Read lubukusu Neh. 9 Bible Online

Neh. 9 - lubukusu bible

Neh. 9

¹Mu ndaalo eye kamakhumi kabili na chine eye kumwesi kumwene, Baisiraeli babuusiana khulwe khusila khulia ne khunywa ne khukhwekesia khubeleela khulwe bumayaanu bwabwe. Befwara kamakunia ne khuchukha lipukhuulu khu mirwe khulwe bubwoni bwabwe.

²Baisiraeli beyaula khukhwama khu baakwa boosi. Bema ne beyama bumayaanu bwabwe nende bwe bakuuka babwe.

³Khulwe ambi chisa chine bema ne basoma khukhwama mu sitabu sie Lilaka lia Wele Omunyali Owa Bioosi, Wele wabwe. Ne mu saa chine chichiindi beyama bumayaanu bwabwe mala basaaya Wele Omunyali Owa Bioosi, Wele wabwe.

⁴Babema khu situumi sie Balawi, baba, Yeshua, Bani, Kadimieli, Shebania, Buni, Sherebia, Bani, ne Kenani. Basaba Wele Omunyali Owa Bioosi, Wele wabwe ne kumwoyo kwa angaaki.

⁵Nio Balawi; Yeshua, Kadimieli, Bani, Hashabineyi, Sherebia, Hodia, Shebania, ne Petahiya baloma bali, “Yinyokha angaaki mala mufumie Omwami Wele wenywe, khukhwama mindali khukhwola mindali. Lisina liewe lie luyali lifuma, lili angaaki we chikhabi choosi ne efuma.”

⁶Nio Esira aloma ali, “Ewe, weng'ene oli Wele Omunyali Owa Bioosi, wakhola likulu ne likulu lie angaaki lukali ne ching'enieesi che mungaaki choosi. Wakhola liloba nende bioosi bilikho. Wakhola enyanja ne bioosi bilimo. Ne ewe oaana bulamu khu buli siindu. Bioosi bili khwikulu bikhusaaya ewe.

⁷ Ewe, oli Wele Omunyali Owa Bioosi, Wele owarobora Aburamu mala wamulaanga khukhwama Uri mu Babiloni; mala wamulaanga lisina liewe oli Aburahamu.

⁸ Wabona oli ali omusuubilwa khwiwe, mala wakhola endakaano ne naye. Wamusuubisia khumuelesia sibala sia Kanaani; Sibala sie Bahiti ne Baamoni, sibala sie Baperisi, Bayebusi, ne Bagirikashi, khu lisaaye liewe. Wabiikha endakaano yowo, sikila oli omuluungi.

⁹ “Ewe wabona khunaanisibwa khwe bakuuka befwe e Misiri, lundi waulila khulila khwabwe a Nyanja eya Shamu.

¹⁰ Wakhola kamaya nende ke khuukia khu Farao ne khu bemeelesi bewe ne khu baandu be sibala siewe boosi, sikila wamanya oli bafwolobia bakuuka befwe. Ewe wanyoola efuma ne efuma yowo esiiliyo na luno.

¹¹ Wakabukhasia enyanja yela eyi ne neyi ebweeni wabwe nio babira akari we nyanja khwiloba liliomu. Ne kakhali wamwaata abo ba babatimania mu lusiba lwe kameechi; nga libaale ne litumbula mu meechi ke lusiba.

¹² Mu siise sie kumuusi wabarangirira ne lifuumbi, ne siilo wabakhoselia kumulilo khu ngila niyo bakhoyela bachilekho.

¹³ Wecha a sikulu sia Sinai mala walomaloma khukhwama mwikulu khu baandu mala wabaa lilaka lilienyekha ne kamekisio ka ng'ali.

¹⁴Wabekesia khuliinda e Sabato yowo endakatifu, ne wabaelesia kamalaka kowo khubirira khu mukholi wowo Musa.

¹⁵ Ne nga baba ne njala, wabaelesia siakhulia khukhwama mwikulu, ne nga baba ne bulesia wabaelesia kameechi khukhwama mu lwanda. Wabalaka khu bukula sibala nisio wabasuubisia khubaelesia.

¹⁶ “Ne kakhali bakuuka befwe baba baluma emurwe ne kunaanio mala baloba khuria kamalaka kowo.

¹⁷ Baloba khuria; mala ke khuukia koosi niko wabakholela; Baluma emirwe mala beroborera omwimeelesi khubakobosia mu burumwa e Misiri. Ne ewe oli Wele obeela, owe kumwalaalo ne siisa, lundi oli kalaa mu khuba ne lirima ne oli ne busiime bukali nono se wabalekha tawe.

¹⁸ Akhaba ne bekholela sifwaani mu lukoondo lwe euunwa mala baloma bali, ‘Oyuno niye wele wefwe owakhurusia khukhwama e Misiri,’ bakhukholela kamabi kamakali.

¹⁹ Ne ewe mu siisa siowo sikali se wabalekha mu sichiimi tawe. Lifuumbi lie kamalesi liabemeelela kumuusi ne lifuumbi lie kumulilo liabemeelela mu silo.

