Read lubukusu Khur. 12 Bible Online

Khur. 12 - lubukusu bible

Khur. 12

¹ Wele Omunyali Owa Bioosi alomaloma ne Musa ne Aruni mu sibala sia Misiri. Aababoolela ali,

²“Kumwesi kuno kulaba kumwesi kwe khunyoa kwe kumwiiko khwinywe.

³Boolela libuusiana lioosi lia Isiraeli muli kumwesi kuno ne kuli ekhumi, buli mundu akhoya arobore limeeme namwe embusi emeeme khulwe enju yewe.

⁴Kaaba bali be enju yewe ne bali batiiti khulia sisiaayo sioosi, niye ne owasie banyala bakabana sisiaayo silala. Bakabane khuloondekhana ne bukali bwe babaandu ne sikelo nisio buli mulala anyala aalia.

⁵Limeeme liseecha namwe embusi emeeme eseecha, bikhoya bibe bie bukhulu bwe kumwiiko mulala bikhalikho ne libi liosi liosi tawe.

⁶Mubibiikhe khukhwola endaalo eye likhumi na chine eye kumwesi kuno. Endaalo ng'ene eyo Baisiraeli boosi bakheere sisiaayo ekolooba, buli mundu munju mwewe.

⁷Nio babukule kamalasile mala bakaanyake khu mitalaachi kibili ne khu ngaaki khwe bisiindi bie kimiliango kie chinju nicho bacha khuliilamo bibiaayo.

⁸Bacha khwosia enyama yayo siilo esio bakilie, mala bakiliila chinyenyi chindulu ne kumukaati kukhalimo limela tawe.

⁹Mukhakilia embisi namwe endeekhe tawe. Ne kakhali kilie ne yosebwe yoosi, kumurwe, bileenge, nende bie munda biayo bioosi.

¹⁰Ne mukhakilekhakho yakona khukhwola kumutikhinyi tawe. Ne yaaba ne erama mukioosie.

¹¹Mucha khukilia muri: Mube baberekeekhe, mwifware biraaro ne chisiimbo mu makhono kenywe, mala mukilie khangu. Eli Epasaka ya Wele Omunyali Owa Bioosi.

¹²“Sikila siilo siene esio, ndabira mu sibala sia Misiri, niire buli babele boosi be babaandu ne chisaang'i. Ne khuukuuma bawele be Bamisiri boosi. Ese endi Wele Omunyali Owa Bioosi.

¹³Kamalasile khu mitalaachi kie kimiliango kalaba simanyilo khukhwekesia chinju nicho mu menyilemo. Ne mbona kamalasile, ndimubirakho ne se nja khumureerera butinyu khumubunia enywe nga ne mbukuuma sibala sia Misiri tawe.

¹⁴ Mukhoya mwakhebulila endaalo yino nga emboofu mala mukilinde nga endaalo eya naikara khu Wele Omunyali Owa Bioosi. Kikhebulile mu selukho choosi nga lilaka lia mindali.”

¹⁵Wele Omunyali Owa Bioosi aaloma ali, “Khu ndaalo saba mulalia kumukaati kukhalimo limela tawe. Khu ndaalo enyoa mukhoya murusie limela lioosi munju chenywe, sikila omundu yesi yesi aaba ne alia kumukaati kulimo limela mu ndaalo saba echo, acha khurusibwao mu Isiraeli.

¹⁶Mu ndaalo enyoa nende eya saba, mukhoyeele mwakaanane khulwe libuusiana litakatifu. Kumulimo kwosi kwosi kukhakholwa mu ndaalo ng'enecho tawe. Ne kakhali munyala mwateekha siakhulia.

¹⁷Khebulila khukhola naikara eye kumukaati kukhalimo limela tawe. Sikila yaba khu ndaalo yino niyo narusiliamo chikholo chenywe charura mu sibala sia Misiri. Mu biise bioosi bibiicha mukhoya mukhebulile endaalo yino nga lilaka lia mindali na mindali.

¹⁸Khukhwama ekolooba we chindaalo ekhumi na chine che kumwesi kwe kunyoa khukhwola ekolooba we endaalo eye kamakhumi kabili na ndala, mukhalie kumukaati kukhalimo limela tawe.

