Read lubukusu 2 Ke Ch. 4 Bible Online

2 Ke Ch. 4 - lubukusu bible

2 Ke Ch. 4

¹ Omwami Solomoni akhola alutare eye kumukasa buleeyi bikele kamakhumi kabili ne bukhiikha bikele kamakhumi kabili. Ne khucha angaaki chimita saba.

²Nio aakhola litangi lie kumukasa. Buleeyi bwe khucha asi liaba bikele biraano. Bubalaayi bwaba bikele ekhumi ne khubotookhelela khwaba bikele kamakhumi kataru. Litangi lino liaba liabotookhelela nga engara.

³Asi walio biabao bifwaani bie chimuka bibiabotookhelela litangi. Bifwaani bie chimuka ebio biaba bikele kamakhumi kataru khubotookhelela litangi; mala biaba mu laini chibili. Abikhola bioosi khukhwama khu siindu silala ne litangi.

⁴Litangi liarengekhwa khu mikoongo kie bifwaani bie chieeyi ekhumi ne chibili che kumukasa. Chitaru chaloleelela ebunaswa, chitaru chaloleelela mumbo, chitaru chaloleelela ebunafubo, ne chitaru chaloleelela ebukwe.

⁵Lusike lwe litangi lwaba buboofu bwe lulwaala lulala. Lusike lwalio lwaba nga lusike lwe eseesi. Lwalolekhana nga simuli simulikha. Litangi liachamo kameechi embi chilita chielefu sitini.

⁶ Lundi akhola chinjelo che khusabilamo. Aara chiraano lubeka lwe ebunafubo ne chiraano ebunaswa. Mu chino basingilangamo biianwa bie khukhwosia. Ne litangi liaba lie basaayi khusabilamo.

⁷ Akhola biteetwe bie esahabu ekhumi, khuloondekhana nga lienyekhana. Aabira mu Lukaangu. Aara biraano lubeka lwe ebunafubo ne biraano lubeka lwe ebunaswa.

⁸ Lundi akhola chimesa ekhumi mala achira mu Lukaangu. Aara chiraano lubeka lwe ebunafubo ne chiraano lubeka lwe ebunaswa. Ne abuumba bibuumba bie esahabu emia ndala.

⁹Aakhola luuya lwe basaayi ne luuya luluundi lubalaayi. Akhola kimiliango khulwe luuya mala akifunikhakho kumukasa.

¹⁰Aara litangi akari we lubeka lwe ebunafubo nende lwe ebukwe lwe Lukaangu.

¹¹Huramu-abi lundi akhola chinyuungu, chimbako ne bibuumba. Nio aamalila elala kumulimo kwewe kwoosi nikwo akholela omwami Solomoni mu Lukaangu lwa Wele.

¹²Bino nibio aakhola: chinjeko chibili, bitumi bibili bibiafwaana nga bibuumba bibiaba khu ngaaki khwe chinjeko. Lundi aakhola chindiimba chibili chichafuunikha bibuumba bibili bie bitumi. Bitumi ebio biaba khu kangaaki khwe chinjeko.

¹³Lundi aakhola bifwaani bie kamatuunda kamakomanga chimia chine khulwe chindiimba chibili. Buli lutimba lwaba ne chilaini chibili che kamatuunda kamakomanga.

¹⁴Aakhola biteetwe mala aarakho chinjelo.

¹⁵Aara litangi ne bifwaani bie chieeyi ekhumi ne chibili asi we litangi.

¹⁶Huramu-abi akhola chinyuungu, chimbako ne chiuma ne bibiindu bioosi biloondekhana nabio. Akholela omwami Solomoni bibiindu bie kumukasa kumulayi khulwe nju eya Wele Omunyali Owa Bioosi.

¹⁷Omwami Solomoni abikholela mu mweyeeywe kwa Yoritani akari wa Sukoti ne Sereta.

¹⁸Solomoni aakhola bibiindu bino bioosi, mu bukali nio busiro bwe kumukasa nikwo bakholela se bwamanyikha tawe.

¹⁹Nio Solomoni akhola bibiindu bioosi bibiaba mu Lukaangu lwa Wele: Alutare eye esahabu, chimeesa che kumukaati kuaanwa khu Wele.

²⁰Biteetwe bie chitaa ne chitaa chabio bie esahabu yong'ene chiburukha mu lusiro lwe mukari lwe Abuundu Atakatifu.

²¹Bifwaani bie bimuli, chitaa ne chimbani che esahabu yong'ene.

²²Kamakaasi kakhala chindaambi, bibuumba, bibwakuli bie bibiindu biiunya bulayi ne chinjo. Bioosi bino bibiakholwa khu sahabu yong'ene. Lundi aakhola chinjiki che Lukaangu khulwe kimiliango kie lusiro lwe Abuundu Atakatifu Lukali, ne chinjiki che lusiro luboofu.