²⁰Mu bulayi bwowo wababoolela nisio bakhoyeele bakhole; wabaliisia mana ne khubaelesia kameechi ke khunywa.

²¹Wabaliinda khu miiko kamakhumi kane mu sichiimi mala wabaelesia bioosi nibio benya; chingubo chabwe se chatabukha ta, ne bikele biabwe se biabiimba tawe.

²² “Wabaelesia bibala ne babaandu, ne khubaelesia kamaloba kakaandi. Nio babukula sibala sia Sihoni omwami owa Heshiboni ne sibala sia Oku omwami owa Bashani.

²³ Watasa lisaaye liabwe liaba likali nga ching'enieesi che mwikulu, ne khubareera mu sibala nisio wasuubisia khuelesia bakuuka babwe.

²⁴ Nio lisaaye liabwe liengila mu sibala omwo ne khusibukula. Wabakhilila babaandu Bakanaani ne babaami babamenyamo. Waelesia babaandu bowo bunyali bwe khukhola nga ne benya khu baandu ne babaami ba Kanaani.

²⁵ Babaandu bowo batiila chingoba chichabotookhelesibwa ne kamasiisi ne sibala sie ngakha. Babukula chinju chichechulamo bibiindu bilayi, chisebele chichayabwa khale, kimirongooro kie miseituni, nende kie kimisabibu ne kimirongooro kikiindi kie kamatuunda kamakali. Balia buli siosi nisio benya mala banera; bekhoyela bibiindu bioosi nibio wabaelesia.

²⁶ “Ne kakhaba kario babaandu bowo se baakhuria ewe tawe; lundi baakhola bureengu khwiwe. Baalekha lilaka liowo mala beera bang'oosi bowo ba baabakaanianga nio babakobosie khwiwe. Baaba baakholile embelekeu engali lukali khu Wele.

²⁷Khwako wabalekha mu makhono ke basiku babwe, mala babaelesia kumunaanio. Ne mu biise bie kumunaanio bino, bakhulilila ewe mala wabaulila khukhwama mwikulu. Mu siisa siowo sikali wabarumira baonia ba baonia khukhwama mu makhono ke basiku babwe.

²⁸Kumuleembe nga ne kwakobola, bakhukholela bumayaanu lundi wabalekha mu makhono ke basiku babwe baba ne bunyali khu nibo. Ne lundi nga bakhukobolela ne khukhulilila wabaulila khukhwama mwikulu, mala buli siise wabareesia mu siisa siowo sikali.

²⁹ Ewe wabakaania nio obakobosie khu malaka kowo. Ne kakhaba kario baba ne kukwibonio mala baloba kamalaka kowo. Baba ne lilielola, batambamo lilienya ne sileka, balekha khuria kamalaka kowo.

³⁰ Khu miiko kimikali wabekhaliilikhila ne khubakaania khubirira khu roho, bang'oosi bowo. Khwako wabalekha baulwa ne chikholo che bibala bibiindi.

³¹Ne kakhaba kario, sikila siisa siowo sikali ewe se wabalekha namwe wababunia tawe. Khubeela ewewe oli Wele we kumwalaalo ne siisa.

³² “Khwako nono, Wele wefwe, oli omukali, we kamaani ne lundi owe khuukia. Obiikhanga endakaano ne busiime bwowo. Okhalekha kamatinyu kakhwichile khwifwe, ne khu baami befwe kalolekha matiiti ebweeni wowo tawe. Kamatinyu kano kali khu baami befwe, babemeelesi befwe, basaayi befwe, bang'oosi, bakuuka befwe, ne babaandu befwe boosi. Butinyu bwakhubelekho khukhwama khu siise sie babaami ba Ashuru khukhwola luno.

³³Ewe oli ne bung'ali bwe khu khuukuuma efwe, sikila ewe wabeele omusuubilwa, ne efwe khwakholile bumayaanu.

³⁴Babaami befwe, babemeelesi befwe, bakuuka befwe ne basaayi, se baliindile kamalaka kowo namwe bakhola khuloondekhana nako tawe. Se barekeeresia likaania liowo tawe.

³⁵Se bakhukholela ewe mu bwami bwabwe tawe, akhaba ne bekhoyela bilayi nibio wabaelesia, ne kamaloba kamakali lundi ke ngakha. Se balekha chingila chabwe che bumayaanu tawe.

³⁶Ne luno khuli banasioobi mu sibala nisio waelesia bakuuka befwe khukhwekhoyela kamatuunda ne bibiindu bilayi biamwo.

³⁷Ne bibiaamo bilayi bibiama mu maloba kano bicha khu baami nibo wakhurakho sikila bumayaanu bwefwe. Babaami lundi bali ne bunyali khwifwe ne khu khaafu chefwe. Bakhukholela nisio benya. Khuli mu munaanio kumukali.”

³⁸Sikila ako koosi, efwe khulikho khukhola endakaano embandalafu mu maandiko. Ne babemeelesi befwe, Balawi befwe, ne basaayi befwe balikho barakho kimiuuri kiabwe.