Read lubukusu Neh. 1 Bible Online

Neh. 1 - lubukusu bible

Neh. 1

¹Chino nicho chilomo cha Nehemia okhwa Hakalia. Mu mwesi kwe Kisilefu, mu mwiiko kwe kamakhumi kabili naba mu lukoba luboofu lwa Susa.

²Hanani, mulala khu bawandaayase ola khukhwama e Yuda alala ne sipupu sie babaandu be siseecha babaandi. Ne abareeba khuloondekhana ne Yerusalemu ne khu Bayuda babaona khukhwama mu[1] mbaambe e Babiloni.

³Bamboolela bali, “Abo babarama mu lukoongo[2] babelukha embaambe bali mu butinyu bukali ne chisoni. Lisiisi lia Yerusalemu liatechukha; ne bilibwa biayo bionakwa ne kumulilo.”

⁴Nga ne naulila kamakhuwa kano, nekhala asi mala nalila. Nalila khu ndaalo chingali. Nachilila khusila khulia ne khusaba ebweeni wa Wele owe mwikulu.

⁵Naloma ndi, “Ee, Wele Omunyali Owa Bioosi, Wele owe mwikulu, Wele Omukali lundi owe khuukia, ewe oliinda endakaano yowo ne khuba ne busiime bwa buli lwoosi khwaabo ba baakhusiima ne khuliinda kamalaka kowo.

⁶Rekeeresia mala obone, lisaba lio omukholi wowo nilio ndikho esaba ebweeni wowo siilo ne kumuusi. Esabila bakholi bowo, babaandu ba Isiraeli. Niyama bumayaanu bwefwe nibwo khwakhukholela. Ee, ese ne be nju yefwe khwakholile bumayaanu.

⁷Khwakhukholele kamamayaanu lukali. Se khwaliinda kamalaka niko walaka omukholi wowo Musa tawe.

⁸ Khebulila niko walaka omukholi wowo Musa oli, ‘Enywe mwalekha khuba babeyikinwa ta, nja khumusalanisia mu kholo chichiindi.

⁹Ne kakhali mwaba ne mungalukhila mala muliinde kamalaka kase nja khumukobosia abuundu niio narobora khukhunjisaayilao, mwakhaba ne mwasalanila mwiloba lioosi.’

¹⁰“Bali bakholi bowo, lundi babaandu bowo nibo ewe wasikula ne bunyali bwowo bukali, ne kamaani kowo.

¹¹Ee Wele Omunyali Owa Bioosi, rekeeresia lisaba lio mukholi wowo, ne lisaba lie bakholi bowo babasiima khuba ne buriaani khwiwe. Ana bukhili khu mukholi wowo, mala okhole omwami akholele siisa.” Nono ese naba omusuti owe sikoombe sio omwami.