Read lubukusu 2 Ke Ch. 9 Bible Online

2 Ke Ch. 9 - lubukusu bible

2 Ke Ch. 9

¹ Nio Kwini Sheba nga aaulila efuma ya Solomoni eecha e Yerusalemu amukhaka ne kamareeba kamaandalafu. Echa ne babaandu bakali ne chingamia chichasuta bing'ayilisia bulayi, esahabu engali ne kamabaale ke bukusi bwe angaaki. Nga Kwini oyo ne ola khu Solomoni amuboolela koosi kakaba mu nganakani chewe.

²Ne Solomoni amukobosia kamareeba kewe koosi. Se siabao sisiindu siosi siosi silume khu Solomoni sisiamukhaya khumwinooselia tawe.

³Kwini owa Sheba abona bukesi bwa Solomoni, ne lichipi nilio aba ne ombaakhe,

⁴biakhulia bie khu sialwa sia Solomoni, bubwikhalo bwe bakholi bewe bakhulu, kimilimo kie bakholi bewe chingubo nicho bafwara, bakholi babareeranga biakhulia bio mwami, ne chingubo chabwe ne chimbosio che khukhwosia nicho aanila mu nju ya Wele Omunyali Owa Bioosi. Bino bioosi biakhola Kwini owa Sheba arangararwa.

⁵Aaboolela Omwami Solomoni ali, “Niko naulila mu sibala siase khu makhuwa kowo ne khu bukesi bwowo kali ng'ali.

⁶Ne kakhali se nafukiilila niko naulila tawe khukhwola nga ne nichile mala samwene nakabona. Ne se naulilakho akhaba sitonyi sie bukesi bwowo, ne buiinda bwowo buli bukali tawe. Ewe okhila niko naulila.

⁷Babaandu bowo bali ne busangaafu bukali! Ne bakholi bowo bali ne busangaafu bakali bakhukholelanga ewe ne baulila ke bukesi bwowo!

⁸Wele Omunyali Owa Bioosi, Wele wowo afume osiimisiibwe ne nawe ne khukhura ewe khu ndebe eye bubwami bwewe, nga omwami Khulwa Wele Omunyali Owa Bioosi wowo. Sikila Wele wowo asiima Isiraeli ne akhabayeete khulwa mindali. Akhukholile ewe Omwami khu nibo nio okhole ka ng'ali ne buluungi.”

⁹Nio Kwini oyo aelesia omwami Solomoni esahabu bitonyi emia ndala ne kamakhumi kabili, ne bing'ayilisia bulayi bikali, ne kamabaale ke bukusi bwe angaaki. Solomoni se anyoolakho lundi bing'ayilisia bulayi bikali nga nibio Kwini owa Sheba amuelesia tawe.

¹⁰(Khutasa khwako bakholi ba Huramu ne bakholi ba Solomoni bareera esahabu khukhwama e Ofiri, ne kimirongooro kimitaare ne kamabaale ke bukusi bwe angaaki.

¹¹Solomoni arumikhira kimirongooro ekio khukhola biteechi bie Lukaangu ne lichipi. Ne lundi akirumikhira khukhola biilili ne kamatuungu ke babeembi be kimienya. Kimitaare nga ekio kirio kiaba kiakhabonekhakho mu sibala sia Yuda tawe.)

¹²Omwami Solomoni aelesia Kwini owa Sheba bioosi nibio eenya. Aamua buli nisio aasaba mala biakhilakho nibio Kwini owa Sheba areera. Nio aakalukha mu sibala siewe ne bakholi bewe.

¹³Nio omwami Solomoni anyoola buli mwiiko esahabu bitonyi chimia sita ne kamakhumi sita ne sita.

¹⁴Khutasa khu sahabu yino yatuba khu eyo niyo baboofuli, ne baboofuli bakeendakeenda, ne busuuru nibwo babaami be sibala sia Arebia baruunga ne babemeelesi be sibala.

