Read lubukusu Esr. 8 Bible Online

Esr. 8 - lubukusu bible

Esr. 8

¹Kano kali kamasina ke babemeelesi be chinju ne lisaaye liabwe nga baama mu mbaambe mu Babiloni ne Esira mala bakobola Yerusalemu mu biise bie khukhwamiia khwo mwami Aritashasita.

²Kerishoni, wenju eya Fineasi, Danieli, wenju eya Itamari. Hatushi, wenju eya Daudi,

³Sakaria, wenju eya Paroshi, ne babaandu be siseecha emia ndala ne kamakhumi karaano ba baandikwa be sikuuka siabwe.

⁴Eliehoenai okhwa Seraya, wenju eya Pahati-moabu, ne babaandu chimia chibili,

⁵Shekania okhwa Yahasieli, wenju eya Satu, ne babaandu chimia chitaru.

⁶Ebeti okhwa Yonasani, wenju eya Atini, ne babaandu kamakhumi karaano.

⁷Yesiaya okhwa Atalia, wenju eya Elamu, ne babaandu kamakhumi saba.

⁸Sabatia okhwa Mikaeli, wenju eya Shefatia, ne babaandu kamakhumi munaane.

⁹Obadia okhwa Yehieli, wenju eya Yoabu, ne babaandu chimia chibili ne ekhumi na munaane.

¹⁰Shelomoti okhwa Yosifia, wenju eya Binui, ne babaandu emia ndala ne kamakhumi sita.

¹¹Sakaria okhwa Bebai, ne babaandu kamakhumi kabili na munaane.

¹²Yoanani okhwa Hakatani, wenju eya Asikati, ne babaandu emia ndala ne ekhumi.

¹³Elifeleti, Yeueli, ne Shemaya abano nibo ba okhwa Atonikamu, ne babaandu kamakhumi sita (bakobola lwa nyuma).

¹⁴Usi ne Sakuri, wenju eya Bikibai (Sabuti), ne babaandu kamakhumi saba.

¹⁵Nababuusia khu luuchi lulwikha mu lukoba lwa Ahava, mala khwapa ekambi ebweeneyo khu ndaalo chitaru. Nga ne namenieelesia babaandu ne basaayi, se nabonamo Balawi tawe.

¹⁶Nio narumania banaangile Elieseri, ne Arieli, ne Shemaya, ne Elinasani, ne Yaribu, ne Elinatani, ne Nasani, ne Sakaria, ne Meshulamu. Lundi nalaanga Yoyaribu ne Elinasani, babaandu be limanya.

¹⁷Nabaruma khu mwimeelesi Ido, owaba omwimeelesi owe sirekere sie Kasifia, nababoolela niko bakhoyela baboolele Ido ne bawandaaye, baba bakholi be mu Lukaangu mu Kasifia. Benyekha bakhurumire babaandu bakhola munju eya Wele wefwe.

¹⁸Ne khulwe kumwalaalo kwa Wele, bakhurumira Sherebia, omundu omukesi, khukhwama munju eya Mahili owe kholo eya Lawi okhwa Isiraeli. Echa ne babaana bewe be siseecha ne bawandaaye boosi alala baba ekhumi na munaane.

¹⁹Lundi barumania Hasiabia ne Yeshaya be owa Merari, alala ne balebe babwe, boosi alala baba kamakhumi kabili.

²⁰Khutasakho babayo bakholi be mu Lukaangu chimia chibili ne kamakhumi kabili nibo Daudi ne babemeelesi bewe barobora khuyeeta Balawi. Bano boosi baandikwa kamasina.

²¹Nio abwenao, a luuchi lwa Ahaba nalaka lilieyimana lie siakhulia, nio khwiboombie fwabeene ebweeni wa Wele wefwe. Khwakhola khurio nio khumusabe niye akhuraangirire khu lukeendo lwefwe mala akhuliinde efwe ne babaana befwe alala ne kimiaandu kiefwe kioosi.

