Read lubukusu Est. 8 Bible Online

Est. 8 - lubukusu bible

Est. 8

¹Endaalo eyo ne ng'ene omwami Ahuswero aelesia kwini kimiaandu kia Hamani, omusiku we Bayaudi kioosi. Nio Modekai acha ebweeni wo mwami sikila Esta aba abooleele omwami nga bulebe bwewe ne Modekai ne bwaba.

²Omwami abukula embete yewe eyarumikha nga kumuuri niyo aba aana khu Hamani mala akielesia Modekai. Esta akhola Modekai aba omuliindi owe kimiaandu kia Hamani kioosi.

³Mala Esta alomaloma khu mwami lundi. Amukwa mu bikele biewe, amwikoonjelela ne alila. Amusaba arusieo lirekekha limayaanu nilio Hamani Omuakaki, arekekhera Bayaudi.

⁴Omwami ekesielela Esta esiimbo eye esahabu eye bubwami.

⁵Nio Esta enyokha eema ebweeni wo mwami. Aloma ali, “Liaba ne lisiimisia omwami ne naaba ne nyoolile busiime ebweeni wowo, ne liaba ne lili lie buluungi ebweeni wowo ne naba ne khusiimiisie, lekha lilaka liaandikwe khurusiao chibarwa nicho Hamani okhwa Hamedata Omuakaki aandika khubunia Bayaudi bali mungoongo chowo choosi.

⁶Enyala nekhaliilikha ndiena khubona bali busiku bwicha khu baandu base? Enyala nekhaliilikha ndiena khubuna khwe babaandu base?”

⁷Nio omwami Ahuswero aboolela Esta ne Modekai Omuyaudi ali, “Lola, Hamani asuungilwe khu murongooro khulwe ekwangwaani yewe eye khubunia Bayaudi, ne naeele Esta kimiaandu kiewe.

⁸Nono ewe onyala waandika liosi liosi nilio wenya mu lisina lio mwami mala orekho embete erumikhanga nga kumuuri kwo omwami. Sikila likhuwa liiandiikwe mwisina lio mwami mala liarwakho kumuuri kwewe se linyala liakaluukhasibwa tawe.”

⁹Baandiki bo mwami boosi balaangwa. Kano kakholekha endaalo ekhola kamakhumi kabili na chitaru eye kumwesi kwa khataru, kuli kumwesi kwa Sibani. Likhuwa liaandikwa khuloondekhana ne koosi niko Modekai alaka. Liaandikwa khu Bayaudi, khu bakhoongo, khu bemeelesi, ne khu baruki be chingoongo choosi emia ndala ne kamakhumi kabili na saba khukhwama India khukhwola Esopia. Chibarwa chaandikwa khu buli lukoongo mu lulimi lwalwo. Ne lundi Bayaudi banyoola ebarwa yabwe mu lulomo lwabwe.

¹⁰Modekai aandikila chibarwa chino mu lisina lio mwami Ahuswero, mala achirakho kumuuri kwe embete eyo mwami. Chibarwa chailwa ne batimia chifarasi chitima lukali chicharumikhanga khu milimo kio mwami. Chifarasi chaba chachoela mu litaala lio mwami.

¹¹Mu barwa chino omwami aelesia kumunwa Bayaudi buli mu lukoba bebuusie mala boosi baliinde bulamu bwabwe. Bonake, banamae namwe lukoongo lwosi lwosi lubebwaakala. Lundi bakhoya babunie bakhasi ne babaana be babaandu babebwaakala ne khunuula kimiaandu kiabwe.

¹²Endaalo ndala yong'ene niio eyarekekhelwa Bayaudi khukhola kano mungoongo choosi cho mwami Ahuswero. Yaba endaalo eye likhumi na chitaru eye kumwesi kwe ekhumi na kibili kwa Atari.

¹³Ebarwa eyaandikwa yarusibwa nga lilaka mu buli lukoongo, yasalanisibwa khu buli mundu mu buli lukoongo. Nio Bayaudi berekekhe khukhwiyacha basiku babwe nga endaalo eyo ne yoola.

¹⁴Nio barumwa barura khuloondekhana ne lilaka lio mwami baniina khu farasi che kimilimo kio mwami mala bachitimia khangu. Lilaka lino liarusibwa mu lukoba lwa Susa.

¹⁵Modekai arura munju eyo mwami, ne afwarire chingubo che bubwami, chimbuusi ne chiwaanga, ne ekuutwa emboofu eye esahabu. Lundi aba afwarire engubo enapeenda eya katani emiuufu. Babaandu ba Susa baapa bikalakala ne khukhwikhoya.

¹⁶Khu Bayaudi sino siaba siise sie busangaafu, liliekhoya, khubona bulayi, ne lukoosi.

¹⁷Mu buli lukoongo ne mu lukoba nimwo lilaka lio mwami ne kamaandike biolanga, khwaba ne khubona bulayi ne liliekhoya, naikara ne khuola mu Bayaudi. Ne babaandu bakali mu baandu be sibala esio belaanga khuuba Bayaudi sikila baba ne buuri khu Bayaudi.