¹⁵Solomoni aakhola chingabo chimbalaayi chimia chibili khukhwama khu sahabu. Buli engabo yakholwa khu shekeli che sahabu chimia sita.

¹⁶Lundi aakhola chingabo chichiindi chimia chitaru ne buli ngabo yaba yabukula chishekeli che sahabu chimia chitaru. Solomoni aara bibiindu ebio mwichipi lie mu musiru kwa Lebanoni.

¹⁷Omwami oyo lundi akhola endebe emboofu eye bubwami eye kumusaanga mala akifuumakho esahabu yong'ene.

¹⁸Endebe eye bubwami yaba ne bituumi sita bie khuniinilakho ne situma sie esahabu sie khukhwikhalakho. Buli lubeka lwe endebe lwabakho kamakhono kabili ke khuolelakho. Ne bifwaani bie chitalang'i bibili biema a makhono chana ako.

¹⁹Bifwaani bie chitalang'i ekhumi ne bibili biema, buli bibili lubeka ne lubeka ekhumaliilikha khwe bituumi, khu bituumi sita. Endebe nga yino eri se yakholwakho mu bwami bwosi bwosi tawe.

²⁰Bikoombe bia Solomoni bioosi bie khunywelamo biaba bie esahabu. Ne bibiindu bioosi bie mu lichipi lie kumusiru kwa Lebanoni biaba bie esahabu yong'ene. Mbao sisiaba sie efwesa tawe. Sikila efwesa se yabalwa khuba eye bukhala bwosi bwosi mu ndaalo cha Solomoni tawe.

²¹Chimeeli cho mwami chachichanga ne bakholi ba Hiramu. Chachichanga buli enyuma we kimiiko kitaru e Tarishishi. Chareeranga esahabu, efwesa, kimisaanga, chimbuyusi nende chinyuni tausi.

²²Nono omwami Solomoni aba omuiinda lundi omukesi khukhila omwami okundi yesi yesi owe khu sibala.

²³Ne babaami boosi be khu sibala benyanga khukhwicha babone Solomoni mala barekeeresie bukesi nibwo Wele amua.

²⁴Buli mulala owecha amureerera siianwa, biianwa bino biaba bie efwesa ne esahabu, chingubo, emiri, bing'ayilisianga bulayi, chifarasi ne chinyumbu. Bino biechanga buli mwiiko.

²⁵ Solomoni aaba ne kamataala ke chifarasi chielefu chine ne kamakaari ke liie. Aaba ne babaandu batimia chifarasi chielefu ekhumi na chibili. Batimia chifarasi balala aabara mu ngoba che kamakaari ke liie, ne babaandi mu Yerusalemu niio aaba.

²⁶ Ne Solomoni amiia khu baami boosi khukhwama khu luuchi lwa Efurati khukhwola khu sibala sie Bafilisiti ne khu lwakha lwa Misiri.

²⁷Ne omwami akhola efwesa yaba esala busa buli abuundu mu Yerusalemu nga kamabaale. Ne chimbao che kumutarakwa chaba chingali busa nga kimikhuyu kie e Shefela.

²⁸ Bakulila Solomoni chifarasi khukhwama e Misiri ne khukhwama mu bibala bibiindi bioosi.

²⁹Bikholwa bibiindi bioosi bia Solomoni khukhwama khu sie khunyoa khukhwola khu simaliilisi, biaandikwa mu Lukano lwo mung'oosi Nasani ne mu bung'oosi bwa Ahiya Omushilo. Ne lundi biaandikwa mu buloli bwa Ito, owaba ne buloli khuloondekhana ne bubwami bwa Yeroboamu okhwa Nebati.

³⁰Solomoni amiia khukhwama mu Yerusalemu khu Isiraeli yoosi khulwe kimiiko kamakhumi kane.

³¹Nio Solomoni afwa, asiikhwa mu Lukoba lwa Daudi raraawe. Ne Rehoboamu omusoleeli wewe amiia mu bweyaangu bwewe.