Read lubukusu Neh. 3 Bible Online

Neh. 3 - lubukusu bible

Neh. 3

¹Eliashibu Omusaayi Omukhulu Lukali ne basaayi basie benyokha bombakha[4] lundi Silibwa sie Kamakheese. Basiaula mala barakho kimiliango. Bombakha khukhwola lisiisi lie Njeko eye Mia ndala, ne khu lisiisi lie Njeko eya Hananeli mala balira alubeka khulwa Wele Omunyali Owa Bioosi.

²Babaandu ba Yeriko bombakha khuloonda khu niye. Ne Sakuri okhwa Imuri naye ombakha khuloonda khu baandu ba Yeriko.

³Ba okhwa Hasena bombakha Silibwa sie Ng'eeni. Basimikha kimitalaachi kiasio ne bilibwa abuundu abio, mala bara bikhomekho ne bibia bie khukhwikalilao silibwa.

⁴Owabaloondakho khukhwombakha aba Meremoti, okhwa Uria omwichukhulu Hakosi. Owamuloondela mu khwombakha aba Meshulamu okhwa Berekia omwichukhulu Meshesabeli. Enyuma wewe Satoki okhwa Baana ombakha.

⁵Babaandu ba Tekoa bombakha khuloonda khu Satoki. Ne kakhali babaandu be lukoosi ba Tekoa se berusia khukhola kimilimo tawe.

⁶Yoyada okhwa Pasea ne Meshulamu okhwa Besodeya bombakha lundi Silibwa Siikhale[5]. Basimikha kimitalaachi kiasio ne bilibwa mala bara bikhomekho ne bibia khukhwikalilao silibwa.

⁷Melatia khukhwama e Kibeoni, Yadoni khukhwama e Meronoti, ne babaandu ba Kibeoni ne Misipa bombakha khuloonda khu Yoyada okhwa Pasea. Babaandu ba Kibeoni ne Misipa bemeelelwa ne omuruki owe lukoongo ebweeni we luluuchi lwa Efurati.

⁸Babaloondakho baba Usieli okhwa Hariaya, omubasi. Ombakha sitonyi siloondakho. Owaloondakho mu khwombakha aba Hanania, omukholi owe kamafura kaunya bulayi. Bombakha lisiisi lia Yerusalemu khukhwola khu Lisiisi Libalaayi.

⁹Refaya okhwa Huri, omwami owe lubeka lulala lwe lukoongo lwa Yerusalemu, ombakha sitonyi siloondakho.

¹⁰Yedaya okhwa Harumafu ombakha sitonyi sisialoondakho sisiaba siimbi ne enju yewe. Hatushi okhwa Hashabuneya ombakha sitonyi sisialoondakho.

¹¹Malichiya okhwa Harimu ne Hashubu okhwa Pahati-moabu bombakha sitonyi sisiindi ne Enjeko eye Kamayika.

¹²Owamuloondela khukhwombakha Shalumu okhwa Haloheshi. Aba omwimeelesi owe lubeka lulala lwe lukoongo lwa Yerusalemu. Ombakha sitonyi esio alala ne bakhaana bewe.

¹³Hanuni ne bamenywa be mu lukoba lwa Sanoa bombakha lundi Silibwa sie Litooma. Basimikha bilibwa, barakho bikhomekho ne bibia khukhwikalilao silibwa, ne khukhwombakha lisiisi bikele eelefu ndala, khukhwola khu Silibwa sie kamasisie.

¹⁴Malichiya okhwa Rekabu, omwimeelesi owe lubeka lulala lwe lukoongo lwa Beti-hakikeremu, ombakha lundi Silibwa sie kamasisie. Asimikha bilibwa mala aramo bikhomekho ne bibia khulwe khukhwikalilao silibwa.

