Read lubukusu Esr. 9 Bible Online

Esr. 9 - lubukusu bible

Esr. 9

¹Enyuma wakano koosi ne kamalile khukhwikholekha, babemeelesi be Baisiraeli banjichakho mala bamboolela bali, “Baisiraeli, basaayi, ne Balawi basiili khweyaula khukhwama khu baandu be bibala bibiababotookhelela ne bikholwa biabwe bisinyisia tawe. Bakheyaula khukhwama khu Baamoni, Bamoabu, ne Bamisiri, namwe khukhwama khu Bakanaani, khu Bahiti, khu Baperisi, khu Bayebusi, ne khu Baamori tawe.

²Bayaudi bakhweele balala khu bakhaana be chikholo chino khuba bakhasi babwe khu beene ne khu baana babwe be sisoleeli. Nono ekholo endakatifu endobore yatubaanile ne babaandu be bibala. Lukali babemeelesi ne babaami nibo bakhasuubilwa tawe.”

³Nga ne naulila kano, natabulaka chingubo chase ne kanjo yase, nekhubeka lichuune ne bunwanwa, mala nekhala ne niuunamiile.

⁴Nekhala ne niuunamiile, khukhwola mu siise sie mbosio eye kolooba. Babaandu boosi baria niko Wele owa Isiraeli aaloma khuloondekhana ne khutaamba busuubilwa bwe babaandu babakobola khukhwama mu mbaambe nga becha niio naba.

⁵Nga siise ne siola sie embosio eye kolooba, nenyokha niio naba ne nikhaale ne niyimaane siakhulia, ne chingubo ne kanjo biase bitabukhake. Nasikama nasaba Wele Omunyali Owa Bioosi, Wele wase nesutile kamakhono kase angaaki.

⁶Naloma ndi, “Ee Wele, ndi ne chisoni chingali khukhwima ebweeni wowo. Sikila bumayaanu bwefwe bwaniinile bwabirire kimirwe kiefwe mala bwolile mu ngaaki.

⁷Khukhwama mu ndaalo che bakuuka befwe khukhwola luno, efwe babaandu bowo, khwakhola bumayaanu bukali. Sikila bumayaanu bwefwe, Efwe, ne babaami befwe, ne basaayi befwe khwamalile khukwa mu bunyali bwe babaami bakeni, mala khwirwa, khuambwa, khunuulwa. Khusiambwa chisoni khukhwola luno.

⁸Khulwe siise sisiimbi sino, Wele Omunyali Owa Bioosi, Wele wefwe eekesie siisa khwifwe owakhukholile efwe khwarama ano, lundi aakhua bubweyaangu abuundu atakatifu wewe, nio akhole chimoni chefwe chibone lukali ne khukhuelesia limenya mubunasioobi.

⁹Khuli banasioobi, ne kakhali Wele ewe se wakhwibiliile mu bunasioobi bwefwe tawe. Wakhola babaami ba Pasha khukhukholela siisa. Lundi bakhufukiilila khwamenya ne khukhwombakha enju eya Wele, ne khung'oona bubwatechukha, ne khunyoola kumuleembe mu Yuda ne mu Yerusalemu.

¹⁰“Ee Wele wefwe, luno khuloma khuli siina enyuma wakano koosi? Khwalekha kamalaka kowo

¹¹niko wakhuelesia khubirira khu bakholi bowo, bang'oosi. Bakhuboolela bali, ‘Sibala nisio mulikho mucha khubukula sianyaalutisibwa, sikila babaandu ba basimenyamo bakhola bumayaanu. Ne bikholwa biabwe bisinyisia banyaalutia sibala buli abuundu.

¹² Khwako, mukhafukiilila babaana benywe bakhwana nabo tawe, Mukhekoomba kumuleembe ne buiinda bwabwe tawe. Khola murio nio mube ne kamaani mala mulie bilayi bie mu sibala sino mala lundi lisaaye lienywe khulwa mindali.’

¹³Ne kano koosi kekholekha khwifwe sikila bikholwa biefwe biibi. Kamamayaanu kefwe kali kamakali. Khwaboone khuli ewe, Wele wefwe, wakhuelesie kumunaanio kumukeekhe busa khukhila nga bumayaanu bwefwe bwenyekhana. Lundi walekhile khwifwe balamu.

¹⁴Nono khwama khuriena khwalekelesia kamalaka kowo mala khwakhwaana ne babaandu bamayaanu bano? Khwaaba ne khukhola khurio se ocha khukhubonela bubi lukali mala okhubunisilie elala tawe ku?

¹⁵Ee Wele Omunyali Owa Bioosi, Wele owe Baisiraeli, ewe oli ng'ali, sikila efwe nifwe khukhwebachile khwarama khukhwola luno. Khweyama bumayaanu bwefwe khwiwe. Se khuli na ng'ali khukhwima ebweeni wowo tawe sikila kano.”