Read lubukusu Neh. 11 Bible Online

Neh. 11 - lubukusu bible

Neh. 11

¹Babemeelesi be babaandu baba bamenya mu Yerusalemu. Ne babaandu babaandi baapa chikura khurobora omundu mulala khukhwama mu buli babaandu likhumi bache bamenye mu lukoba lwa Yerusalemu, lukoba lutakatifu. Ne tisa babarama bamenya mu chingoba chabwe.

²Babaandu babiita chikhabi abo babeaana khumenya mu Yerusalemu.

³ Abano nibo babemeelesi be birekere ba baamenya mu Yerusalemu: Balala bamenya mu mikuunda kiabwe mungoba cha Yuda: Baisiraeli, basaayi, Balawi, bakholi be mu Lukaangu ne lisaaye lie bakholi ba Solomoni.

⁴Lisaaye liliindi lia Yuda ne Benjamini liamenya mu Yerusalemu. Be kholo eya Yuda baba: Ataya, okhwa Usia. Ne Usia aba okhwa Sakaria. Sakaria aba okhwa Amaria. Amaria aba okhwa Shefatia, omwana owa Mahaluleli. Mahaluleli aba lisaaye lia Peresi.

⁵Maaseya aba okhwa Baruku lundi omwichukhulu owa Kolihose. Ne Kolihose aba okhwa Hasaya. Hasaya aba okhwa Adaia okhwa Yoyaribu. Yoyaribu aba okhwa Sakaria, khukhwama e Sheela.

⁶Lisaaye lia Peresi liliamenya mu Yerusalemu lioosi liaba chimia chine ne kamakhumi sita na munaane.

⁷Be kholo eya Benjamini baba: Salu okhwa Meshulamu lundi omwichukhulu owa Yoedi. Yoedi aba okhwa Pedaya. Pedaya aba okhwa Kolaya. Maaseya aba okhwa Itieli ne Itieli aba okhwa Yeshaya.

⁸Babaloondakililakho baba Sabai ne Salai, balebe be aembi Salu. Boosi alala, Babenjamini baba chimia tisa ne kamakhumi kabili na munaane ba baamenya mu Yerusalemu.

⁹Yoeli okhwa Sikiri aba omwimeelesi wabwe, ne Yuda okhwa Hasenua aba omwimeelesi Omukhulu owa khabili mu bwimeelesi bwe lukoba.

¹⁰Basaayi babengila mu Yerusalemu baba: Yedaya okhwa Yoyaribu ne Yakini,

¹¹Sereya okhwa Hilikia lundi omwichukhulu owa Meshulamu. Meshulamu aba okhwa Satoki, Satoki aba okhwa Merayo, ne Merayo aba okhwa Ahitubu, owaba Omusaayi Omukhulu Lukali.

¹²Babao balebe babwe babaandi babakholanga munju eya Wele Omunyali Owa Bioosi. Baba boosi chimia munaane ne kamakhumi kabili na babili. Babaandi baba Adaia okhwa Yerohamu lundi omwichukhulu owa Pelalia. Pelalia aba okhwa Amushi, Amushi aba okhwa Sakaria, Sakaria aba okhwa Pashuri, ne Pashuri aba okhwa Malichiya.

¹³Balebe bewe boosi babemeelela chinju baba chimia chibili ne kamakhumi kane na babili. Lundi abao Amashisai okhwa Asareli omwichukhulu owa Asai. Asai aba okhwa Meshilemoti ne Meshilemoti aba okhwa Imeri.

¹⁴Alala ne bawandaaye, boosi baba babaandu emia ndala ne kamakhumi kabili na munaane, banamae be kamaani. Omwimeelesi wabwe aaba Sabudieli okhwa Hakedolimu.

¹⁵Balawi baba: Shemaya okhwa Hasubu lundi omwichukhulu owa Asirikamu. Asirikamu aba okhwa Hashabia ne Hashabia aba okhwa Buni.

¹⁶Shabetai ne Yosabati, baba Balawi bakhulu babemeelelanga kimilimo kie mu Lukaangu.

¹⁷Abao lundi Matania okhwa Mika. Mika aba okhwa Sabuti lundi omwichukhulu owa Asafu. Arangiriranga babembi be kimienya mu Lukaangu mu lisaba lie lisiima. Oloondela Matania, aba Bakibukia. Lundi abao Abuda, okhwa Shamu lundi omwichukhulu owa Kalali, lisaaye lia Yedutuni.

¹⁸Balawi chimia chibili ne kamakhumi munaane na bane bamenya mu lukoba lutakatifu lwa Yerusalemu.

¹⁹Babemeelesi be bilibwa bie Lukaangu baba: Akubu, Talimoni, ne balebe babwe. Boosi alala baba emia ndala ne kamakhumi saba na babili.

²⁰Baisiraeli babaandi ne basaayi, ne Balawi babarama, bamenya mu mikuunda kiabwe mu chingoba choosi cha Yuda.

²¹Bakholi be mu Lukaangu bamenya abuundu alaangwa Ofeli mu Yerusalemu asi owa siha ne Kishipa.

²²Omwimeelesi we Balawi mu Yerusalemu aba Usi okhwa Bani lundi omwichukhulu owa Hashabia. Hashabia aba okhwa Matania ne Mika, Matania aba okhwa Mika ne Mika aba owe kholo eya Asafu. Abano Baba ne kimilimo kie khukhwimba kimienya mu Lukaangu.

²³Liabao lilaka khukhwama khu mwami khuloondekhana ne babembi be kimienya mu Lukaangu buli ndaalo.

²⁴Petahiya okhwa Meshesabeli, aba omulomalomi owo mwami. Meshesabeli aba owe lisaaye lia Sera okhwa Yuda.

²⁵Babaandu balala ba Yuda bamenya mu chingoba chili embi ne kimikuunda kiabwe. Bamenya mu Kiriati-Ariba ne birekere biayo, Diboni, Yakabuseeli, ne mu birekere bibili biacho.

²⁶Lundi bamenya mu chingoba cha Yeshua, Molata, ne Beti-peleti.

²⁷Bamenya mu Hasari-shueli, mu Beerisheba ne birekere bibiachibotookhelela.

²⁸Bamenya mu lukoba lwa Sikilaki, mu Makona ne mu birekere biacho.

²⁹Bamenya akhaba mu Enirimoni, mu Sora, ne mu Yarimuti.

³⁰Mu Sanoa, mu Adulamu, ne mu birekere bie aembi ne chingoba chino. Bamenya mu Lakishi ne mu mikuunda kili aembi, ne mu Aseka ne birekere biasio. Nono Bayuda bamenya mu sibala sia Beerisheba khukhwola khu Litooma lia Hinomu.

³¹Babaandu be kholo eya Benjamini bamenya mu Keba, Mikimashi, Aiya, Beteli, ne mu birekere bie aembi.

³²Lundi bamenya Anatoti, Nobu, ne Anania.

³³Hasori, Rama, ne Kitaimu.

³⁴Hadidi, Seboimu, ne Nebalati,

³⁵Lodi, Ono, ne mu litooma lie bafundi.

³⁶Bipupu bibiindi bie Balawi ba baamenya mu sibala sia Yuda babakabania khumenya alala ne babaandu ba Benjamini.