Read lubukusu Est. 9 Bible Online

Est. 9 - lubukusu bible

Est. 9

¹Lilaka lio mwami nilio alaka lienyekha likholekhe endaalo ekhola ekhumi na khataru eye kumwesi kukwalaangwa bali Atari. Eyino yaba endaalo niyo basiku be Bayaudi bebaasianga khubaula. Ne kakhali kabakaluukhanakho, Bayaudi babaula.

²Bayaudi bebuusia mungoba che chingoongo chabwe choosi cho omwami Ahuswero nio bebwaakale abo babenya khubabunia. Se abao omundu owanyala khubakhiingilila tawe. Sikila babaandu boosi baba babarire.

³Bakhoongo boosi, babemeelesi be chingoongo ne baruki, ne babemeelesi bo mwami boosi bayeeta Bayaudi sikila baria Modekai.

⁴Baria Modekai sikila aba omundu omukali mwichipi lio mwami. Lundi efuma yewe yaba yasalanila mungoongo choosi. Ne Modekai achiililila khuba ne bunyali.

⁵Nio Bayaudi beera basiku babwe ne chimbalu ne khubabunia. Lundi bakhola nga benya khwaabo ba bababiila.

⁶Mu Susa, lukoba luboofu lulweene, Bayaudi beera babaandu chimia chiraano.

⁷Beera akhaba Parishandata, Dalifoni, Asipata,

⁸Porata, Adalia, Aridata,

⁹Parimashita, Arisai, Aridai, ne Baisata.

¹⁰Abo baba Babaana ekhumi bakhwa Hamani okhwa Hamedata, omusiku owe Bayaudi. Kakhaba kario, se banuula bibiindi tawe.

¹¹Endaalo eyo neng'ene omwami aboolelwa bukali bwe babaandu babeerwa mu Susa.

¹²Omwami aboolela kwini Esta ali, “Mu Susa mwong'ene, Bayaudi beerire babaandu chimia chiraano, alala ne babaana ba Hamani likhumi. Aba nono bakholile barie mu ngoongo chichiindi! Nono wenya siina? Osaba siina lundi nisio wenya, Ne olasinyoola.”

¹³Esta akobosia ali, “Omwami nosiima, lekha Bayaudi bali mu Susa bakhole lundi kumuchuli nga niko bakholile endaalo eya luno khuloondekhana ne lilaka. Ne olake kimibili likhumi kie babaana ba Hamani ekio kisuungwe khu mirongooro.”

¹⁴Nio Omwami alaka kano kakholwe. Lilaka liarusibwa mu Susa mala kimibili likhumi kie bakhwa Hamani kiasuungwa.

¹⁵Khu ndaalo eye likhumi na chine eye kumwesi kulaangwa bali Atari, Bayaudi ba Susa babuusiana alala lundi mala beera babaandu chimia chitaru mu lukoba olwo. Ne kakhali se babanuula bibiindu tawe.

¹⁶Bakhaba Bayaudi ba baaba mungoongo cho mwami bebuusia alala khuliinda bulamu bwabwe mala banyoola bulekhuule khukhwama khu basiku babwe. Beera babaandu chielefu kamakhumi saba na chiraano ba baaba ne bababiila. Ne se banuula bibiindu tawe.

¹⁷Eyino yaba endaalo eye likhumi na chitaru eye kumwesi kulaangwa bali Atari. Khu ndaalo eyaloondakho eye likhumi na chine, bauluukha mala bakikhola khuuba endaalo eye kumwikhoyo ne naikara.

¹⁸Ne Bayaudi be mu Susa bebuusia alala khu ndaalo eye likhumi na chitaru nende eye likhumi na chine. Bakhola endaalo ekhola ekhumi na kharaano eye khuola. Bakhola endaalo eyo yaba eya naikara ne khukhwikhoya.

¹⁹Esino nisio sikila Bayaudi bamenyile mu birekere ne bakhebulilanga endaalo ekhola likhumi na khane eye kumwesi kulaangwa bali Atari. Bakikhebulilanga nga endaalo eye kumwikhoyo ne khuola ne khuelesiana biianwa bilayi.

²⁰Modekai aandika koosi kakekholekha, mala aila chibarwa khu Bayaudi ba baamenya mungoongo choosi cho mwami Ahuswero, aembi ne aleeyi.

²¹Ababoolela khukhebulila endaalo eye likhumi na chine ne endaalo eye likhumi na chiraano che kumwesi kulaangwa bali Atari nga che khuola buli kumwiiko.

²²Ababoolela ario sikila chino chaba chindaalo nicho Bayaudi banyoola buulukhi khukhwama khu basiku babwe. Kuno kwaba kumwesi nikwo bubeeleli bwabwe bwakaluukhanisibwa bwaba busangaafu ne khulila khwabwe khwaba khuola. Ababoolela khukhebulila chindaalo chino nga che khukhola naikara ne khusangaala ne khuechana biianwa alala ne khuaana biianwa khu bataambi.

²³Nio Bayaudi bafukiilisiana khukhola nga baba ne barakikha khuloondekhana nga Modekai ne abaandikila.

²⁴ Hamani okhwa Hamedata Omuakaki aaba omusiku owe Bayaudi boosi. Aba akholile ekwangwaani eye khubunia Bayaudi. Aba apa chikura nicho balaanga bali puri khurobora endaalo eye khutubundula ne khubunia Bayaudi.

²⁵Ne kakhali Esta acha khu mwami, mala omwami arusia lilaka mu maandike kaboola kali, Hamani omwene anyoole sibi nisio arekekhera Bayaudi. Niye ne babaana bewe basuungwe khu mirongooro.

²⁶Khwako balaanga chindaalo echo bali Purimu khukhwama khu likhuwa bali Puri. Bakhola bario sikila koosi niko Modekai abaandikila, ne niko babiriramo ne kakabakwakho.

²⁷Lino liakila Bayaudi bakhola kwaba kumwiima khukhebulila chindaalo chibili echo. Kumwiima kuno kwaba khunibo, khu lisaaye liabwe ne nabo boosi babaambana ne nabo. Kumwiima kuno kwaba kuli, bakhoya bakhebulile chindaalo chibili chino khuloondekhana ne kakaandikwa ne buli siise sisiaroborwa buli mwiiko ne bakhalekhakho tawe.

²⁸Chindaalo chino chenyekhana khukhebulilwa ne khuliindwa mu buli selukho, mu buli nju, mu buli lukoongo nende mu buli lukoba. Chindaalo cha Purimu chino chenyekhana khukhebulilwa mu Bayaudi boosi. Ne se chenyekha chilekhwekho khukhebulilwa mu selukho chabwe choosi tawe.

²⁹Nio kwini Esta, omukhaana owa Abihaili, alala ne Omuyaudi Modekai baandika ebarwa eye khabili khutinyilisia kamakhuwa khuloondekhana ne Purimu.

³⁰Chibarwa charumwa khu Bayaudi boosi, bali mungoongo emia ndala ne kamakhumi kabili na saba che mu bwami bwa Ahuswero. Ebarwa eyo yabamo kamakhuwa ke kumuleembe ne buliindi bulayi.

³¹Bababoolela bali chindaalo cha Purimu chino chikhoya chakhebulilwa mu biise bibiaroborwa nga Modekai ne kwini Esta babekesia. Bekesia Bayaudi nende be lisaaye liabwe khuloondekhana ne khukhweyimana khulia siise sie khusooma.

³²Lilaka lia Esta lie khutinyilisia kumwiima kwa Purimu liaandikwa mu sitabu.