Read lubukusu Est. 2 Bible Online

Est. 2 - lubukusu bible

Est. 2

¹Enyuma wa kano, lirima lio mwami Ahuswero ne liweele, akhebulila kwini Bashiti, niko akhola, nende niko akhalakilwa.

²Nio bakholi babaliindaanga omwami baloma bali, “Khukhoya khuyimile omwami bakhaana be yabwana ne lukoondo lulayi.

³Omwami akhoya arobore babemeelesi mu ngoongo choosi mu bwami bwewe mala babuusie bakhaana be eyabwaana be lukoondo lulayi nio babareere mwichipi, mu lukoba lwa Susa. Bakhoya babe mu buliindi bwa Hekai, omuchili omukholi owo mwami oliindaanga bakhasi. Ne bakhoya baebwe kamafura ke khubamiliisia.

⁴Ne omukhaana oosiimisia omwami lukali bamukhole abe Kwini mu bweyaangu bwa Bashiti.” Lino liasangaasia omwami mala akhola ario.

⁵Mu lukoba lwa Susa, abamo Omuyaudi owalaangwa bali Modekai. Aba okhwa Yairi. Yairi aba omwana owa Shimei okhwa Kishi owe ekholo eya Benjamini.

⁶ Modekai aba mulala khu baandu babaambwa khukhwama mu Yerusalemu alala ne omwami Yekoniya owa Yuda mala bayilwa mu mbaambe. Omwami Nebukadinesa owe Babiloni niye owabaamba.

⁷Modekai akhusia omwana owa raraawe okundi, bali Esta, owalaangwa bali Hadasa. Amukhusia sikila Esta se aaba ne maayi namwe ne raraawe tawe. Omukhaana yuno aba owe lukoondo lulayi lundi owe kumubili kumulayi. Nga raraawe ne maawe bafwa, Modekai amubukula, ne khumukhusia nga omwana wewe omwene.

⁸Nga omwami ne amala khurusia lilaka liewe, bakhaana bakali bareerwa mu lukoba lwa Susa asi we buliindi bwa Hekai. Akhaba Esta yesi areerwa mwichipi lio mwami asi we buliindi bwa Hekai, owaba omuliindi owe bakhasi.

⁹Esta asiimisia Hekai mala Hekai amusiima. Hekai aba khangu khuelesia Esta kamafura ke khukhwiakha ne siakhulia siewe sie khulia. Amuelesia bakhaana saba babaroborwa khukhwama mwichipi lio mwami khumukholela. Lundi amuelesia niye ne bakhaana bewe abuundu e khumenya alayi mwichipi khukhila boosi.

¹⁰Nono Esta se amanyisiakho omundu yesi yesi babaandu bewe namwe balebe bewe baaba nanu tawe, sikila Modekai amukaania.

¹¹Buli endaalo Modekai akeendanga ebweeni we luuya lwe lichipi lio mwami, khukhwenya khumanya nga Esta ne ali, ne siicha khumwikholekhakho.

¹²Biise bia buli mukhaana bie khukhwirekekheramo khucha ebweeni wo mwami Ahuswero, biaba kimieesi likhumi na kibili. Kano kekholekha enyuma we bakhasi khukhwimiliisia ne kamafura ka marimari khulwe kimieesi sita, ne kamafura kaunya bulayi khulwe kimieesi kikiindi sita. Kano kekholekha khuloondekhana ne kamalaka ke khukhwimiliisia ke bakhasi.

¹³Buli omukhaana nga ne achichanga ebweeni wo mwami mungila yino, bamuechanga buli siindu siosi siosi nisio enyanga khukhwama mwichipi.

¹⁴Achichangayo ekolooba, ne kumutikhinyi ailwa munju ekiindi eye bakhasi asi we buliindi bwa Shashigasi, omuchili owaba omuliindi owe bakhasi bo mwami nibo aamenyia busa nga basaale. Omukhasi se akobolanga wo mwami lundi ta nabwila omwami ne amulaanga ne lisina liewe kaaba bali amusiimisia.

¹⁵Siise siola sia Esta khucha wo mwami. Esta aba omukhaana owa Abihaili, raraawe owa Modekai okundi. Modekai aba akhusia Esta nga omwana wewe omwene. Nga bubwasio bwewe khucha ebweeni wo mwami ne bwoola, Esta se asabakho siosi ta ne kakhali nga Hekai omuchili, omwimeelesi we enju eye bakhasi amukelekela. Nio Esta asiimisia buli mundu owamubona.

¹⁶Esta ailwa ebweeni wo mwami Ahuswero mwichipi lie bubwami, mu mwesi kwe ekhumi, kuuli kumwesi kwa Tebeti. Kwaba kumwiiko kwa saba kwa Ahuswero khuba omwami.

¹⁷Omwami asiima Esta khukhila bakhasi babaandi boosi. Esta asiimisia omwami lukali khukhilakho bakhaana be eyabwaana babaandi boosi. Amufwara ekuutwa eye khuuba kwini khu murwe kwewe ne khumukhola khuuba kwini mu bweyaangu bwa Bashiti.

¹⁸Nio omwami aana naikara emboofu khu bemeelesi bewe ne bakholi boosi. Naikara yino yakholwa khulwa Esta. Akhola endaalo eye khuola[2] mungoongo choosi che mu bwami bwewe ne khuaana biianwa khuloondekhana ne biianwa bibioola khuaanwa ne omwami.

¹⁹Nga bakhaana be eyabwaana babuusibwa alala lukhola khabili, Modekai aba ekhaale a silibwa sio mwami.

²⁰Nono Esta, aba asiili khumanyisiakho omundu yesi yesi, balebe bewe namwe babaandu bewe tawe nga Modekai ne amuboolela. Esta aria Modekai bulayi bwene nga ne amuria ne asiili omukhaana omutiiti mu buliindi bwewe.

²¹Mu siise nisio Modekai ekhalaanga a silibwa sio omwami, Bikitana ne Tereshi, bakhalalila omwami Ahuswero, mala benya khumwiira. Babili bano baba bachili bo mwami babaliindaanga luuya lwe khuulilakho.

²²Nga Modekai ne aulila kano aboolela Esta mukho mwami ne Esta naye aboolela omwami niko Modekai aamuboolela, ne afumia Modekai.

²³Kamakhuwa kano kamenieelesibwa mala kanyoolekha khuba ka ng'ali. Nio babaandu babili abo basuungwa khu mirongooro. Kano koosi kaandikwa mu sitabu sie chingano, ebweeni wo mwami.