Read lubukusu Esr. 6 Bible Online

Esr. 6 - lubukusu bible

Esr. 6

¹Nio omwami Dario arusia lilaka, bapule mu libiikhilo lie biaandike bikhale bie bubwami bibiabiikhwa mu Babiloni.

²Kamaandiko kakanyolekha mu lukoba lwa Akibatana mu lukoongo lwa Metia. Kakabakho niko kano:

³“Mu mwiiko kunyoa nikwo omwami Sairasi amiilamo arusia lilaka khuloondekhana ne nju eya Wele mu Yerusalemu nga abuundu niio baanila chimbosio ne biianwa bie khukhwosia. Lukaangu lukhoya lube bukhiikha chimita kamakhumi kabili na saba ne buniina bwosi bube burio.

⁴Kamasiisi kalombakhwa ne kamabaale kamaboofu khukhwola khataru ne kimirongooro khukhwola lulala nga ne kawa. Kumuruungo kwosi kucha khuruungwa khukhwama mwibiikhilo lie bubwami.

⁵Akhaba bibiindu bioosi bie esahabu ne efwesa bie nju eya Wele nibio omwami Nebukadinesa areera e Babiloni khukhwama mu Lukaangu e Yerusalemu bikhoya bikobosibwe abuundu abio munju eya Wele.”

⁶Nio Dario aruma likobosio ali: “Khu Tatenai, omuruki owe lukoongo lwe luluuchi lwa Efurati eye engelekha Shetari-Bosenai, ne babaami baasio be mu lukoongo lwe luluuchi lwa Efurati eye engelekha. ‘Mukhacha sia Lukaangu tawe.

⁷Lekhana ne kimilimo kie enju eya Wele. Lekha omuruki we Bayaudi ne basaakhulu be Bayaudi bombakhe lundi enju eya Wele niio yaba khaale.

⁸Lundi ndikho khulaka nisio okhoya oyeete basaakhulu be Bayaudi bano mukhwombakha enju eya Wele. Kumuruungo kwabwe kularuungwa mu bwichufu mala khangu khukhwama mu rupia chichaama mwibiikhilo lie bubwami che busuuru bubwama mu lukoongo lwe luluuchi lwa Efurati nio kumulimo kulekhe khwima tawe.

⁹Elesia buli ndaalo basaayi baali mu Yerusalemu siosi siosi nisio benya. Aana chiuunwa ching'ana, namwe kamamiiku namwe kamakheese ke biianwa bie khukhwosia khu Wele owe mwikulu. Lundi aana engaanu, chumbe, endali, ne kamafura nga basaayi ne benya.

¹⁰Khola murio nio basaayi baane biianwa bisiimisia khu Wele owe mwikulu ne khusabila chikhabi omwami ne babaana bewe be siseecha.

¹¹Lundi ndasa khulaka ndi omundu yesi yesi olekelesiakho lilaka lino, ese ndaka ndi bachoole lukuulo khukhwama khunju yewe, mala bamuunakile. Nio enju yewe ekholwe khuba libuumbi lie esiina.

¹²Wele owarobora Yerusalemu nga abuundu niio asaayilwa akhoya aane kumunaanio khu mwami yesi yesi namwe babaandu bakhakaluukhasie kano, namwe khukhaka khukhwonaka enju eya Wele eli Yerusalemu. Ese, Dario, narusiisie lilaka lino. Likhoya liloondwe bulayi.’ ”

¹³Nio omuruki Tatenai, Shetari-Bosenai, ne babaami basie bakhola bulayi bwene nga omwami Dario ne alaka.

¹⁴ Ne babemeelesi Bayaudi bachiililila bulayi khukhwombakha nga baboolelwanga ne bang'oosi Hagai ne Sakaria okhwa Ido. Bamala khukhwombakha nga nilwo balakwa ne Wele owa Isiraeli ne Sairasi, Dario, ne Aritashasita, babaami ba Pasha.

¹⁵Nga bamala khukhwombakha Lukaangu mu ndaalo eya khataru eye kumwesi kwa Atari, mu mwiiko kwa sita nga omwami Dario arakikha khukhwamiia.

¹⁶Ne Baisiraeli, basaayi, Balawi, ne babaandi boosi babakobola khukhwama mu mbaambe baana Lukaangu khu Wele ne busangaafu.

¹⁷Mu biise bie khuaana Lukaangu khu Wele barusia chiuunwa emia ndala, kamamiiku chimia chibili ne kamameeme chimia chine nga chimbosio, ne chindurume ekhumi na chibili nga biianwa khulwe bumayaanu, buli ndala khulwe ekholo eya Isiraeli.

¹⁸Nio bara basaayi ne Balawi mu bweyaangu bwabwe, khulwe bukholi bwe Lukaangu lwa Wele luuli mu Yerusalemu, nga ne liaandikwa mu sitabu sia Musa.

¹⁹ Babaandu babakobola khukhwama mu mbaambe, bakhola Epasaka khu ndaalo ekhola ekhumi na chine eye kumwesi kunyoa.

²⁰Basaayi ne Balawi boosi betakaasa alala, mala boosi baba bamiliiu. Nio beera limeeme lie Epasaka khu babakobola boosi, khulwe Basaayi basiaabwe, ne khu beene.

²¹Baisiraeli boosi babakobola khukhwama mu mbaambe, balia chimbosio ne naabo boosi babalekha chingila chimayaanu che babaandu babaandi babamenyanga mu sibala omwo mala babecha khusaaya Wele Omunyali Owa Bioosi, Wele owe Baisiraeli.

²²Khu ndaalo saba, balia ne busangaafu Naikara eye kumukaati kukhalimo limela tawe. Basangaala lukali sikila Wele Omunyali Owa Bioosi, aba ayuusiisie kumwoyo kwo mwami owa Ashuru khu nibo, nio abayeeta mu mulimo kwabwe kwe khukhwombakha lundi enju eya Wele, Wele owa Isiraeli.