Read lubukusu Est. 4 Bible Online

Est. 4 - lubukusu bible

Est. 4

¹Nga Modekai ne amanya kakaba ne kekholeekhe koosi, atabulaka chingubo chewe mala efwara kamakunia, ne khukhwiakha likokhe. Akeenda mu lukoba, ne akukuula lukali ne lirima.

²Aacha ola a muliango kwe silibwa sio mwami. Se engilamo tawe sikila se bafukiililanga omundu ofwarire kamakunia khukhwingilamo tawe.

³Buli mu lukoongo nimwo lilaka lio mwami liola, khwabechangao khulila khukali khwe Bayaudi. Beyimana khulia, basooma ne khulila. Bakali befwara kamakunia ne khukhwichukhakho likokhe.

⁴Nga bakholi ba Kwini Esta, bakhaana ne bachili bamuboolela niko Modekai akholile, Kwini Esta abona bubi lukali. Arumira Modekai chingubo afware alekhe kamakunia. Ne kakhali Modekai se achifukiilila tawe.

⁵Nio Esta alaanga Hataki, mulala khu bachili be mwichipi owaroborwa ne omwami nga omukholi owa Esta. Aamulaka ache khu Modekai amanye siina sisiaba ne simunania ne siina sikila ne kaba kario.

⁶Hataki acha khu Modekai abuundu abonekha mu lukoba ebweeni we silibwa sio mwami.

⁷Modekai amuboolela buli siindu sisiamwikholekhakho. Lundi amuboolela sikelo sie chirupia yaba nicho Hamani aasuubisia khura mu libiikhilo lie bubwami, khulwe khubunia Bayaudi.

⁸Modekai lundi aelesia Hataki kamaandike yaba kakarusiibwe mu Susa, khulwe khubuna khwe Bayaudi. Modekai aboolela Hataki khukayilila Esta, amwinoosele kamaandike ako, ne khuboolela Esta ache ekoonjelele omwami ne khumuboolela abe ne siisa khu baandu bewe.

⁹Hataki acha aboolela Esta niko Modekai amuboolela.

¹⁰Nio Esta aelesia Hataki burume khukobosela Modekai.

¹¹Esta aloma ali, “Bakholi bo mwami boosi ne babaandu be mungoongo cho mwami bamanyile bali omundu yesi yesi owe siikhasi ne owe siseecha owingila khu luuya lwo omwami lwe mukari ne akhalangilwe tawe, liliio lilaka lilala, enyekhana erwe. Ne kakhali oyo niye omwami okesielela ne esiimbo yewe eye esahabu yeng'ene niye okherwa tawe. Ese se nalangilwekho khucha ebweeni wo mwami tawe chindaalo kamakhumi kataru.”

¹²Mala baboolela Modekai niko Esta aloma.

¹³Ne Modekai aboolela barume bache baboolele Esta bali, “Okhakanakana oli nga ne oli munju eyo omwami okhaone khukhila Bayaudi babaandi tawe.

¹⁴Waaba ne osila busa mu siise nga sino siri, buyeeti ne buonia bulecha khu Bayaudi khukhwama abuundu aandi. Ne kakhali ewe ne be nju eya raraao mulibuna. Naanu omanya, wakana wecha mu bwami khulwe siise nga sino siri.”

¹⁵Nio Esta ababoolela bakobosie Modekai bali,

¹⁶“Cha obuusie Bayaudi boosi alala baali mu Susa mala mwiyimane khulia mu bweyaangu bwase. Mukhalia namwe mukhanywa sisiindu siosi siosi tawe khu ndaalo chitaru, siilo ne kumuusi. Ese ne bakhaana base bakholi fwesi khulakhola khurio. Enyuma wako ndacha khu mwami akhaba ne likhali khuloondekhana ne lilaka tawe. Kaaba bali ndafwa aba, ndafwa.”

¹⁷Modekai arekukha mala akhola koosi nga Esta ne amulaka.