Read lubukusu Neh. 6 Bible Online

Neh. 6 - lubukusu bible

Neh. 6

¹Sanibalati, Tobia, Keshemu Omwaraabu, ne basiku befwe babaandi boosi baulila bali namalile khukhwombakha lisiisi. Lundi baulila bali mbao bibaanga bibialekhwamo ta, (akhaba ne khwaba ne khusiili khura kimiliango mu bilibwa.)

²Khwako Sanibalati ne Keshemu bandumira burume ne baloma bali, “Yiicha khwakaanane, mu sirekere silala mu siangalaamwe sia Ono.” Ne kakhali benya khu khukholela ese kamabi.

³Naruma barume khubaboolela endi, “Endikho khola kimilimo kimikali ne se enyala necha tawe. Siina sikila ndekhe kimilimo mala niche niio muli?”

⁴Bandumira burume buno ne bubwene khukhwola khane, ne buli siise nabarumira likalusio liliene ne liliene.

⁵Nio Sanibalati, mungila eng'ene ne eng'ene arumania omukholi wewe khwise lukhola kharaano, ne ebarwa ekhali efuunikhe tawe mu makhono kewe.

⁶Kakabamo kaba: “Kabolekhwe mu chikholo, ne Kashimu yesi alomakho, bali ewe ne Bayaudi mwenya khukhola bureengu. Esino nisio sikila ne mulikho mwombakha lisiisi. Ne ewe wenya khuba omwami wabwe khuloondekhana ne chilomo chino?

⁷Lundi bali khurekekha bang'oosi khulangilila mu Yerusalemu khuloondekhana ne nawe bali, omwami aliio mu Yuda. Ne nono lilaboolelwa omwami khuloondekhana ne kamakhuwa kano. Nono yiicha khwakaanane khulomalome khu makhuwa kano.”

⁸Namurumira likalusio ndi: “Mbao sisiikholekha nga nilwo oloma tawe. Wekhochochile busa wamwene.”

⁹Benya khukhuriikhirisia ne bebaasia bali khulareenga mala kimilimo kikhaywe khukhwikholekha. “Nono, Ee Wele Omunyali Owa Bioosi mbelesie kamaani!”

¹⁰Ne nga nacha munju eya Shemaya okhwa Delaya omwichukhulu owa Mehetabeli, owabowa munju yewe, amboolela ali, “Lekha khwakaanane munju eya Wele Omunyali Owa Bioosi, mala khukhomekhe kimiliango, sikila balikho becha khukhwira ewe, silo siosi siosi banyala becha khukhwira ewe.”

¹¹Ne kakhali nakobosia ndi, “Omundu nga ese nyala nelukha ku? Omundu nga ese nyala nacha mu Lukaangu mala naba omulamu ku? Se endachamo tawe.”

¹²Namanya endi Wele se aba omurumire tawe, ne akhali Tobia ne Sanibalati yaba bamukulile khuloma ario.

¹³Bamukula khulwe sifuno sino: Mbe omuri mala khole bumayaanu nio bambelesie lisina libi mala bakhome.

¹⁴Nasaba Wele ndi, “Khebulila Tobia ne Sanibalati Ee Wele wase khuloondekhana ne bibiindu nibio bakholile bino. Khebulila omung'oosi omukhasi Noadia ne bang'oosi babaandi boosi babenya khukhundikhirisia.”

¹⁵Nio lisiisi liawa khukhwombakhwa khu ndaalo eye kamakhumi kabili na chiraano eye kumwesi kwa Elulu. Lisiisi liabukula chindaalo kamakhumi karaano na chibili khukhwombakhwa.

¹⁶Nga basiku befwe boosi ne chikholo chichakhubotookhelela ne baulilakho, baria, mala chisoni chabatiila. Babona bali kimilimo kino kiakholeekhe khulwe buyeeti bwa Wele.

¹⁷Khutasa khwako mu biise ebio bakoosi ba Yuda baruma chibarwa chingali khu Tobia ne Tobia naye yesi abaandikila chibarwa.

¹⁸Babaandu bakali mu Yuda baba lubeka lwewe mu khwechuba sikila aba musaani owa Shekenia okhwa Ara. Omwana wewe Yehohanani akhwa omukhaana owa Meshulamu, okhwa Berekia.

¹⁹Lundi balomaloma khu malayi kewe ebweeni wase mala ne bamuboolela niko naloma. Ne Tobia aruma chibarwa khukhundikhirisia.