Read lubukusu Est. 5 Bible Online

Est. 5 - lubukusu bible

Est. 5

¹Khu ndaalo ekhola khataru, Esta efwara chingubo che bubwami mala acha eema mukari mwe luuya lwe lichipi. Aloleelela lusiro lwo omwami. Omwami aba mukari, ekhaale khu ndebe eye bubwami, ne aloleelele e muliango kwe lichipi.

²Nga omwami ne abona Esta emile anje, asangaala, mala amwekeselela esiimbo yewe eye esahabu. Esta acha siimbi mala akitilakho emusia.

³Omwami areeba ali, “Kwini Esta siina? Wenya siina? Siosi nisio wenya olanyoola, akhaba sitonyi sie bubwami bwase.”

⁴Esta akobosia ali, “Nosiima omwami, ese nenyile ewe ne Hamani mwiche luno mulie siakhulia sie ekolooba nisio ekhurekekheere ewe.”

⁵Mala omwami akobosia ali, “Reera Hamani khangu, nio khukhole nga Esta ne enya.” Nio omwami ne Hamani bacha khulia siakhulia nisio yaba Esta arekeekhe.

⁶Ne nga baba ne balikho banywa endali, omwami areeba Esta ali, “Wenya siina? Olasinyoola. Osaba siina? Akhaba ne osaba enusu eye bubwami bwase, ndakhuelesia.”

⁷Esta akobosia ali, “Lisaba liase ne lilienya liase nilieli:

⁸Omwami naba ne enyoolile busiime ebweeni wowo, ne lundi ewe ne osiimisiibwe nase, khukhukholela nisio nenya, lekha Hamani ne nawe mube bakeni base kumuchuli mu siakhulia sie ekolooba sisiindi nisio khamurekekhere. Ne kumutikhinyi kwene okwo ekhakhukobosie lireeba liowo khu niko nenya.”

⁹Endaalo eyo Hamani ama khu sialwa ne asangaalile. Ne kakhali nga ne abona Modekai a silibwa sie enju eyo mwami, mala Modekai aloba khumwinyokhela namwe khumwekesia buriaani bwosi bwosi nga abira, amuambila lirima likali.

¹⁰Ne kakhaba kario Hamani efwiilisia mala acha engo. Arumania khulaanga basaale bewe ne omukhasi wewe Sereshi.

¹¹Nio Hamani ababoolela khu buiinda bwewe bukali, khu bukali bwe basoleeli nibo ali ne nabo, lundi nga omwami ne amuniinia angaaki mu milimo, khukhila babemeelesi ne bakholi bo mwami boosi.

¹²Hamani lundi atasakho ali, “Niise seng'ene niye kwini Esta, mukho omwami alangile khucha no mwami mu siakhulia sie ekolooba nisio akholile. Lundi andangile ngoboleyo muchuli no mwami.

¹³Ne kakhaba kario, kano koosi se kasangaasia tawe naba ne njililila khubona Omuyaudi Modekai oyo ne ekhaale a silibwa sio omwami.”

¹⁴Nio omukhasi wewe, Sereshi ne basaale bewe boosi bamuboolela bali, “Simikha sitonyi sie kumurongooro sisioola bifuba kamakhumi karaano. Oli busia mutikhinyi oboolele omwami asuungekho Modekai, nio ewe oche mu siakhulia sie ekolooba no mwami ne oli omusangaafu.” Likhuwa lino liasiimisia Hamani, mala arakho bakhola kumurongooro kwe khukhwirirakho.