Read lubukusu Neh. 7 Bible Online

Neh. 7 - lubukusu bible

Neh. 7

¹Lisiisi liombakhwa, bilibwa biemisibwa, ne baliindi babembi be kimienya ne Balawi babaandi baroborwa.

²Narao wandaayase Hanani, ne Hanania komanda owe lukoba khuliinda lukoba lwa Yerusalemu. Hanania aba omweyikinwa lundi omundu owaria Wele khukhila babaandi.

³Nababoolela ndi, “Bilibwa bia Yerusalemu biikulibwe khukhwola mwiangilwe. Ne lundi mwikale ne khukhomekha kimiliango baliindi ne basiili khurura khu milimo enyanga ne ekwa. Robora baliindi khukhwama mu baandu bamenyile mu Yerusalemu, ne buli mulala khuliinda siimbi ne chinju chabwe.”

⁴Lukoba lwa Yerusalemu lwaba lukali lundi lubalaayi, ne kakhali babaandu ba babaamo baba batiiti, lundi chinju chaba chikhombakhwa tawe.

⁵Wele ambelesia limanya khubuusia bakoosi ne babemeelesi ne babaandu nio babalwe khuloondekhana ne lisaaye liabwe. Nanyoola sitabu sie lisaaye lilianyoa khukobola khukhwama mu mbaambe. Yaba kaandikwamo bali:

⁶Abano nibo babaandu be lukoongo babakobola khukhwama mu mbaambe. Bali nibo omwami Nebukadinesa, owa Babiloni abukula ayila mu mbaambe. Bakobola e Yerusalemu ne Yuda, buli sia mulala mu lukoba lwewe.

⁷Bakobola ne Serubabeli, Yoshua, Nehemia, Asaria, Ramia, Nahamani, Modekai, Bilishani, Misipereti, Bikibai, Nehumu, ne Baana.

⁸Obuno nibwo bukali bwe babaandu ba Isiraeli: Lisaaye lia Paroshi liaba babaandu chielefu chibili emia ndala ne kamakhumi saba na babili.

⁹Lisaaye lia Shefatia baba chimia chitaru ne kamakhumi saba na babili.

¹⁰Lisaaye lia Ara liaba chimia sita ne kamakhumi karaano na babili.

¹¹Lisaaye lia Pahati-moabu (ba baaba lisaaye lia Yeshua ne Yoabu) baba chielefu chibili ne chimia munaane ne likhumi na munaane.

¹²Be lisaaye lia Elamu baba eelefu ndala ne chimia chibili kamakhumi karaano na bane.

¹³Be lisaaye lia Satu baba chimia munaane ne kamakhumi kane na baraano.

¹⁴Be lisaaye lia Sakai, baba chimia saba ne kamakhumi sita.

¹⁵Be lisaaye lia Binui, baba chimia sita ne kamakhumi kane na munaane.

¹⁶Be lisaaye lia Bebai, baba chimia sita ne kamakhumi kabili na munaane.

¹⁷Be lisaaye lia Asigadi, baba chielefu chibili ne chimia chitaru ne kamakhumi kabili na babili.

¹⁸Be lisaaye lia Adonikamu, baba chimia sita ne kamakhumi sita na saba.

¹⁹Be lisaaye lia Bikibai, baba chielefu chibili ne kamakhumi sita na saba.

²⁰Be lisaaye lia Adini, baba chimia sita ne kamakhumi karaano na baraano.

²¹Be lisaaye lia Ateri (ba Hesekia), baba kamakhumi tisa na munaane.

²²Be lisaaye lia Hashumu, baba chimia chitaru ne kamakhumi kabili na munaane.

²³Be lisaaye lia Besai, baba chimia chitaru ne kamakhumi kabili ne bane.

²⁴Be lisaaye lia Harifu, baba emia ndala ne likhumi na kabili.

²⁵Be lisaaye lia Kibeoni, baba kamakhumi tisa na baraano.

²⁶Babaandu ba Betelehemu ne Netofa, baba emia ndala ne kamakhumi munaane na munaane.

²⁷Babaandu ba Anatoti, emia ndala ne kamakhumi kabili na munaane.

²⁸Babaandu ba Boti-Asimaweti, kamakhumi kane na babili.

²⁹Babaandu ba Kiriati-Yearimu, Kefira ne Beeroti, chimia saba ne kamakhumi kane na bataru.

³⁰Babaandu ba Rama ne Keba, chimia sita ne kamakhumi kabili na mulala.

³¹Babaandu ba Mikimashi, emia ndala ne kamakhumi kabili na babili.

³²Babaandu ba Beteli ne Ai, emia ndala ne kamakhumi kabili na bataru.

³³Babaandu ba Nebo babaandi baba kamakhumi karaano na babili.

³⁴Ba okhwa Elamu okundi, elefu ndala ne chimia chibili ne kamakhumi karaano na bane.

³⁵Ba okhwa Harimu, chimia chitaru ne kamakhumi kabili.

³⁶Ba okhwa Yeriko, chimia chitaru ne kamakhumi kane na baraano.

³⁷Ba okhwa Lodi, Hadidi, ne Ono, chimia saba ne kamakhumi kabili na mulala.

³⁸Ba okhwa Senaha, chielefu chitaru ne chimia tisa ne kamakhumi kataru.

