Read lubukusu Neh. 12 Bible Online

Neh. 12 - lubukusu bible

Neh. 12

¹Kano niko kamasina ke basaayi ne Balawi babakobola khukhwama mu mbaambe alala ne Serubabeli okhwa Shealitieli no musaayi Omukhulu Yoshua. Basaayi baba: Seraya, Yeremia, Esira;

²Amaria, Maluki, Hatushi;

³Shekania, Harimu, Meremoti;

⁴Ido, Kinetioni, Abicha;

⁵Miyamini, Maadiya, Bilikai;

⁶Shemaya, Yoyaribu, Yedaya;

⁷Salu, Amoki, Hilikia, ne Yedaya. Bano baba babemeelesi mu basaayi basiaabwe boosi mu ndaalo cha Yeshua.

⁸Ne Balawi baba: Yeshua, Binui, Kadimieli, Sherebia, Yuda, ne Matania bano boosi baba babemeelesi be kimienya kie khusiima.

⁹Ne Bakibukia, Uno, ne Balawi basiaabwe bang'oona kimienya kie khukhwakanila.

¹⁰Yoshua aba raraawe owa Yoyakimu; Yoyakimu aba raraawe owa Eliashibu; Eliashibu aba raraawe owa Yoyada;

¹¹Yoyada aba raraawe owa Yonasani; ne Yonasani aba raraawe owa Yadua.

¹²Yoyakimu nga ne aba Omusaayi Omukhulu Lukali, basaayi baloondakho ba baaba nibo babemeelesi be chikholo che busaayi: Meraya wenju eya Seraya; Hanania, wenju eya Yeremia;

¹³Meshulamu, eya Esira; Yehohanani, wenju eya Amaria;

¹⁴Yonasani, wenju eya Maluki; Yosefu, Shefania;

¹⁵Adina, wenju eya Harimu; Helikai, wenju eya Meraioti;

¹⁶Helikai wenju eya Meraioti, Sakaria wenju eya Ido, Meshulamu wenju eya Kinetioni,

¹⁷Sikiri, wenju eya Abia, Miyamini, Pilitai wenju eya Maodia;

¹⁸Shamua, wenju eya Bilikai, Yehonatani, wenju eya Shemaya;

¹⁹Matenai, wenju eya Yoyaribu; Usi, wenju eya Yedaya;

²⁰Kalai, wenju eya Salai, Eberi, wenju eya Amoki;

²¹Hashabia, wenju eya Hilikia; ne Natanieli, wenju eya Yedaya.

²²Kamasina ke babemeelesi be chinju che Balawi ne basaayi kaandikwa mu biise bia Eliashibu, Yoyada, Yoanani, ne Yadua. Biise ebio Dario aba omwami owa Pasha.

²³Babemeelesi be lisaaye lie Balawi, baandikwa mu sitabu sie chingano che Babaami khukhwola mu biise bia Yoanani, okhwa Eliashibu.

²⁴Ne babemeelesi be Balawi baba: Hashabia, Sherebia, Yeshua, ne Binui[8] okhwa Kadimieli, ne balebe babwe. Bipupu bibili buli siise biafumia Wele ne khumusiima, khuloondekhana ne kamekisio niko baebwa no mundu owa Wele, omwami Daudi.

²⁵Balindi be Lukaangu babaliinda chisiro che sirara mu bilibwa bie Lukaangu baba: Matania, Bakibukia, Obadia, Meshulamu, Talimoni ne Akubu.

²⁶Babaandu bano babao mu siise sia Yoyakimu, okhwa Yeshua lundi omwichukhulu owa Yosataki. Ne lundi babao mu siise sio muruki Nehemia, lundi mu siise sio musaayi Esira, owaba omuandiki owe Lilaka.

²⁷Mu siise sie khuaana lisiisi lie lukoba lwa Yerusalemu khu Wele, Balawi barerwa Yerusalemu khukhwama buli abuundu niio baba ne bamenya. Bakhola naikara eye liaana ne khusiima. Bemba kimienya kie khusiima ne baapa bibiindu bie khu khuupania alala mu mienya, kamatuungu, ne biilili.

²⁸Lisaaye lia Lawi lie babembi be kimienya liabuusiana khukhwama mu mbeka nimwo bamenyanga ambi ne Yerusalemu ne khukhwama mu birekere bia embi ne Netofati.

²⁹Lundi bama e Beti-Kilikali, Keba, ne Asimabeti. Babembi abo baba bombakha birekere biabwe ambi ne Yerusalemu.

³⁰Basaayi ne Balawi bekwalaasia babeene nio bakwalaasia babaandu, bilibwa, ne lisiisi lie lukoba.