²²Sikila naba ne chisoni khusaba omwami sipupu sie banamae ne batimia chifarasi khukhuliinda efwe khukhwama khu basiku be khu ngila. Khwaba khwabooleele omwami khuli, “Kumukhono kwa Wele wefwe kuli kumulayi khu boosi bamuyiima niye, ne kamaani ke burafu bwewe kali khu boosi bamwekaana niye.”

²³Nono khweyimana siakhulia mala khwasaba Wele khulwe khukhuliinda efwe, mala aulila lisaba liefwe.

²⁴Nio naulamo basaayi babemeelesi ekhumi na babili: Sherebia, ne Hasiabia, ne balebe babwe ekhumi.

²⁵Nabapimila efwesa ne esahabu, ne biianwa bie nju eya Wele nibio omwami, bakeleki bewe ne babemeelesi, ne babaandu ba Isiraeli bamala khuaana.

²⁶Nabapimila efwesa chitani kamakhumi kabili na chibili ne bibiindu bie efwesa emia ndala ne busiro bwabio bwoola chikiilo kamakhumi saba ne esahabu chikiilo chielefu chitaru ne chimia chine

²⁷bibuumba bie esahabu kamakhumi kabili busiro bwabio bwoola chikiilo munaane ne bibiindu bibili bie kumukasa bing'enang'ena, bilekhaana ne bukusi bwe bibuumba bie esahabu.

²⁸Nababoolela ndi, “Enywe muli batakatifu ba Wele Omunyali Owa Bioosi, Wele we bakuuka benywe. Akhaba bibiindu bie esahabu ne efwesa bireerwa khu niye nga biianwa bie khukhwirusia bioosi bili bitakatifu.

²⁹Biliinde bwitelembefu khukhwola nga ne bipiimilwa ebweeni we basaayi ne Balawi ne babemeelesi be Baisiraeli mu Yerusalemu musiro chenju eya Wele Omunyali Owa Bioosi.”

³⁰Nio basaayi ne Balawi babukula efwesa, ne esahabu, ne bibiindu bibiaba ne bipiimilwe, babireera mu Yerusalemu, mu Lukaangu lwa Wele wefwe.

³¹Nio khwama a luuchi lwa Ahava endaalo eye likhumi na chibili eye kumwesi kunyoa, ne khucha e Yerusalemu. Wele aaba ne nafwe mala akhuliinda khukhwama khu basiku ne naabo ba baaba ne bakhwikhiina khu ngila ne khulikho khucha.

³²Khwola mu Yerusalemu mala khwaola khu ndaalo chitaru.

³³Nio khu ndaalo eya khane, khwacha munju eya Wele, khwapiima busiro bwe efwesa, ne esahabu, ne bibiindu, mala khwabiakanisia omusaayi Meremoti, okhwa Uria. Aaba ne Eliesa okhwa Fineasi ne Balawi babili, Yosabati okhwa Yoshua, ne Noadia okhwa Binui.

³⁴Buli siindu siabalwa mala siapiimwa busiro bwasio, mala busiro bwa buli siindu bwaandikwa.

³⁵Mu biise ebio babaandu babakobola khukhwama mu mbaambe, bareera biianwa bie khukhwosia khu Wele owa Isiraeli. Baana chiuunwa ekhumi na chibili khulwe Isiraeli yoosi, kamamiiku kamakhumi tisa na sita, kamameeme kamakhumi saba na saba. Lundi baana chindurume ekhumi na chibili. Bino bioosi baana nga chimbosio che khukhwosia khu Wele Omunyali Owa Bioosi khulwe khukhwetakaasa.

³⁶Bosi babukula ebarwa niyo omwami oyo aabaelesia mala bakielesia babaami bakeekhe ne babemeelesi be sibala sie engelekha we luluuchi lwa Efurati, nio nabo baana buyeeti khu baandu be nju eya Wele.