Read lubukusu Khur. 11 Bible Online

Khur. 11 - lubukusu bible

Khur. 11

¹Nio Wele Omunyali Owa Bioosi aaboolela Musa ali, Ndaruma butinyu lulala lwong'ene khu Farao ne khu baandu bewe. Ekhumaliilikha acha khumulekhuula murekukhe muche. Nga ne akhamulekhuule, akhamutimanisilie elala.

²Nono boolela Baisiraeli oli buli mundu owe siseecha namwe owe siikhasi asabe owasie kamamili ke efwesa, nende ke esahabu.

³Wele Omunyali Owa Bioosi aakhola Bamisiri baria Baisiraeli. Khutasa khwako Musa aaba omundu omukali mu sibala sia Misiri. Lundi aaba omukali ebweeni we bakholi ba Farao ne babaandu.

⁴Nio Musa aaboolela Farao ali, “Wele Omunyali Owa Bioosi aloma ali, ‘Kane mbirire mu sibala sia Misiri.

⁵Buli mwana omubele mu sibala sia Misiri alafwa. Balafwa khukhwamila khu mubele owa Farao, owila khu ndebe eye bubwami, khukhwola khu mwana omubele owo omukhasi nasioobi osieela khu lususi. Akhaba chimoosi chimbele choosi chilafwa.

⁶Ne bililo bikali bicha khuba mu sibala sia Misiri. Bililo nga ebio birio bikhabakhoo ne se biliba mu sibala sia Misiri lundi tawe.

⁷Ne kakhali akhaba embwa yong'ene se elisamila Baisiraeli namwe bibiaayo biabwe tawe. Nio omanye oli Wele Omunyali Owa Bioosi akhola bubwaukhani akari we Bamisiri ne Baisiraeli.’ ”

⁸Musa aamaliilisia ali, “Ne bakholi bowo bano boosi bakheche khwise mala banjinaamile. Balimboolela ndekukhe ne babaandu base boosi mala khuche. Enyuma wako ndirekukha.” Nio Musa alekhana ne Farao ne ali ne lirima likali.

⁹Wele Omunyali Owa Bioosi aaboolela Musa ali, “Farao se alakhurekeeresia tawe. Alaloba khu khurekeeresia nio kamayia kaase katasikhe mu sibala sia Misiri.”

¹⁰Musa ne Aruni bakhola kamayia kano koosi ebweeni wa Farao. Ne kakhali Wele Omunyali Owa Bioosi alumia kumwoyo kwa Farao mala khufukiilila khulekhuula Baisiraeli barure mu sibala siewe tawe.