³¹Nio nabuusia babemeelesi Ba Yuda khu ngaaki khwe lisiisi ne khubawa buliindi bwe bipupu biboofu bibili khukeenda khubotookhelela lukoba ne, khusiima Wele. Sipupu silala siacha khu ngaaki khwisiisi kumukhono kumuseecha luloleelela silibwa sie kamaandu[9]

³²Hoshaya akeendela enyuma wabwe ne balala khu bakhulu Ba Yuda bamuloondakho.

³³Babaloondakho baba: Asaria, Esira, Meshulamu,

³⁴Yuda, Benjamini, Shemaya ne Yeremia.

³⁵Basaayi balalakho baele baba ne chikhoombi: Sakaria, okhwa Yonasani lundi omwichukhulu owa Shemaya. Shemaya aba okhwa Matania. Matania aba okhwa Mikaya, ne Mikaya aaba okhwa Sakuri, ne Sakuri aaba okhwa Asafu.

³⁶Sakaria aloondakho ne babaandu babaandi be kholo yewe. Baba Shemaya, Asareli Milalai, Kilalai, Maai, Netaneli, Yuda, ne Hanani. Boosi baapa bibiindu bie kimienya bibiapibwa no mwami Daudi omundu owa Wele. Esira omuandiki akeendela ebweeni wabwe.

³⁷Bacha khukhwama asilibwa sie sebele baniina bukololofu khu bikiingi bacha khu ndeleelwa khwe Lukoba lwa Daudi. Khubirira anju eya Daudi, ne khukobola khwisiisi asilibwa sie kameechi, lubeka lwe bukwe we lukoba.

³⁸Sipupu sie khabili siabo babasiima siacha lubeka lukhasi khu lukhingiki lwe khu ngaaki khwe lisiisi. Mala nasiloondakho ne babaandu balalakho. Khwakeenda khwabirira khu ndeleelwa eye bibiosio khukhwola khu lisiisi libalaayi.

³⁹Ne khukhwama ebweeneyo khwacha khwabirira khu silibwa sia Efuraimu, silibwa sia Yeshana[10] silibwa sie Ng'eeni, endeleelwa eya Hananeli ne ndeleelwa eya Mia. Khwacha khukhwola khu silibwa sie kamakheese. Khwamaliilisila lukeendo lwefwe ambi ne silibwa sie baliindi.

⁴⁰Khwako bipupu bioombi biabo babasiima Wele biema munju eya Wele. Khutubakho ne balala khu bemeelesi ba baaba ne nase.

⁴¹Ne sipupu sie basaayi, sisiapa chikhoombi siabamo: Eliakimu, Maaseya, Miniamini, Mikaya, Elioenai, Sakaria, ne Hanania.

⁴²Babaandu babaandi ba babayo baba: Maaseya, Shemaya, Eliesa, Usi, Yehohanani, Malichiya, Elamu, ne Eseri. Babembi, bemba kimienya ne bemeelelwa ne Yesirahia.

⁴³Endaalo ng'eneyo babaandu baana chimbosio chingali mala baba ne busangaafu sikila Wele abaelesia basangaafu bukali. Bakhasi ne babaana batubaana mu khufumia. Ne luyoka lwe busangaafu mu Yerusalemu lwauliilikhana aleeyi.

⁴⁴Mu siise sienesio babaandu baroborwa khuliinda birara. Birara bino biaba bie khubikhamo biianwa, bibiaamo bie khunyoa, ne sitonyi sie khumi sie babaandu. Babaandu bano baba ne bunyali bwe khuroosia khukhwama mu mikuunda kili mu chingoba chichaukhaane khulwe basaayi ne Balawi khuloondekhana ne lilaka. Babaandu Ba Yuda boosi basangalila khukholela basaayi ne Balawi ba babakholelanga.

⁴⁵ Bakhola kimilimo kia Wele wabwe kie khukhwikwalaasia. Babembi ne baliindi be mu Lukaangu bosi bakhola kimilimo kiabwe khuloondekhana ne kamalaka niko omwami Daudi no mwana wewe Solomoni balaka.

⁴⁶Mu siise sio mwami Daudi ne omwiimbi owe kimienya Asafu khale akho, abao omwimeelesi owe babembi owemeelelanga kimienya kie khufumia ne khusiima Wele.

⁴⁷Mu biise bia Serubabeli akhaba ne mu biise bia Nehemia, Baisiraeli boosi baana biianwa bia buli ndaalo khulwe buyeeti bwe babembi be kimienya ne baliindi be Lukaangu. Lundi baukhasia bitonyi bie Balawi. Ne Balawi nabo baukhasia sitonyi sisienyibwa khuelesibwa be lisaaye lia Aruni.