Read lubukusu Khur. 10 Bible Online

Khur. 10 - lubukusu bible

Khur. 10

¹Nio Wele Omunyali Owa Bioosi aaboolela Musa ali, “Cha mala obonane ne Farao. Nalumiisie kumwoyo kwewe ne kimiooyo kie bakholi bewe, nio mbekesie nibo kamayia kano.

²Nio nyale khuboolela babaana bowo ne babechukhulu bowo nga ne naba omurafu khu Bamisiri lundi nga ne nakhola kamayia. Nio mu manye muli Ese ndi Wele Omunyali Owa Bioosi.”

³Nio Musa ne Aruni bacha khu Farao mala bamuboolela bali, “Wele Omunyali Owa Bioosi, Wele owe Baeburania areeba ali, ‘Oliloba khukhwola liina khukhwiboombia ebweeni wase? Lekha babaandu base bache, nio basaaye ese.

⁴Waaba ne oloba khulekhuula babaandu base bache, nja khureera chisike mu sibala siowo muchuli.

⁵Chiicha khufunikhila elala sibala, se aliio okhabone liloba tawe. Chiicha khulia kamasaafu koosi ke kimirongooro kiili mu mikuunda kienywe.

⁶Chiicha khwichula chinju chowo ne chinju che bakholi bowo boosi nende che babaandu bowo boosi. Chiicha khuba chisike chingali khukhilakho nicho paapa benywe ne bakuuka benywe babona khukhwama khu siise nisio barakikha khumenya mu sibala khukhwola luno.’ ” Nio Musa aarura niio Farao ali mala acha.

⁷Bakholi ba Farao baboolela Farao bali, “Omundu yuno acha khu khunaania efwe khukhwola liina? Lekha Baisiraeli bache, nio basaaye Wele Omunyali Owa Bioosi, Wele wabwe. Ewe okhoola omanya oli sibala sia Misiri siabunile tawe?”

⁸Khwako Musa ne Aruni bareerwa lundi owa Farao, mala Farao aloma ali, “Cha mala mukholele Wele Omunyali Owa Bioosi, Wele wenywe.” Ne kakhali Farao aabareeba ali, “Naanu baalacha?”

⁹Musa aamukobosia ali, “Khulacha ne baele befwe ne bakhulu befwe, ne babaana befwe basoleeli ne bakhaana. Lundi khulacha ne bibiaayo biefwe, sikila khwenyekhana khukholele Wele Omunyali Owa Bioosi e naikara.”

¹⁰Omwami Farao aaloma ali, “Naaba bali mulekhuula muche ne babaana benywe boosi aba ng'ali muli ne Wele Omunyali Owa Bioosi. Enywe muli ne sifuno simayaanu.

¹¹Tawe! Babaandu be siseecha bong'ene banyala bacha basaaya Wele Omunyali Owa Bioosi sikila liliene elio nilio mwenya.” Musa ne Aruni baoonwa barura ebweeni wa Farao.

¹²Nio Wele Omunyali Owa Bioosi aaboolela Musa ali, “Kololosia kumukhono kwowo khu sibala sia Misiri nio chisike chiche. Chiicha khwicha mala chilie buli simelwa nende buli siindu nisio kamaarara kakhonakaka tawe.”

¹³Khwako Musa aakololosia esiimbo yewe khu sibala sia Misiri, mala Wele Omunyali Owa Bioosi aakhola luucho lwama e bukwe lwaba khu sibala kumuusi okwo kwoosi ne siilo esio sioosi. Yaba oli busia luucho lwaba lwareerire chisike.

¹⁴ Chisike checha mu bipupu mala chaba khu sibala sioosi sia Misiri. Siaba sipupu sikali sie chisike. Sipupu nga esio sirio siaba siikhabonekhanakho ne se silibonekhakho lundi tawe.

¹⁵Chisike chafuunikha liloba lioosi mala chalitiimbia tiimbo. Chalia bimelwa bioosi bibiaba khu sibala alala ne bibiaamo bie khu mirongooro bioosi nibio kamaarara kakhonakaka tawe. Mbao sisiindu siosi siosi sibisi sisiarama tawe, sibeele khu murongooro namwe khu bimelwa bie mu mikuunda, mu sibala sioosi sia Misiri.

¹⁶Nio Farao aalaanga Musa ne Aruni khangu mala aloma ali, “Nakholeele Wele Omunyali Owa Bioosi, Wele wenywe ne nanywe bubwoni.

¹⁷Khwako, musaba mumbeele bubwoni bwase luno lwong'ene, mala musabile ese khu Wele Omunyali Owa Bioosi, Wele wenywe andusiekho siiukuumo sie lifwa sino.”

¹⁸Musa alekha Farao mala acha asaba Wele Omunyali Owa Bioosi.

¹⁹Nio Wele Omunyali Owa Bioosi aayuusia luucho lwe mumbo lwaba lwe kamaani lukali, lwasuta chisike mala lwachiyila chaweela mu nyanja eya Shamu. Mbao esike akhaba ndala eyarama mu sibala sia Misiri tawe.

²⁰Ne kakhali Wele Omunyali Owa Bioosi aalumia kumwoyo kwa Farao, se aalekhuula Baisiraeli bache tawe.

²¹Nio Wele Omunyali Owa Bioosi aaboolela Musa ali, “Suta kumukhono kwowo mu ngaaki, sisiilima sibeo mu sibala sia Misiri. Sisiilima sino sicha khuba sikali lukali.”

²² Khwako Musa asuta kumukhono kwewe mu ngaaki, mala sisiilima sikali siaaba khu sibala sia Misiri sioosi khu ndaalo chitaru.

²³Bamisiri se babonanakho tawe. Ne mbao akhaba mulala owarurakho munju yewe mu siise esio tawe. Ne kakhali Baisiraeli baba ne buwaanga niio bamenyanga.

²⁴Nio Farao alaanga Musa mala amuboolela ali, “Khemuche musaaye Wele Omunyali Owa Bioosi. Munyala mwacha akhaba ne bakhasi ne babaana benywe. Ne kakhali mulekhe bibiaayo bibe ano.”

²⁵Ne kakhali Musa amukobosia ali, “Okhoya okhulekhele bibiaayo nibio khunyala khwaanila Wele Omunyali Owa Bioosi, Wele wefwe chimbosio ne biianwa bie khukhwosia.

²⁶Khukhoya khwacha ne chikhaafu chefwe. Se khulalekhakho akhaba ndala enyuma tawe. Khukharumikhire bilala khu biaayo bino khusaaya Wele Omunyali Owa Bioosi, Wele wefwe. Ne ne khusiili khwolayo, se khumanya biaayo siina nibio khumurusilia nga embosio tawe.”

²⁷Ne kakhali Wele Omunyali Owa Bioosi aalumia Farao kumwoyo mala khubafukiilila bache tawe.

²⁸Farao aaboolela Musa ali, “Ndureo! Khaka nga ne onyala khakhubonakho lundi tawe! Endaalo niyo ndikhubonelakho, olifwa!”

²⁹Musa aamukobosia ali, “Nga ne oloma! Se olimbonakho lundi tawe.”