³⁹Chino nicho chikholo che basaayi chichakobola khukhwama mu mbaambe. Ba okhwa Yedaya, (babechukhulu ba Yeshua), chimia tisa ne kamakhumi saba na bataru.

⁴⁰Ba okhwa Imeri, eelefu ndala ne kamakhumi karaano na babili.

⁴¹Ba okhwa Pashuri, eelefu ndala ne chimia chibili ne kamakhumi kane na saba.

⁴²Bakhwa Harimu, eelefu ndala ne likhumi na mulala na saba.

⁴³Abamo nibo balawi, be lisaaye lia Yeshua ne Kadimieli, (babechukhulu ba Hodeba) kamakhumi saba na bane.

⁴⁴Babembi be kimienya be lisaaye lia Asafu baba emia ndala ne kamakhumi kane na munaane.

⁴⁵Balindi be silibwa be lisaaye lia Shalumu, Ateri, Talimoni, Akubu, Hatita, Shabai emia ndala ne kamakhumi kataru na munaane.

⁴⁶Bakholi be Lukaangu baba: Ba okhwa siha, Hasufa, ne Tabaoti.

⁴⁷Ba okhwa Kerosi, Sia, ne Padoni.

⁴⁸Ba okhwa Lebana, Hakaba, ne Sulimui.

⁴⁹Ba okhwa Hanani, Kideli ne Kahari.

⁵⁰Ba okhwa Reaya, Resini, ne Nekoda.

⁵¹Ba okhwa Easamu, Usa, ne Pasea.

⁵²Ba okhwa Besai, Meunimu, ne Nefusimu.

⁵³Ba okhwa Bakibukia, Hakufa, ne Harihuri.

⁵⁴Basiluti, Mehida, Herisha,

⁵⁵Barikosi, Sisera, Tema;

⁵⁶Ba okhwa Nesia ne Hatifa. Chikholo che banasioobi ba Solomoni chichakobola khukhwama mu mbaambe.

⁵⁷Be lisaaye lio mukholi owa Solomoni; ba Sotai, Sofereti, Perida,

⁵⁸Yaala, Parikoni, Kideli;

⁵⁹Shefatia, Hatili, Pokereti-hosebaimu ne ba Amoni.

⁶⁰Bakholi be Lukaangu ne lisaaye lie bakholi ba Solomoni baba chimia chitaru ne kamakhumi tisa na babili.

⁶¹Abano nibo babecha khukhwama Teli-mela, Teli-harisha, Cherubu, Adoni, ne Imeri. Se banyala khukhwekesia ne baba babechukhulu be Baisiraeli tawe.

⁶²Baba: Ba okhwa Delaya, Tobia, Nekoda chimia sita kamakhumi kane na babili.

⁶³Lundi babao basaayi bakhamanyikhana sikuuka siabwe ne siama Isiraeli namwe tawe. Baba lisaaye lia Hobaya, lia Hakosi ne lia Barisilayi. Barisilayi aba abukula omukhaana owa Barisilayi nga omukhasi wewe mala alaangwa lisina liewe lie luuya lwo omukhasi wewe.

⁶⁴Babaandu bakhilwa khunyoola kamasina ke sikuuka siabwe nono se bafukiililwa khuba basaayi tawe sikila balolekhana khuba banyaalu.

⁶⁵ Omuruki owe Bayaudi ababoolela ali se bakhoyeele balia siakhulia siianwa khu Wele tawe, khukhwola nga Omusaayi ne echa khubao onyala arumikhira Urimu ne Tumimu[6].

⁶⁶Bukali bwaabo babakobola khukhwama mu mbaambe baba chielefu kamakhumi kane na chibili, chimia chitaru ne kamakhumi sita.

⁶⁷Khu bano batasikhakho bakholi babwe be siseecha nende be siikhasi chielefu saba, chimia chitaru ne kamakhumi kataru na saba; babembi be kimienya be siseecha nende be siikhasi chimia chibili ne kamakhumi kane na baraano.

⁶⁸Chifarasi chabwe chaba chimia saba ne kamakhumi kataru na sita, ne chinyumbu chabwe chimia chibili ne kamakhumi kane ne chiraano.

⁶⁹Lundi baba ne chingamia chabwe chimia chine ne kamakhumi kataru na chiraano, ne chipunda chabwe chielefu sita chimia saba ne kamakhumi kabili.

⁷⁰Balala khu bemeelesi be chinju baana buyeeti bwe khung'oona Lukaangu lundi. Omuruki aelesia omubiikhi bitonyi bie sahabu eelefu ndala, bibuumba kamakhumi karaano, chingubo che basaayi chimia chiraano ne kamakhumi kataru.

⁷¹Babemeelesi Be Chikholo baelesia omubiikhi bitonyi bie sahabu chielefu kamakhumi kabili, bitonyi bie efwesa chielefu chibili ne chimia chibili.

⁷²Babaandu babaandi babarama baana bitonyi bie sahabu chielefu kamakhumi kabili, bitonyi bie efwesa chielefu chibili ne chingubo che basaayi kamakhumi sita na saba.

⁷³ Nono basaayi, Balawi, baliindi be Lukaangu, babembi, ne babaandu babaandi, bakholi be mu Lukaangu, ne Baisiraeli boosi bamenya mu ngoba chabwe.