Read lubukusu Est. 7 Bible Online

Est. 7 - lubukusu bible

Est. 7

¹Nio omwami ne Hamani bacha khulia siakhulia ne Esta.

²Endaalo ng'ene eyo, nga baba ne balikho banywa endali, omwami areeba Esta lundi ali, “Nono kwini Esta wenya siina? Olasinyoola. Oreeba siina? Ne oreeba akhaba sitonyi sie bubwami bwase ndakhuelesia.”

³Esta akobosia ali, “Naba ne nyoolile busiime ebweeni wowo ne liaba ne likhusiimisia fukiilila undekhele bulamu bwase, ne bulamu bwe babaandu base.

⁴Babaandu base ne nase khwakusiibwe khubunisibwa, khukhwirwa, ne khukhwibililwa elala. Abanga khwakusiibwe nga nasioobi, be siseecha nende be siikhasi, andi silile busa. Sikila andi elio se liabele butinyu bunyala bwakhola nanaania omwami tawe.”

⁵Omwami Ahuswero areeba Esta ali, “Naanu owenya khukhola sisiindu nga esio sirio? Omundu yuno ali waena?”

⁶Esta amukobosia ali, “Onaania ne omusiku wefwe, ali omundu omumayaanu Hamani yuno!” Nio Hamani areenga lukali ebweeni wo mwami ne Kwini Esta.

⁷Omwami enyokha mu lirima, arura munju mwa naikara ne ndali, acha enje mu sianyi sie lichipi. Hamani arama enyuma khusaba kwini Esta khulwe bulamu bwewe sikila abona ali omwami nono aaba amukhalakile kamabi khale.

⁸Enyuma wako omwami akobola khukhwama mu sianyi, echa niio banywelanga endali. Mala anyoola Hamani akwile a ndebe eya Esta. Omwami nga abona ario, aloma mu mumilo kwe angaaki ali, “Omundu yuno enya khukwa khu Kwini ebweeni wase, mala mwichipi?” Omwami ne akhamala khuloma tawe, bachili bafuuma Hamani mumoni.

⁹Mala Haribona mulala khu bachili bo mwami, aloma ali, “Khutasa khwako Hamani abeele asimikhe kumurongooro engo wewe nikwo enya asuungekho Modekai, owareesia bulamu bwowo omwami. Ne kuli ne buleeyi bwe chimita kamakhumi kabili na chibili.”

¹⁰Omwami aloma ali, “Suunga Hamani khu murongooro okwo.” Nio Hamani asuungwa khu murongooro nikwo aaba ne arekekheele Modekai. Mala lirima lio mwami liabomba.