Read lubukusu Neh. 2 Bible Online

Neh. 2 - lubukusu bible

Neh. 2

¹Mu mwesi kwa Nisani, kumwiiko kukhola kamakhumi kabili mu bwami bwa Aritashasita endali yareerwa ebweeni wo omwami. Nabukula endali naelesia omwami. Nono abeele ekhasulunyakho ebweeni wewe tawe.

²Nio omwami andeeba ali, “Siina sikila ne osuluunye mala se olikho olwala ta? Okhuno khuli khubiililwa khwe kumwoyo.” Mala naria lukali.

³ Naboolela omwami ndi, “Omwami oyindile! Siina sikila endekhe khusulunya kaba bali lukoba nimwo bakuuka base basiikhwa lwonakwe ne bilibwa bialwo biosebwa ne kumulilo?”

⁴Omwami andeeba ali, “Wenya sinaanu?” Nio nasaba Wele owe mwikulu.

⁵Naboolela omwami Aritashasita endi, “Liaaba ne lisiimisia omwami ne naaba ne enyoola siisa ebweeni wowo, ndekhe enje mu sibala sia Yuda, mu lukoba nimwo bakuuka base basiikhwa, mala ndwombakhe lundi.”

⁶Nio omwami andeeba ali (Kwini yesi aaba amwikhaaleo), “Okhamaleyo siise siina ne olikobola liina?” Nono liasiimisia omwami enje, mala namua biise.

⁷Nio naboolela omwami ndi, “Liaaba ne likhusiimisia mbe chibarwa embilile babemeelesi be lukoongo[3] lwe lubeka lwe mumbo ne oli khu luuchi lwa Efurati nio bafukiilile mbire nole mu sibala sia Yuda.

⁸Lundi mbe ebarwa mbilile Asafu, omuliindi owe kimisiru kio mwami, ambelesie kimirongooro kie khukhola bilibwa bie lukoba luliinda Lukaangu, ne kamasiisi ke lukoba, ne enju niyo nja khumenyamo.” Omwami Aritashasita ambelesia nibio namusaba, sikila Wele aba ne nase.

⁹Nacha naelesia babemeelesi be lukoongo ebweeni we luluuchi lwa Efurati chibarwa cho mwami. Omwami aba anduma ne babemeelesi be banamae nende be chifarasi.

¹⁰Ne kakhali Sanibalati, khukhwama mu lukoba lwe Beti-horoni, ne Tobia, omukholi owe mu sibala sia Amoni, baulila kano, liababeelesia lukali. Liababeelesia khuulila bali omundu echile khukholela Isiraeli kamalayi.

¹¹Nio nacha e Yerusalemu, mala nabayo khu ndaalo chitaru.

¹²Nio nenyokha mu silo, ne babaandu batiiti bari; ne se naboolelakho omundu yesi yesi nilio Wele ara mu mwoyo kwase khukholela Yerusalemu ta. Esaang'i ekiindi se yabakhowo ta ne ekhali epunda niyo naninakho yong'ene.

¹³Narura silo nabirira mu Silibwa sie Litooma khukhwola khu sebele eye endemu khukhwola khu Silibwa sie Kamasisie. Naloleelesia kamasiisi ka Yerusalemu kakatechukha ne bilibwa bialwo bibiosebwa ne kumulilo.

¹⁴Nio nacha khu Sebele eye Silibwa ne Litiisi lio mwami. Ne kakhali epunda niyo naba nayo se yanyala khunyoola engila yosi yosi khubirirakho ta.

¹⁵Narura mu silo nabirira mwitooma, naloleelesia lisiisi. Nio nakobola nelayo khubirira e Silibwa sie Litooma.

¹⁶Babemeelesi se bamanya niio njile namwe nisio naba ne ekhola ta. Lundi yaba esili khuboolelakho Bayaudi basaayi, bakoosi ne babemeelesi ne babaandi boosi babenyekhana khukhola kumulimo.

¹⁷Nio nababoolela endi, “Lola butinyu nibwo khulimo, nga lukoba lwa Yerusalemu ne lwonakibwe ne bilibwa bialwo biosebwa. Yiicha khwombakhe lisiisi lie lukoba lwa Yerusalemu mala khwirusiekho chisoni.”

¹⁸Nababoolela nga Wele ne anjeeta, ne kamakhuwa niko omwami Aritashasita amboolela. Nio baloma bali, “Lekha khwinyokhe mala khwombakhe lundi.” Beelesia kumwoyo khulwe khukhola kimilimo kimilayi.

¹⁹Ne kakhali nga Sanibalati Omuhoroni, Tobia omukholi Omuamoni owaba omwaraabu olaangwa Keshemu ne baulila niko khwerekekha khukhola, bakhuchekheelela mala bakhulekelesia ne baloma bali, “Siindu siina nisio mulikho mukhola sino? Mulikho muba bareengu khu mwami?”

²⁰Nio nabakobosia endi, “Wele owe mwikulu acha khukhukhola efwe khunyale. Efwe khuli bakholi bewe, khucha khwinyokha mala khwombakhe. Ne kakhali enywe se mulikho ne kumukabwa namwe sisienyekhana khuba sisienywe namwe likhebulilwa mu Yerusalemu ta.”