Read lubukusu Esr. 7 Bible Online

Esr. 7 - lubukusu bible

Esr. 7

¹Enyuma wakano koosi ne kekholeekhe, nga Aritashasita ne aba omwami owa Pasha, abao omundu owalaangwa bali Esira. Esira aba okhwa Seraya, ne Asaria okhwa Hilikia,

²ne Hilikia okhwa Sialumu, ne Sialumu okhwa Satoki, ne Satoki okhwa Ahitubu,

³ne Ahitubu okhwa Amaria, ne Amaria okhwa Asaria, ne Asaria okhwa Meraioti.

⁴Meraioti aba okhwa Seraya, ne Seraya okhwa Usi, ne Usi okhwa Buki ne,

⁵Buki okhwa Abishua, ne Abishua okhwa Fineasi, ne Fineasi okhwa Eliesa, ne Eliesa okhwa Aruni Omusaayi Omukhulu Lukali.

⁶Esira yuno aama e Babiloni. Aaba omuandiki owe bukesi lukali mu lilaka lia Musa nilio Wele Omunyali Owa Bioosi, Wele owa Isiraeli amala khua Musa. Nio omwami Aritashasita amua bioosi nibio aasaba, sikila Esira aaba ne chikhabi cha Wele Omunyali Owa Bioosi, Wele wewe.

⁷Ne mu mwiiko kwa saba kwe khukhwamiia khwo mwami Aritashasita, Baisiraeli balala bacha e Yerusalemu alala ne basaayi, Balawi, babembi be kimienya, baliindi, ne bakholi be mu Lukaangu.

⁸Esira echa mu Yerusalemu kumwesi kwa kharaano khu mwiiko kwa saba kwe khukhwamiia khwo mwami Aritashasita.

⁹Esira aarura Babiloni khu ndaalo enyoa khu mwesi kwe khunyoa mala Wele abayeeta boola mu Yerusalemu, mu ndaalo enyoa eye kumwesi kwa kharaano.

¹⁰Sikila Esira yaba erusia ne kumwoyo kwewe khukhweyika Lilaka lia Wele Omunyali Owa Bioosi, ne khulikhola, ne khukhwekesia kamalaka mu Isiraeli.

¹¹Yino niyo ebarwa niyo omwami Aritashasita aelesia Esira omusaayi lundi omuandiki, owasomela kamalaka ka Wele Omunyali Owa Bioosi niko aelesia Baisiraeli:

¹²“Khukhwama khu mwami Aritashasita omwami owe babaami khucha khu musaayi Esira, omuandiki we lilaka lia Wele owe mwikulu.

¹³“Ndaka ndi yesi yesi khu Baisiraeli boosi, namwe basaayi, ne Balawi bali mu sibala siase, owekoomba khucha ne nawe e Yerusalemu banyala bacha.

¹⁴Ese ndikho khuruma alala ne bakeleki base saba, oche oreeberesie liiba liili mu Yerusalemu ne mu Yuda khuloondekhana ne lilaka lia Wele wowo, limalile khuaanwa khwiwe.

¹⁵Ne lundi bukula biianwa bie esahabu ne efwesa nibio ese ne bakeleki base khuaanile khu Wele owa Isiraeli, omenyile mu Yerusalemu.

¹⁶Wesi bukula efwesa ne esahabu bioosi nibio onyoola mu sibala sia Babiloni sioosi, ne biianwa bie khukhwerusia nibio Baisiraeli ne basaayi babwe baana khulwe enju eya Wele wabwe mu Yerusalemu.

¹⁷“Ne chirupia chino kula chiuunwa, kamamiiku, kamameeme, biianwa bie biakhulia ne biianwa bie khunywa, mala mu biaanile khu alutare eye nju eya Wele wenywe eli mu Yerusalemu.

¹⁸Siosi siosi sibonekha khuba silayi khwiwe ne khu basio khukholela efwesa ne esahabu eramire, onyala wakhola, khuloondekhana ne lilienya lia Wele wowo.

¹⁹Ne bibiindu ebio nibio bakhua khulwe bukholi bwe nju eya Wele wowo, biaane khu Wele owa Yerusalemu.

²⁰Ne siosi siosi sisienyekhana khulwe enju eya Wele wowo, nisio wenya khuaana, onyala wasibukula khukhwama mu libiikhilo lio mwami.

²¹“Ne ese, omwami Aritashasita, ndikho ndusia lilaka khu babiikhi boosi be ngelekha we luluuchi lwa Efurati khuelesia buli siosi nisio omusaayi Esira, omuandiki we lilaka lia Wele owe mwikulu abasaba. Lundi siikhoya siakholelwa mu burekeerefu bwoosi.

²²Muelesie sikelo sisioola chikiilo chielefu chitaru ne chimia chine che efwesa, chikiilo kamakhumi ekhumi che ngaanu, chilita chielefu chibili che ndali, chilita chielefu chibili che kamafura ke chiseituni, ne chumbe engali nga yenyekhana.

²³Siosi siosi silakilwa ne Wele we mwikulu, lekha siikholekhe mu bwichufu khulwe enju eya Wele owe mwikulu nio lirima liewe likhakhola lirio liaba khwise ne babaana base tawe.

²⁴Mukhakhola murio mwabuusia busuuru bwosi bwosi khukhwama khu basaayi, Balawi, babembi be kimienya, baliindi, bakholi be mu Lukaangu, namwe omukholi yesi yesi okhola munju eya Wele tawe.

²⁵“Ne ewe Esira, khuloondekhana ne bukesi bwa Wele wowo nibwo oli ne nabwo, robora babemeelesi ne bakhalaki bakhalakile babaandu boosi baali engelekha we luluuchi lwa Efurati bung'ali. Lekha bakhole bario khu baandu boosi bamanyile lilaka lia Wele wowo. Okhoya wekesia Lilaka elio khu buli yesi yesi okhalimanyile tawe.

²⁶Omundu yesi yesi nakharia kamalaka ka Wele wowo namwe kamalaka kase tawe, akhoya aebwe kumunaanio, khulwe lifwa, khuyilwa mu mbaambe, namwe khunuulwa kimiaandu kiewe namwe khumura mu siboe.”

²⁷Esira aloma ali, “Wele Omunyali Owa Bioosi afume, Wele owe bakuuka befwe! Owara sisiindu nga sino siri mu mwoyo kwo mwami, khuelesia lukoosi enju eya Wele Omunyali Owa Bioosi eli mu Yerusalemu.

²⁸Lundi khulwe kumwalaalo kwa Wele namalile khusiimwa no mwami, ne bakeleki bewe, ne babemeelesi bewe be bunyali boosi. Sikila Wele Omunyali Owa Bioosi, Wele wase anjeetanga, nanyalile khubuusia babemeelesi be chikholo cha Isiraeli khukhwicha ne nase.”