Read lubukusu Est. 3 Bible Online

Est. 3 - lubukusu bible

Est. 3

¹Enyuma wa kano, omwami Ahuswero atasa bukhoongo omundu bali Hamani okhwa Hamedata Omuakaki[3] Amukhola aba omukhulu khukhila babasie boosi.

²Ne bakholi bo mwami boosi ba baaba a silibwa sio mwami bekesia liriana liabwe khu Hamani khulwe khumusikamila ne khumwinamila. Omwami yaba enya bakhole bario. Ne akhali Modekai, aloba khukhola ario.

³Bakholi basie babaandi mu bukholi bwe bubwami bamureeba bali, “Sikila siina ne okharia lilaka lio mwami tawe?”

⁴Buli endaalo bamuboolelanga, ne se abarekeeresianga tawe. Nio baboolela Hamani. Bakhola bario nio bamanye Hamani ne anyala afukiilila kumwiima kwa Modekai. Modekai aba ababoolela ali niye ali Omuyaudi.

⁵Hamani nga ne amanya ali Modekai se amusikamilanga ne khumwinamila tawe, aambwa lirima.

⁶Ne kakhali Hamani nga ne aamanya ali Modekai aaba Omuyaudi, akhalaka ali khumuukuuma yeng'ene se khwolaana tawe. Khwako akhola ekwangaani khubunia Bayaudi boosi, babaandu be kholo eye Bayaudi mu bwami bwo mwami Ahauswero.

⁷Mu mwesi kwe khunyoa kulaangwa kwa Nisani, mu mwiiko kwe ekhumi na kibili kwe bubwami bwo mwami Ahuswero, baapa chikura nicho balaanga bali puri khurobora endaalo ne kumwesi niyo Hamani akholelamo bibiindu nibio aaba ne apangile. Chikura echo chapilwa ebweeni wa Hamani mala kumwesi kwe ekhumi na kibili kukwalaangwa bali Atari kwaroborwa.

⁸Nio Hamani aboolela omwami Ahuswero ali, “Eliio ekholo eye babaandu eyasalanila mungoongo choosi che bubwami bwowo. Kamalaka kabwe se kali nga ke babaandu babaandi tawe. Lundi, se baria kamalaka ko omwami tawe. Se buli bulayi khwiwe khubekhaliilikha tawe.

⁹Omwami nosiima, lekha lilaka lirure mala babunisibwe. Ne ese ndaelesia bitonyi bie efwesa chielefu likhumi khu bemeelesi be kimilimo kiowo. Ne babemeelesi bakhare bitonyi ebio mu libiikhilo lio mwami.”

¹⁰Nio omwami afuula embete eyarumikha nga kumuuri, mala akielesia Hamani omusiku owe Bayaudi, okhwa Hamedata omuakaki.

¹¹Omwami aboolela Hamani ali, “Nakhuelesie babaandu ne chirupia. Khola khu nibo nilio obona oli lili lilayi khwiwe.”

¹²Nio khu ndaalo eye likhumi na khataru eye kumwesi kwe khunyoa baandiki bo mwami balaangwa. Baandika koosi niko Hamani alaka. Kamaandike ako kayilwa khu bemeelesi be banamae, babemeelesi be chingoongo boosi ne babemeelesi be babaandu boosi. Buli lukoongo lwanyoola ebarwa yalwo ne buli babaandu banyoola ebarwa mu lulomo lwabwe. Ebarwa yaandikwa mwisina lio mwami Ahuswero mala yarebwakho kumuuri kwo omwami.

¹³Barumwa bayila chibarwa khu ngoongo cho mwami choosi. Kamalaka kakabamo kaba bali Bayaudi boosi, baele ne basaakhulu, bakhasi ne babaana babunisibwe, berwe, baweo boosi khu ndaalo ndala, endaalo eye likhumi na khataru eye kumwesi kwe khumi na kibili kukwalaangwa bali Atari. Khutasa khwako, bibiindu biabwe bioosi biyaaywe.

¹⁴Ebarwa eyo yaebwa nga lilaka mu buli lukoongo, nio babaandu boosi berekekhe khulwe endaalo eyo.

¹⁵Barume bacha khangu, khuloondekhana ne lilaka lio mwami. Nio lilaka liarusibwa mu lukoba lwa Susa. Omwami ne Hamani bekhala asi khunywa. Ne kakhali lukoba lwa Susa lwabamo lilisiindukha.