Read lubukusu Esr. 5 Bible Online

Esr. 5 - lubukusu bible

Esr. 5

¹Mu biise ebio bang'oosi, Hagai ne Sakaria okhwa Ido, mu lisina lia Wele owa Isiraeli, bang'oolela Bayaudi ba baamenya mu Yuda ne mu Yerusalemu.

² Nio Serubabeli okhwa Shealitieli ne Yoshua okhwa Yosataki barakikha khukhwombakha lundi Lukaangu mu Yerusalemu. Bang'oosi ba Wele Omunyali Owa Bioosi babili abo babayo ne babayeeta.

³Mu siise sienesio Tatenai, omuruki we lukoongo lwe Mumbo mwe luluuchi lwa Efurati, ne Shetari-Bosenai ne babasiaabwe, ba bechakho mala ba bareeba bali, “Naanu owabalakile khukhwombakha enju yino lundi ne khumala liliombakha lino?”

⁴Lundi ba bareeba bababoolele kamasina ke babaandu balikho bombakha.

⁵Ne kakhali Wele wabwe aaba ne basaakhulu Bayaudi. Se babemisia tawe khukhwola nga likhuwa liolela Dario mala nio bakobosie mu buandike.

⁶Ebarwa niyo Tetanai omuruki we lukoongo lwe Mumbo mwe luluuchi lwa Efurati Shetari-Bosenai ne babasiaabwe barumira omwami Dario yabamo kano:

⁷“Khu mwami Dario, kimileembe kibe ne nawe.

⁸“Omwami okhoya omanye oli khwachile mu sibala sie Yuda munju eya Wele owe bunyali. Elikho yombakhwa ne kamabaale kamaboofu ne kimirongooro kiemisiibwe akari khwisiisi. Kumulimo kulikho kukholekhwa ne busicha mala kulikho kuchiililila bulayi.

⁹“Khureebire babemeelesi be babaandu bakhuboolele owabalakile khukhwombakha lundi enju yino ne khukimalila elala.

¹⁰Lundi khwabareeba kamasina kabwe. Lundi khwaandika asi kamasina ke babemeelesi babwe nio wesi obamanye.

¹¹“Ne lino liaba likobosio liabwe: ‘Efwe khuli bakholi ba Wele owe Likulu ne liloba, mala khulikho khwombakha lundi enju eyombakhwa kimiiko kimikali kikiabira no mwami omukali owe kamaani owa Isiraeli.

¹² Ne kakhali sikila bakuuka befwe bakhalasia Wele owe mwikulu, aabalekha baulwa no mwami Nebukadinesa owe Babiloni Omukalitayo. Onaka enju yino mala aamba babaandu abayila mu mbaambe mu Babiloni.

¹³ Kakhaba kario, kumwiiko kunyoa kwe khukhwamiia khwo mwami Sairasi nga omwami owa Babiloni, Sairasi arusia lilaka ali enju eya Wele yino yombakhwe.

¹⁴Omwami Sairasi arusia munju eya Wele esahabu ne efwesa ne bibiindu nibio Nebukadinesa aaba aabukula khukhwama mu Lukaangu mu Yerusalemu, mala aaba aabira munju eye bawele bewe mu Babiloni. Sairasi akaanisia bibiindu bino omundu olaangwa Shesibasari, niye arobora khuuba omuruki owe lukoongo lwa Yuda.

¹⁵Omwami amuboolela ali: “Bukula bibiindu bino obikobosie mu Lukaangu mu Yerusalemu, ne lekha Lukaangu lwombakhwe lundi niio lwaba ekhunyoa.”

¹⁶Nio Shesibasari yuno echa mala arakikha khukhwombakha kumusiingi kwe nju eya Wele eli mu Yerusalemu. Nio liliombakha liachiililila khukhwamila abwenao khukhwola luno, ne Lukaangu lusiili khuwa tawe.’

¹⁷“Khwako omwami, ne likhusiimisia, lekha bapule mu libiikhilo likhale lie bubwami bwa Babiloni babone omwami Sairasi ne aarusia kumunwa khukhwombakhwa lundi khwe nju eya Wele mu Yerusalemu. Nio omwami okhuandikile okhuboolele nilio wibaasia.”