Read lubukusu Esr. 1 Bible Online

Esr. 1 - lubukusu bible

Esr. 1

¹ Mu mwiiko kunyoa nikwo Sairasi abeelamo omwami owe Bapasha, Wele Omunyali Owa Bioosi aakhola niko aloma khubirira khu mung'oosi Yeremia. Wele Omunyali Owa Bioosi aakhola Sairasi omwami owe Bapasha arusia lilaka mu bwami bwewe bwoosi. Ne lundi aandika lilaka elio naloma ali:

²“Omwami Sairasi owe Bapasha aloma ali: Wele Omunyali Owa Bioosi, Wele owe mwikulu, ambelesie ese bubwami bwe bibala bino bioosi mala ambeele bunyali bwe khumwombakhila Lukaangu e Yerusalemu eli mu Yuda.

³Wele akhoya abe ne nanywe muuli babaandu bewe. Muli balekhuule khucha e Yerusalemu eli mu Yuda, mala mwombakhe enju eya Wele Omunyali Owa Bioosi owe Baisiraeli. Ali Wele oli mu Yerusalemu.

⁴Ne aliio omundu yesi oli mu mbaambe owenya buyeeti akobole, ba bamenya siimbi naye bakhoya bamue buyeeti bwe efwesa ne esahabu, bibiindu ne bibaywa, ne biianwa bie khukhwirusia khwo mundu, khulwe nju eya Wele eli mu Yerusalemu.”

⁵Nio babemeelesi be chinju che chikholo cha Yuda ne Benjamini, basaayi ne Balawi, nende buli yesi yesi niye Wele amala khuramo lilienya berekekha khucha khukhwombakha enju eya Wele Omunyali Owa Bioosi mu Yerusalemu.

⁶Ba bamenya siimbi naye boosi babayeeta khubaa bibiindu bikali bie efwesa, esahabu, bibiindu ne bibaywa, ne bibiindu bibiindi bie bukusi, ne biianwa bie khukhwiaana.

⁷Sairasi akobosia bibiindu nibio omwami Nebukadinesa abukula khukhwama munju eya Wele Omunyali Owa Bioosi mu Yerusalemu nibio ara munju eye bawele bewe.

⁸Abiakaanisia Mitiretati, omwimeelesi we libiikhilo lie lichipi. Naye abibala ebweeni wa Shesibasari, omwami owa Yuda.

⁹Ne buno nibwo bubwaba bukali bwabio: Chipeseni che esahabu kamakhumi kataru, chipeseni che efwesa eelefu ndala ne bifuria kamakhumi kabili na tisa.

¹⁰Bipwakuli bie esahabu kamakhumi kataru, bibuumba bie efwesa chimia chine ne likhumi, ne bibiindu bibiindi eelefu ndala.

¹¹Bibiindu bioosi bie esahabu nende bie efwesa biaba chielefu chiraano ne chimia chine. Ebio bioosi nibio Shesibasari asuta, nga be mumbaambe ne bareerwa khukhwama e Babiloni khucha e Yerusalemu.