Read lubukusu Neh. 8 Bible Online

Neh. 8 - lubukusu bible

Neh. 8

¹Kumwesi kwa saba Baisiraeli boosi baba ne bamalile khukhwikhala mu ngoba chabwe. Baisiraeli boosi babuusiana mu Yerusalemu, mu siwanja akari we silibwa sie Kameechi. Bareeba Esira Omusaayi lundi omuandiki areere sitabu sie lilaka lia Musa nisio Wele Omunyali Owa Bioosi aelesia Baisiraeli.

²Khwako khu ndaalo eye khunyoa eye kumwesi kwa saba Esira areera sitabu sie lilaka abuundu niio yaba babaandu baba ne babusianile. Babaandu be siseecha, be siikhasi, bakhulu babanyala khuulila ne khumanya bebuusiao.

³Abasomela Lilaka khukhwama nga ne bwasia khukhwola mwiangilwe. Asoma ne aloleleele akari we siwaanja embi ne silibwa sie kameechi. Mala boosi bamurekeeresia bulayi.

⁴Esira omuandiki eema khu situumi sie lupao sisiombakhwa khubeela kimilimo ekio. Babaandu babamwimao baba: Matitia, Shema, Anaya, Uria, Hilikia, ne Maaseya khu lubeka luseecha ne Pedaya, Mishaeli, Malichiya, Hashumi, Hashibatana, Sakaria, ne Meshulamu lubeka lukhasi.

⁵Esira ekula sitabu ebweeni we babaandu, nga ne abakho angaaki khubakhila. Ne nga ne ekula sitabu, babaandu boosi benyokha bema.

⁶Esira afumia Wele Omunyali Owa Bioosi, Wele omukali. Babaandu boosi basuta kamakhono kabwe mungaaki ne bakobosia bali “Amina, Amina.” Basikama mala benamila Wele Omunyali Owa Bioosi, ne bubweeni bwabwe bwaloleelela asi.

⁷Balawi babenoselia Lilaka Baba: Yeshua, Bani, Sherebia, Yamini, Akubu, Shabetai, Hotia, Maaseya, Kelita, Asaria, Yosabati, Hanani, ne Pelaia.

⁸Basoma bulayi ne khukhwinoosia sitabu sie khukhwama mu lilaka lia Wele. Balinoosia[7] bulayi babaandu baelewa.

⁹Nio Nehemia, owaba omuruki ne Esira, omusaayi lundi omumanyi owe Lilaka, ne Balawi babenosianga Lilaka baboolela babaandu boosi bali, “Endaalo eya luno eli endakatifu khu Wele Omunyali Owa Bioosi, Wele wenywe. Khwako se mukhoyeele mwabeelela namwe mwalila tawe.” Babaandu boosi baba balikho balila nga baulila likhuwa lia Wele Omunyali Owa Bioosi.

¹⁰Nio ababoolela ali, “Luno khemuche engo mala mulie biakhulia bilayi ne ndali. Mukabekho biakhulia ne bie khunywa bienywe khu baandi bakhali ne nabio tawe. Endaalo eya luno eli endakatifu khu Mwami, khwako mukhasulunya tawe. Sikila busangaafu bwa Wele Omunyali Owa Bioosi buli kamaani kenywe.”

¹¹Balawi bachiililila khuoleelesia babaandu ne khubaboolela bali, “Ba baolelefu sikila endaalo yino eli endakatifu. Mukhasulunya ta.”

¹²Khwako babaandu boosi bacha engo mala balia ne khunywa ne busangaafu ne khukabana nibio baba ne nabio ne babaandi, sikila baulila niko babasomela.

¹³Endaalo eya khabili babemeelesi be chikholo boosi, alala ne basaayi ne Balawi, bacha khu Esira khukhweyika kamekisio ke Lilaka.

¹⁴Banyoola Lilaka nilio Wele Omunyali Owa Bioosi aana khubirira khu Musa liboola lili Baisiraeli bakhoya khumenya mu bisali biise bie mu Naikara eye Bisali.

¹⁵ Babaandu bakhoyelwa khukhwilwacha ne khusalanisia elomo eya Wele Omunyali Owa Bioosi mu Yerusalemu ne mu chingoba chabwe choosi; “Khemuche mu bikulu mala mureere kamasaafu ke khukhwama khu sakia cha miseituni ne kimiseituni kie mundaa, kimibadasi, kiminasi, ne kimirongooro kikiindi kie kamasaafu khukhola bisali khuloondekhana ne kamekisio kakaandikwa mu Lilaka.”

¹⁶Khwako babaandu bacha banyoola kamasaafu, mala bakhola bisali khu chinju chabwe, mu mako chabwe, mu lumako lwe enju eya Wele Omunyali Owa Bioosi ne babaandu boosi baba embi ne silibwa sie kameechi ne silibwa sia Efuraimu.

¹⁷Babaandu boosi babakobola khukhwama mu mbaambe bombakha bisali bamenyamo. Bele Baisiraeli basiili khukhola kano khukhwama chindaalo cha Yoshua okhwa Nuni tawe. Buli mundu aba ne busangaafu.

¹⁸Khukhwama endaalo enyoa eya naikara, khukhwola khu ndaalo emaliilisi, Esira asoma malala khu malaka ka Wele buli ndaalo. Baba ne naikara khu ndaalo saba, mala mu ndaalo eya munaane liabao libuusiana litakatifu khuloondekhana ne lilaka.