola kaali kamamayaanu ebweeni wa Wele Omunyali Owa Bioosi, Wele wewe. Se eboombia ebweeni wo omung'oosi Yeremia owamuboolela kamakhuwa ka Wele tawe.

¹³ Sedekia yesi akaluukhana khu mwami Nebukadinesa owa mukhola echuba mu lisina lia Wele. Sedekia aakhola sileka mala aloba khuria Wele Omunyali Owa Bioosi, Wele owa Isiraeli.

¹⁴Bakhaba basaayi bakhulu boosi ne babaandu ba Yuda baba bamayaanu lukali. Bakhola bibiindu bie khusinya bioosi nga chikholo chichiindi. Banyaalutia enju eya Wele Omunyali Owa Bioosi niyo akhola yaba endakatifu mu Yerusalemu.

¹⁵Wele Omunyali Owa Bioosi, Wele owe bakuuka babwe aaruma bang'oosi busia na busia, sikila akholela siisa babaandu bewe ne bumenyo bwewe.

¹⁶Ne kakhali bakhoma barumwa bewe, balekelesia kamakhuwa ka Wele Omunyali Owa Bioosi, mala bakholela bang'oosi embelekeu. Bakhola bario khukhwola nga Wele Omunyali Owa Bioosi ne aambila babaandu bewe lirima mala khubao engila eye khukhwilukha tawe.

¹⁷ Nono Wele areera omwami owa Babiloni khubebwaakala. Omwami oyo eera basoleeli ba baba mu Lukaangu. Se akholelakho basoleeli siisa namwe bakhaana be eyabwaana, basaakhulu namwe abo ba baaba balwale tawe. Wele aabalekha boosi mu bunyali bwa Nebukadinesa.

¹⁸Nebukadinesa asuuta bibiindu bioosi khukhwama mu Lukaangu, biboofu ne bitiiti ne bibiindu bioosi bie mumabiikhilo ka Wele Omunyali Owa Bioosi ne bibiindu bie mumabiikhilo ko mwami, nende bie babemeelesi bewe. Ayila bibiindu bino bioosi e Babiloni.

¹⁹ Nebukadinesa osia enju eya Wele Omunyali Owa Bioosi, mala atechula lisiisi lie lukoba lwa Yerusalemu. Lundi bonaka bibiindu bie bukusi bwe angaaki bioosi lundi osia kamachipi koosi.

²⁰Nebukadinesa abukula babaandu nga baboe, abo ba baba ne baramire balamu, mala baba nasioobi bewe nende be lisaaye liewe. Baramayo nabwila bubwami bwe Bapasha ne bwemisibwa.

²¹ Kano kekholekha khukhwichusia elomo eya Wele Omunyali Owa Bioosi khubirira khu mung'oosi Yeremia. Sibala sianjukhwa khulwe kimiiko kamakhumi saba khukhwola nga kimiiko kie Sabato nikio babaandu bakhaliindanga tawe kiechusibwa.

²²Nono Wele eenya khukhwichusia elomo yewe nga aaloma khubirira khu mung'oosi Yeremia. Mu mwiiko kwe khunyoa kwe khukhwamiia khwo mwami Sairasi owa Pasha, Wele Omunyali Owa Bioosi akhola omwami Sairasi arusia kumulaango. Kumulaango kuno aakurusia mu bwami bwewe bwoosi lundi akura mu buandiki ali,

²³ “Omwami Sairasi owa Pasha aloma ali, ‘Wele Omunyali Owa Bioosi, Wele owe mwikulu ambelesie ese bubwami bwoosi bwe khu sibala. Ne anderekho mwombakhile enju e Yerusalemu, mu Yuda. Nono Wele Omunyali Owa Bioosi, Wele wenywe akhoya aaba ne nanywe mweesi muuli babaandu bewe. Muli balekhuule khucha e Yerusalemu.’ ”