Read lubukusu Neh. 13 Bible Online

Neh. 13 - lubukusu bible

Neh. 13

¹ Khu ndaalo eyo basomela babaandu khukhwama mu sitabu sia Musa. Banyoolamo abuundu aloma ali mbao Omuamoni namwe Omumoabu ofukiililwa khutubaana ne babaandu ba Wele mu lisaaya tawe.

² Lino liaba lirio sikila babaandu ba Amoni ne ba Moabu se bawa Baisiraeli siakhulia ne kameechi nga ne baba khu ngila ne bama e Misiri tawe. Ne kakhali bakula Balamu khulaama Isiraeli. Ne kakhaba kario Wele wefwe ayusia silaamo khuba chikhabi.

³Baisiraeli nga ne baulila lilaka lino ne lisomwa, barusia baakwa boosi khukhwama mu nibo.

⁴Kano ne kakhekholekha tawe, omusaayi Eliashibu, owaba omwimeelesi owe birara bie Lukaangu, aba auliilisiana ne Tobia.

⁵Afukiilila Tobia khurumikhira lusiro lulala lukali lwe sirara sie khubungamo biianwa bie bilimwa ne biiunya bulayi, biianwa bie bibiindu bie khurumikhira mu Lukaangu, biianwa khulwa basaayi, ne sitonyi sie likhumi sie bilimwa, endali, ne kamafura ke kumuseituni ke Balawi, khu bembi ne baliindi be Lukaangu. Lundi sirara esio siabiikhanga biianwa bie Basaayi.

⁶Kano koosi ne kekholekha ese se naba ne mu Yerusalemu tawe. Kekholekha mu mwiiko kwe kamakhumi kataru na kibili nikwo Aritashasita[11] abelakho omwami owa Babiloni naba nakobooleyo khumuboolela. Enyuma we siise sikeekhe nareeba omwami ndekukhe.

⁷Nga nakobola e Yerusalemu, nesiindukha khunyoola bumayaanu nibwo Eliashibu akhola khufukiilila Tobia khurumikhira lusiro lwe mu Lukaangu.

⁸Naambwa lirima likali mala namwaataka enje bibiindu bia Tobia bioosi.

⁹Nio narusia kamalaka bakwalaasie chisiro. Mala nakalusiamo bibiindu bie nju eya Wele Omunyali Owa Bioosi: biianwa bie biakhulia nende bie bibiindu biiunya bulayi.

¹⁰ Lundi nanyoola Babembi be kimienya mu Lukaangu ne Balawi baba barura mu Yerusalemu bakobola mu mikuunda kiabwe, sikila babaandu se babaelesianga kumukabwa kwabwe tawe.

¹¹Nekiicha babemeelesi ne khubareeba ndi, “Siina sikila ne mukhaliinda enju eya Wele Omunyali Owa Bioosi tawe?” Mala nakobosia Balawi ne babembi khu milimo kiabwe.

¹² Nio babaandu Baisiraeli boosi barakikha lundi khureera mu birara bie Lukaangu sitonyi sie khumi siabwe sie bilimwa, endali, ne kamafura ke kumuseituni.

¹³Narobora babaandu bano khukhwimeelela birara: Omusaayi Shelemia; omuandiki Satoki, ne omulawi Pedaya. Naelesia Hanani okhwa Sakuri, omwichukhulu owa Matania bunyali bwe khuba omuloondi wabwe. Babaandu bano baba babeyikinwa. Kimilimo kiabwe kiaba khukabila bakholi basiaabwe bikabwa.

¹⁴Khebulile ese, Wele wase, khulwe kimilimo kino kioosi. Okhalekelesia busiime bwase ne kimilimo khulwe Lukaangu tawe.

¹⁵ Mu biise bienebio nabona babaandu mu Yuda ne basuura kumuketu khukhwama mu misabibu mu ndaalo eya sabato. Babaandi baba basutile bilimwa, endali, chisabibu, chinduli ne bisutwa bibiindi khu punda chabwe ne babiila mu Yerusalemu khu ndaalo eya sabato. Nabakania balekhe khukusia sisiindu siosi siosi khu ndaalo eya sabato.