¹⁵Shalumu okhwa Kolihose, omwimeelesi owe lukoongo lwa Misipa, ombakha Silibwa sie kumusiingi. Asimikha bilibwa mala aramo bikhomekho ne bibia. Lundi ombakha lisiisi lie litiisi lia Sheba, lie siluundu sio mwami. Ombakha khukhwola bitoboko bibiikha asi khukhwama mu Lukoba lwa Daudi.

¹⁶Enyuma wewe, Nehemia okhwa Asibuki, omwimeelesi owe lubeka lulala lwe lukoongo lwa Beti-suri, ombakha sitonyi sisiindi. Ombakha khukhwola abuundu e siliindwa sia Daudi, a litiisi ne enju eye banamae.

¹⁷Enyuma wa Nehemia Balawi bombakha. Owanyoa aba Rehumu okhwa Bani. Owamuloondela aba Hashabiya. Omwimeelesi owe lubeka lulala lwe lukoongo lwa Keila. Ombakha khulwe lukoongo lwewe.

¹⁸Enyuma wewe bawandaaye bombakha. Baba Bavai okhwa Henadadi, omwimeelesi owe lubeka lulala lwe lukoongo lwa Keila.

¹⁹Owamuloondakho aba Eseri okhwa Yeshua, omwimeelesi owa Misipa. Ombakha sitonyi sisiindi ebweeni kumwikha a libiikhilo lie bulwaani mu koona.

²⁰Ne Baruku okhwa Sabai ombakha sitonyi sisiindi, khukhwama mu koona khukhwola khu muliango kwe enju eyo Omusaayi Omukhulu Lukali Eliashibu.

²¹Enyuma wewe Meremoti okhwa Uria lundi ne omwichukhulu owa Hakosi, ombakha sitonyi sisiindi. Ombakha khukhwama khu muliango kwe enju eyo Omusaayi Omukhulu Lukali Eliashibu khu ndulo khwe enju yewe.

²²Enyuma we Balawi basaayi be ekeewa bombakha.

²³Enyuma wabwe Benjamini ne Hashubu bombakha ebweeni we chinju chabwe. Enyuma wabwe. Asaria, okhwa Maseeya, omwichukhulu owa Anania, ombakha siimbi ne enju yewe omwene.

²⁴Enyuma wewe Benui okhwa Henadadi ombakha sitonyi sisiindi, khukhwama khu nju eya Asaria khukhwola khu koona.

²⁵Palali okhwa Usai ombakha siimbi ne ekhuumbo ne endeleelwa ebonekhela khu nju eyo omwami a luya lwe buliindi. Enyuma wewe Pedaya okhwa Paroshi ombakha.

²⁶Ne baliindi be Lukaangu ba baamenya khu Ofeli, bombakha khukhwola ebweeni we Silibwa sie Kameechi ne ebukwe ne endeleelwa ebonekha.

²⁷Enyuma we basaayi babaandu be Tekoa bombakha sitonyi sisialoleelela endeleelwa ebonekha khukhwola khu lisiisi lia Ofeli.

²⁸Angaaki we Silibwa sie Efarasi basaayi bombakha buli mulala ebweeni we enju yewe.

²⁹Enyuma wabwe Satoki okhwa Imeri ombakha ebweeni we enju yewe. Ne Shemaya okhwa Shekania, omuliindi owe silibwa sie ebukwe, ombakha; enyuma wewe.

³⁰Enyuma wewe Hanania okhwa Shelemia, ne Hanuni okhwa Salafu okhola sita, bombakha. Ne Meshulamu okhwa Berekia ombakha ebweeni we enju yewe.

³¹Enyuma wewe Malichiya, mulala khu babasi, ombakha khukhwola khu nju eye bakholi be Lukaangu ne eye babofuli ebweeni we Silibwa Siboofu ne lubeka lwe enju eye ngaaki we koona.

³²Babasi be bibia ne baboofuli bombakha sitonyi akari we lubeka lwe enju eye engaaki eye mu koona ne Silibwa sie Kamakheese.