Read lubukusu Esr. 4 Bible Online

Esr. 4 - lubukusu bible

Esr. 4

¹Basiku ba Yuda ne Benjamini baulila bali babakoboole khukhwama mu mbaambe balikho bombakhila Wele Omunyali Owa Bioosi, Wele owa Isiraeli Lukaangu.

² Enyuma wako bacha khulola Serubabeli ne babemeelesi be chinju mala bababoolela bali, “Lekha khwombakhe ne nanywe, sikila khusaaya Wele mulala niye musaaya, mala khumurusilianga chimbosio khukhwama mu ndaalo cha Esarihatoni, omwami we Ashuru, owakhureera efwe khumenya ano.”

³Ne kakhali Serubabeli, Yoshua, alala ne babemeelesi be chinju mu Isiraeli bababoolela bali, “Se khwenya buyeeti bwenywe khukhwombakhila Wele wefwe Lukaangu tawe. Fwabeene kane khwombakhile Wele Omunyali Owa Bioosi, Wele owe Baisiraeli Lukaangu nga Sairasi, omwami wa Pasha, ne akhulaka.”

⁴Nio babaandu ba baaba ne bamenyile mu sibala omwo bakhaka khukhola Bayaudi bafwe kimiooyo ne khubariikhirisia balekhe khukhwombakha.

⁵Babaandu be mu sibala esio baruunga akhaba bakeleki be mu bwami bwa Pasha bonake kimilimo kie Bayaudi. Bachiililila khukhola kano mu bwami bwa Sairasi bwoosi ne mu bwami bwa Dario, omwami owa Pasha.

⁶ Mu lirakikha lie khukhwamiia khwo mwami Ahasuero, basiku be babaandu bamenyile mu Yuda ne Yerusalemu bakhola etoloondo ne baandika chibarwa chimbi khu baami.

⁷Lundi, mu bwami bwe Aritashasita, Bisilamu, Mitiretati, Tabeeli nende be bulala bwabwe bamuandikila ebarwa. Ebarwa yaandikwa mu Luaramaiki mala yasomwa ne kaluukhasibwa.

⁸Akhaba Reumu omukhulu owe banamae, ne Simusai omuandiki, aandika ebarwa yino khu mwami Aritashasita khu Yerusalemu ali:

⁹“Khukhwama khu Reumu, omukhulu owe banamae, Shimushai, omuandiki owe sibala, khukhwama khu be bulala babasiaabwe, bakhalaki, ne khukhwama khu baami babaandi bakeekhe babamiia, ba Pasha, babaandu be siseecha babaama Erikewi, ba Babiloni, ne babaandu ba Susa (abo nibo babaandu be sibala sia Elamu).

¹⁰Ne babaandu babaandi nibo omuiinda lundi owe bunyali Asiuribanipali owauuyisia babaandu khukhwama mu chiingo chabwe mala bamenya mu lukoba lwe Samaria ne mu sibala sie engelekha we luluuchi lwa Efurati.”

¹¹Kano niko kamakhuwa kakaandikwa mu barwa eyo, “Khu mwami Aritashasita: bakholi bowo, be lukoongo lwe Mumbo mwe luluuchi lwa Efurati bakhukheesia.

¹²Khwenya omwami omanye oli Bayaudi babeecha ano khukhwama mu bibala biowo bibiindi bachiile mu Yerusalemu. Balikho bombakha lundi lukoba lumayaanu lundi lureengu. Bamalile khung'oona kumusiingi ne balikho bamaliilisia khukhwombakha kamasiisi lundi.

¹³Omwami, lukoba luno lwaba ne lwombakhwa lundi mala kamasiisi kaalwo kawa, babaandu bano bacha khulekha khuruunga busuuru ne chirupia chowo che bubwami chiicha khuboomba.

¹⁴Sikila kuli kumulimo kwefwe khuria bubwami bwowo, se khwenya khubone kano ne kekholekha tawe. Niko kakila ne khuandikila omanye.

¹⁵Khwako lola mu libiikhilo lie kamaandike niko bakuuka bowo babiikha. Olanyoola oli lukoba luno buli lwoosi luli lureengu lundi lunaanianga babaami. Babaandu balwo buli lwosi bali baandalafu khubamiia. Lino nilio liliakila lukoba lwonakwa.

¹⁶Khwako khuli nang'ali omwami khuli, lukoba luno lwombakhwa lundi ne kamasiisi kaalwo kawa, omwami socha khunyala khwamiia lundi lukoongo lwe Mumbo mwe luluuchi lwa Efurati tawe.”

¹⁷Omwami aruma likobosio lino: “Khu Reumu, omwimeelesi, ne khu Simusai omuandiki owe sibala ne babasiaabwe bamenyile mu Samaria ne mu lukoongo lwe Mumbo mwe luluuchi lwa Efurati, kimileembe.

¹⁸Ebarwa niyo mwaruma basomeele bulayi bubwene.

¹⁹Narusia kamalaka khumenieelesia, mala ng'ali lianyoolekhaane lili khukhwama khale lukoba lwa Yerusalemu lulobaanga khuulila babaami. Lundi luli lukoba lwe bureengu ne kamatinyu.

²⁰Babaami be kamaani baamiia Yerusalemu ne lukoongo lwe Mumbo mwe luluuchi lwa Efurati. Ne lundi babaandu ba Yerusalemu babaruunga busuuru bubwaukhane.

²¹Khwako rusia kamalaka babaandu abo balekhe khukhwombakha lundi lukoba khukhwola nga ndusia lilaka.

²²Khola lino khangu, nio butinyu bwosi bwosi bulekhe khukhwikholekha khu mwami Aritashasita.”

²³Nga ebarwa eyama khu mwami yino ne yasomwa khu Reumu ne Simusai omuandiki, alala ne babaasie, bacha khangu khu Bayaudi e Yerusalemu mala bakhiingilila ne kamaani balekhe khukhwombakha Lukoba lundi.

²⁴ Nio kimilimo khu nju eya Wele mu Yerusalemu kiema. Kiema khukhwola kumwiiko kukhola khabili kwe khukhwamiia khwa Dario, omwami owa Pasha.