¹⁶Babaandu babaandi khukhwama mu lukoba lwa Tiro bamenyanga mu Yerusalemu. Bareera ching'eeni ne bibiindu bie khukusia mu Yerusalemu, ne babikusia khu baandu ba Yuda mu ndaalo eya sabato.

¹⁷Nio nekiicha babemeelesi Ba Yuda ne khubaboolela ndi; “Mulakholanga bumayaanu siina buno, ne mwonaka endaalo eye sabato?

¹⁸Bakuukawenywe se bakhola bari nio liakila Wele areera kumunaanio khwifwe ne khu lukoba luno? Mala musichiilililanga khumukhola abe ne lirima likali khu Isiraeli khulwe khukhwonaka endaalo eye sabato.”

¹⁹Khwako narusia kamalaka bilibwa bioosi bie lukoba bikalwe mu khurakikha khwa buli sabato, khukhwola ekolooba[12] Nara babaandu base babaandi mu bilibwa khuba nang'ali bali mbao siosi siosi sisutwa siareerwa mu lukoba mu ndaalo eya sabato tawe.

²⁰Lulala namwe khabili bakusi bakusia buli lukano lwe bibiindu bioosi bakona enje we lukoba lwa Yerusalemu.

²¹Nabakania ndi, “Siina sikila ne mukona khwisiisi lie lukoba? Mwakhola murio lundi, nja khumutimania ne kamaani.” Nio khukhwamila ao se bakobolakho lundi mu ndaalo eye sabato tawe.

²²Nalaka Balawi khukhwikwalaasia babeene nio bache mala balinde bilibwa khuba nang'ali bali e sabato eli endakatifu. Khebulile, ese Wele, mu kano koosi, mala ukholele siisa sikila busiime bwowo bukali.

²³ Mu biise bienebio nabona Baisiraeli ba bakhwa bakhasi khukhwama Ashitoti, Amoni, ne Moabu.

²⁴Balala khu baana babwe balomalomanga lulomo lwa Ashitoti namwe lulomo luluundi busa ne se banyala khulomaloma lulomo lwe Bayaudi tawe.

²⁵Nalomana ne babaandu abo, nabalaama, naapa babaandi mala nabakhunyulaka lichuune liabwe. Nio nabakhola bechuba mu lisina liowo Wele bali “Mukhaelesia basoleeli babwe bakhaana benywe namwe mwaelesia basoleeli benywe bakhaana babwe tawe.

²⁶ Bakhasi bakwa nibo babakhola omwami Solomoni akhola bumayaanu. Se aabaao omwami okundi mu bibala bioosi nga niye tawe. Wele amusiima mala amukhola niye omwami owa Isiraeli yoosi. Kakhaba kario, bakhasi bakwa bamukhola onaka.

²⁷Ne enywe ne mukhola bumayaanu nga buno aba se muli bari tawe. Ne mukhwa bakhasi bakwa aba se muli basuubilwa khu Wele wefwe tawe.”

²⁸ Yehoyata okhwa Eliashibu aba Omusaayi Omukhulu Lukali. Ne mulala khu basoleeli bewe akhwa omwana owa Sanibalati, khukhwama mu lukoba lwa Horoni. Khwako namutimania.

²⁹Khebulila, Ee Wele, sikila babaandu abo banyaalutia busaayi alala ne ndakaano niyo wakhola ne basaayi ne Balawi.

³⁰Khwako nakwalaasia babaandu khukhwama mu buli sisiindu sikeni. Nara basaayi ne balawi khu milimo, nio buli sia mulala amanye kamulimo kwewe.

³¹Narekekha chiikhu chirumikha khulwe khukhwosiela biianwa birerwa khu alutare buli lwoosi mu biise bibienyibwa. Lundi naba na ng'ali ndi bimelwa biabwe bie khunyoa biareribwe. Khebulila kano koosi, Ee Wele, mala ukholele bulayi.