Read lubukusu 2 Ke Ch. 8 Bible Online

2 Ke Ch. 8 - lubukusu bible

2 Ke Ch. 8

¹Liabukula Solomoni kimiiko kamakhumi kabili khukhwombakha Lukaangu lwa Wele Omunyali Owa Bioosi, ne enju yewe omwene.

²Enyuma wako Solomoni ombakha lundi chingoba nicho Huramu aaba namueleesie, mala aramo Baisiraeli bachimenyamo.

³Solomoni aamba lukoba lwa Hamatisoba.

⁴Ombakha lukoba lwa Tadimori mu sichiimi, alala ne chingoba choosi che khubungamo nicho ombakha mu Hamati.

⁵Lundi ombakha lukoba lwa Beti-horoni, lwe ngaaki ne lwa Mwalo, chichaba chingoba che kamasiisi, bilibwa ne bibia.

⁶Ombakha lundi Baalati, ne chingoba choosi che khubungamo nicho Solomoni aaba ne nacho, ne chingoba choosi che kamakaari kewe ke liie, ne chingoba che chifarasi chewe, ne siosi siosi nisio Solomoni ekoomba khukhwombakha mu Yerusalemu, mu Lebanoni ne mu sibala sioosi nisio amiianga.

⁷Solomoni akhola Bahiti boosi, Baamori, Baperisi, Bahibi ne Bayebusi, babarama bakhaba Baisiraeli tawe, bakhola kimilimo kie khuyingilila.

⁸Elio liaba lisaaye liabwe liliarama enyuma wabwe mu sibala, nilio Baisiraeli bakhera tawe, khuba nasioobi. Bakhola kimilimo kimiyingilila khukhwola khu ndaalo yino.

⁹Ne kakhali Solomoni se akhola Baisiraeli baba nasioobi khu milimo kiewe tawe. Baba banamae, banamae bakhulu, babemeelesi be kamakaari kewe ke liie, ne babaandu bewe batimia chifarasi.

¹⁰Ne omwami Solomoni aaba ne babemeelesi bakhulu chimia chibili ne kamakhumi karaano, ba baaba ne bunyali khu baandu.

¹¹Solomoni aarusia omukhaana owa Farao khukhwama mu Lukoba lwa Daudi amuyila munju niyo aaba ne amwombakhiile. Aaloma ali, “Omukhasi wase se alamenya munju mwa Daudi, omwami owa Isiraeli tawe, sikila abuundu niio Lisanduku lie ndakaano ya Wele Omunyali Owa Bioosi liamile ali atakatifu.”

¹²Nio Solomoni aana biianwa bie khukhwosia khu Wele Omunyali Owa Bioosi khu alutare eya Wele Omunyali Owa Bioosi niyo aaba ne ombakhe ebweeni we Lukaangu.

¹³ Akhola ario nga kimilimo kia buli ndaalo ne kienyekha. Aana khuloondekhana ne lilaka lia Musa khulwe chisabato, kimieesi kimiya ne chinaikara chitaru che kumwiiko. Chinaikara chino chaba che kumukaati kukhalimo limela tawe, Naikara eye Likesa, ne Naikara eye Bisali.

¹⁴Khuloondekhana ne lilaka lia raraawe Daudi, Solomoni arobora bipupu bie basaayi khulwe kimilimo kiabwe. Lundi arobora bipupu bie Balawi khulwe kimilimo kiabwe kie khufumia ne kimilimo kikiindi ebweeni we basaayi, nga kimilimo kia buli ndaalo ne kienyekha. Ne arobora baliindi be bilibwa mu bipupu khuliinda bilibwa. Solomoni akhola ario khuloondekhana ne lilaka lia Daudi omundu owa Wele.

¹⁵Ne se baukhakho khukhwama khu niko Omwami aba ne alaka basaayi ne Balawi, khulwe sisiindu siosi siosi ne khulwe kamabiikhilo tawe.

¹⁶Khwako kimilimo kioosi nikio Solomoni akhola kiawa khukhwama khu ndaalo niyo kumusiingi kwe Lukaangu lwa Wele Omunyali Owa Bioosi kwombakhilwa khukhwola nga lwawa. Nio Lukaangu lwa Wele Omunyali Owa Bioosi kwawa.

¹⁷Nio Solomoni acha e Esioni-geberi ne e Eloti khu sikiingi sie enyanja mu sibala sia Edomu.

¹⁸Ne Huramu arumira Solomoni chimeeli chichemeelelwa ne bakholi ba Huramu. Bakholi bano babamanya enyanja bulayi bacha mu sibala sia Ofiri alala ne bakholi ba Solomoni. Barerera omwami Solomoni khukhwama ebweeneyo, esahabu bitonyi chimia chine ne kamakhumi karaano.