Read lubukusu Neh. 4 Bible Online

Neh. 4 - lubukusu bible

Neh. 4

¹Sanibalati nga ne aulila ali khwaba khulikho khwombakha lisiisi, aambwa lirima mala akhalala lukali. Akhoma Bayaudi.

²Ebweeni we babaasie ne banamae ba Samaria aloma ali, “Bayaudi batekhele bano balikho bakhola siina kane bakalusie biindu nga biaba ku? Baliaana chimbosio ku? Balanyala khumala kumulimo mu ndaalo ndala ku? Balanyala khukhola kamabaale ke khukhwombakha khukhwama mu makiingwi ke kamaumbu kakaya ku?”

³Tobia Omuamoni aba amwimileo, mala amukobosia ali, “Ee, lisiisi nilio balikho bombakha, akhaba enjusi enyala yalitechula!”

⁴“Ulila, Ee Wele wefwe sikila bakhukhomile efwe; bakalusilie likhoma liabwe khu bene. Balekhe banuulwe mu sibala nisio balimo nga baambe.

⁵Okhababeela bumayaanu nibwo bakhola ta, lundi okhabwibilila ta, sikila bakhuambisie lirima ebweeni we babombakha.”

⁶Khwako khwachiililila khukhwombakha lisiisi. Khwombakha liola akari we buleeyi bwalio, sikila babaandu baba ne kumwoyo kwe khukhola kimilimo.

⁷Ne kakhali Sanibalati, Tobia ne Baarabu, Baamoni ne Bashidodi, ne baulila bali khukhwombakha lisiisi lia Yerusalemu khulikho khuchiililila, lundi bali bibaanga bie lisiisi bilikho bikalwa, babona bubi bukali.

⁸Boosi bakhola ekwangwaani khukhwicha khukhwibwaakala Yerusalemu ne khusaasia chingoyaani mu lukoba.

⁹Ne khwasaba khu Wele wefwe mala khwarao omuliindi khuliinda siilo ne kumuusi.

¹⁰Babaandu ba Yuda baloma bali: “Bakholi basuta balikho balua. Ne kamaumbu kakhilile. Se khunyala khukhwombakha lisiisi tawe.”

¹¹Ne basiku befwe baloma bali, “Se balamanya, namwe babone ta khukhwola nga ne khucha khubolakho, khubeera ne khukhwimia kimilimo kiabwe.”

¹²Nga Bayaudi ba baamenya ne basiku befwe becha bakhuboolela khukhwola ekhumi bali, “Basiku balama buli abuundu niio bamenya khukhwibwaakala efwe.”

¹³Nara babaandu be chimbalu, kamafumo, ne buyiingo, mu buli abuundu aatomokha, lundi asiangalaamwe enyuma we lisiisi.

¹⁴Nalola mala nenyokha nio naboolela bakoosi, babemeelesi ne babaandu boosi ndi, “Mukhabaria ta. Khebulila Wele Omunyali Owa Bioosi ali Omukali owe liriisia mala mupanile bawandaayenywe, babaana benywe, bakhasi benywe, ne chingo chenywe.”

¹⁵Basiku befwe baulila bali khwamala khumanya niko baba ne barekekha, mala bamanya bali Wele onaake lirekekha liabwe. Nio fwesi khwakobolayo khwombakha lisiisi buli mundu khu mulimo kwewe.

¹⁶Khukhwamila khu ndaalo eyo balala khu bakholi bombakha lisiisi ne babaandi babanula kamafumo, chingabo, ne buyiingo. Mala banamae bakhulu bema enyuma we be nju eya Yuda

¹⁷ba baaba ne bombakha lisiisi. Abo babasuta bibiindu bibiombakha, bakholela kumukhono mulala, ne kukuundi kwasuta bulwaani.

¹⁸Ne buli omwombakhi aba eboyile embalu khu nduukhu yewe nga aba ne ombakha. Omundu owaba ne apa e khoombi aba siimbi ne nase.

¹⁹Naboolela bakoosi ne babemeelesi ne babaandu boosi ndi, “Kimilimo kili kimikali lundi kimibalaayi ne efwe khwasalaniile lukali khwisiisi, omundu khukhwama khu wasie.

²⁰Abuundu niio muulila ekhoombi, timao Wele wefwe alakhupanila.”

²¹Nio khwakhola kimilimo ne balala bakangilila kamafumo khukhwama nga busia khukhwola nga ne bwilabula.

²²Lundi naboolela babaandu mu siise esio endi, “Lekha buli mundu ne bayeeta babwe boosi babe mu Yerusalemu mu silo, nio bakhuliinde mu silo ne khukhola kimilimo kumuusi.”

²³Nio ese ne babasiange ne bakholi base ne baliindi se khwefuula chingubo siilo tawe. Ne buli mundu asuta bulwaani bwewe mukhono.