Read lubukusu Esr. 3 Bible Online

Esr. 3 - lubukusu bible

Esr. 3

¹Kumwesi kwa saba nga ne kwola, babaana Baisiraeli ne bali boosi mu chingoba chabwe, babuusiana mu Yerusalemu.

² Nio Yoshua okhwa Yosataki, ne basaayi baasie, ne Serubabeli okhwa Shealitieli, alala ne balebe bewe, baambana khukhwombakha lundi alutare eya Wele owa Isiraeli, nio baanilekho biianwa bie khukhwosia khuloondekhana ne lilaka lia Musa, omundu owa Wele.

³ Bara alutare abuundu niio yaba mu khunyoa, akhaba ne baaba ne buuri khuloondekhana ne babaandu ba baamenya mu sibala esio, mala baanilakho biianwa bie khukhwosia khu Wele Omunyali Owa Bioosi kumutikhinyi ne ekolooba.

⁴ Bakhebulila kumulukha kwa Naikara eye Bisali khuloondekhana ne kamalaka, baana buli endaalo biianwa bibienyekhana khulwe ndaalo ng'eneyo.

⁵ Khutasakho, baana biiana bia buli ndaalo ne biianwa bie kumwesi kumuyia, ne akhaba mu mabuusiana kakaandi koosi niio Wele Omunyali Owa Bioosi aasaywa. Lundi biabao biianwa nibio omundu yesi aananga khu Wele Omunyali Owa Bioosi khulwe khukhwirusia.

⁶Akhaba babaandu ne baba ne basiili khukhwombakha lundi kumusiingi kwe Lukaangu lwa Wele Omunyali Owa Bioosi, barakikha khuaanila Wele Omunyali Owa Bioosi biianwa bie khukhwosia endaalo enyoa eye kumwesi kwa saba.

⁷Nio baelesia babombakhi ne babeechi chirupia, mala baana biakhulia nende bie khunywa, ne kamafura biilwe khu baandu be mu chingoba che Tiro ne Sidoni khulwe khukhwofulamo kimirongooro kimitarakwa khukhwama e Lebanoni, kikiareererwa khu nyanja khukhwola e Yafa. Kano koosi kekholekha khulwe lisibula lia Sairasi, omwami owa Pasha.

⁸Nono mu mwesi kwa khabili kwe kumwiiko kwe khabili ne bamalile khukobola khu nju eya Wele Omunyali Owa Bioosi mu Yerusalemu, Serubabeli okhwa Shealitieli, Yoshua okhwa Yosataki ne balebe baramire barakikha kimilimo alala ne basaayi ne Balawi. Babaandu boosi ba baaba ne bamile mu mbaambe bakobola e Yerusalemu, bakhola kimilimo. Barobora Balawi ba baaba ne bukhulu bwe kimiiko kamakhumi kabili ne khukhilao, ba bara mu milimo kie khukhwimeelela khukhwombakha lundi enju eya Wele Omunyali Owa Bioosi.

⁹Ne Yoshua ne babaana bewe be siseecha ne balebe bewe, ne Katimieli ne babaana bewe be siseecha, ne babaana ba Yuda, baambaana alala mu khwimeelela khwe khukhwombakha khwenju eya Wele Omunyali Owa Bioosi. Baba alala nende be kholo eya Henatati ne babaana bewe, Balawi ne babaana ne balebe babwe.

¹⁰ Ne nga babombakhi ne baala kumusiingi kwe Lukaangu lwa Wele Omunyali Owa Bioosi, basaayi beele befwarire chingubo che busaayi, becha ne chikhoombi mukhono mwabwe, ne Balawi be lisaaye lia Asafu bema eyo ne bali ne bibiindu bie khu khuupania alala mu mienya. Bafumia Wele Omunyali Owa Bioosi khuloondekhana nga omwami Daudi owa Isiraeli abekesia.

¹¹Mala bemba ne baakanila, ne baelesia Wele Omunyali Owa Bioosi efuma ne khumusiima bali: “Wele Omunyali Owa Bioosi ali omulayi, ne busiime bwewe khu Isiraeli buli bwa mindali na mindali.” Babaandu boosi bayokela ne kamaani ne bafumia Wele Omunyali Owa Bioosi sikila kumulimo kwe kumusiingi kwe nju eya Wele Omunyali Owa Bioosi kwaba kwarakiikhe.

¹²Ne kakhali basaayi ne Balawi ne basaakhulu bakali, ne babemeelesi be chikholo ba babona Lukaangu lwe khunyoa, balila nga ne balola kumusiingi kwe Lukaangu luno ne kulikho kwaalwa. Balila lukali. Babaandi bayokela sikila busangaafu.

¹³ Mbao na mulala owanyala khukhwaukhasia luyoka lwe busangaafu ne khulila tawe, sikila luyoka nilwo bakhola lwaba lukali. Lwauliilikhana aleeyi.