Read lubukusu Est. 6 Bible Online

Est. 6 - lubukusu bible

Est. 6

¹Siilo esio omwami se akona tawe. Nio arumania bareere sitabu sie chingano che bikholwa bia buli busiele. Bikholwa ebio biasomwa ebweeni wo mwami.

² Sitonyi nisio basoma siabaamo niko Modekai abuula khuloondekhana ne ekwangwaani eye khukhwira omwami Ahuswero. Ekwangwaani eyo yakholwa ne Bikitana ne Tereshi, bachili babili babaliindaanga silibwa sio mwami.

³Omwami areeba ali, “siianwa siina namwe lukoosi siina nilwo khwaelesia Modekai khu makhuwa kano?” Bakholi bewe bakobosia bali, “Se siliio siosi siosi nisio bamukholela tawe.”

⁴Omwami areeba ali, “Naanu olikho khu luuya okhwo?” Nono siise esio Hamani aba nio alikho engila khu luuya lwe enje lwe lichipi. Aba echile khureeba omwami ke khusuunga Modekai khu murongooro nikwo aba ne arekeekhe.

⁵Nio bakholi bakobosia bali, “Hamani niye oliio, emile khu luuya.” Omwami aloma ali, “Lekha engile mukari.”

⁶Nio Hamani engila mukari. Omwami amureeba ali, “Siina nisio nyala nakhola khu mundu niye nenya khukoosia.” Hamani akanakana mu mwoyo mwewe ali, “Nono aba naanu niye omwami enya khukoosia lukali ne khali ese?”

⁷Nio Hamani akobosia omwami ali, “Kano niko okhoyeele wakholela omundu niye wenya khukoosia:

⁸Lekha chingubo che bubwami nicho omwami efwaranga chireerwe. Lundi reera efarasi niyo omwami akeendelaangakho, elikho limili lie bubwami.

⁹Bukula mulala khu bemeelesi bowo be efuma mala omuelesie engubo eye bubwami ne efarasi. Lekha omwimeelesi oyo afware omundu niye omwami enya khukoosia. Ne lekha amuniinie khu farasi mala amubisilie akari we lukoba. Lekha omwimeelesi oyo alaangilile ebweeni wo omundu oyo ali, ‘Kano niko kakekholekha khu mundu niye omwami enya khukoosia.’ ”

¹⁰Mala omwami aboolela Hamani ali, “Khola khangu obukule chingubo ne efarasi nga ne olomile mala okhole orio khu Modekai Omuyaudi owikhaale a silibwa sio mwami. Okhalekhakho khukhola buli siindu nisio olomile tawe.”

¹¹Nio Hamani abukula engubo eye bubwami ne efarasi ne khufwara Modekai. Akhola Modekai aniina khu farasi, mala amukesia khubira mu lukoba akari, ne alaangilila ebweeni wa Modekai ali, “Kano niko kakekholekha khu mundu niye omwami enya khukoosia.”

¹²Nio Modekai akobola a silibwa sio mwami. Ne kakhali Hamani ayuya khucha engo ne alikho alila ne khukhwiunamila.

¹³Hamani aboolela omukhasi wewe Sereshi ne basaale bewe boosi buli siindu sisiaba ne simwekholekhekho. Mala omukhasi wewe ne bakambisi bewe bamuboolela bali, “Warakiikhe khutibia bunyali khu Modekai. Ne nga ali mulala khu Bayaudi se onyala khumukhila tawe. Ng'ali ocha khubuna.”

¹⁴Oli basiloma bario, bachili bo mwami bola mala babukula Hamani khangu bamuyila khulia siakhulia sie akolooba nisio Esta arekekha.