¹⁹Limela likhanyolekhanakho munju chenywe khu ndaalo saba tawe, sikila omundu yesi yesi aaba ne alia siilimo limela, omundu oyo acha khurusibwa mu Isiraeli, abeele omukwa namwe Omusaalwa owe mu sibala.

²⁰Mukhaliaakho siosi siosi silimo limela tawe. Mu bumenyo bwenywe bwoosi lia kumukaati kukhalimo limela tawe.”

²¹Musa aalaanga basaakhulu be Baisiraeli boosi mala ababoolela ali, “Yeroborera kamameeme ne chimbusi chimeeme khuloondekhana ne chinju chenywe mala mwiire khulwe Epasaka.

²²Bukula sisiaangu, mala osisiikhe mu malasile ke bibiaayo kaali mu lweelo[10], mala oakhe kamalasile khu miliango lubeka lwenje. Omundu yesi yesi akharurakho munju khukhwola kumutikhinyi tawe.

²³ Wele Omunyali Owa Bioosi alabira mu Misiri khukhwira Bamisiri. Ne alabona kamalasile khu miliango, se acha khufukiilila Malaika owe lifwa engile mu nju chenywe amwire enywe tawe.

²⁴Mukhoya mukhole naikara yino nga lilaka khwinywe ne khu lisaaye lienywe mindali na mindali.

²⁵Ne nga mulingila mu sibala nisio Wele Omunyali Owa Bioosi alaka khumuelesia, mukhoya mwakhola sikholwa sino.

²⁶Babaana benywe ne bamureeba bali, ‘Sikholwa sino sili ne sifuno siina?’

²⁷Mulibakobosia muli, ‘Eli embosio eye Epasaka eya Wele Omunyali Owa Bioosi, sikila abira khunju che Baisiraeli mu Misiri, eera Bamisiri mala alekha chinju chefwe.’ ” Baisiraeli benamia kimirwe kiabwe mala basaaya.

²⁸Nio bacha bakhola nga Wele Omunyali Owa Bioosi ne alaka Musa ne Aruni.

²⁹ Oli siilo akari, Wele Omunyali Owa Bioosi eera babaana babele boosi mu Misiri. Era khukhwamila khu okhwa Farao owaba owila khu ndebe eye bubwami, khukhwola khu mwana owo oyo owaba mu siboe. Akhaba chisaang'i chimbele choosi cheerwa.

³⁰Siilo esio, Farao, bakholi bewe, ne Bamisiri boosi benyokha. Bililo bikali biaba mu Misiri mwoosi sikila mbao akhaba munju ndala nimwo omundu akhafwa tawe.

³¹Siilo esio ne sisieene Farao alaanga Musa ne Aruni mala aaboolela ali, “Yinyokha murure mu baandu base, enywe ne babaandu ba Isiraeli. Khe muche musaaye Wele Omunyali Owa Bioosi nga ne mwalomile.”

³²Bukula bibiaayo bienywe, nga mwaloma mala murekukhe. Sabile seesi chikhabi.

³³Bamisiri baba khangu khuoona Baisiraeli barure mu Misiri. Baloma bali, “Ne busa fweesi khulafwa mwaba ne mukharekukha tawe.”

³⁴Khwako, babaandu babukula sifu ne bakharaamo limela tawe, baboela bipaakhilo biabwe mu ngubo, mala babisutila khu mabeka kabwe.

³⁵ Baisiraeli baba bakholile nga Musa ne ababoolela. Baba basabile bareebire Bamisiri kamamili ke esahabu ne efwesa, ne chingubo.

³⁶Wele Omunyali Owa Bioosi aakhola Bamisiri baria Baisiraeli mala baelesia Baisiraeli siosi siosi nisio basaba. Mu ngila yino Baisiraeli bayaaya kimiaandu kie Bamisiri.

³⁷Baisiraeli bakeenda khukhwama e Ramusesi khukhwola e Sukoti. Baba babaandu embi chielefu chimia sita be siseecha, ne okhabalilakho bakhasi ne babaana tawe.

³⁸Babaandu babaandi bakali bakhaaba Baisiraeli tawe ne kamakheese kamakali, chimbusi, ne chikhaafu bioosi biacha nabo.

³⁹Lundi baapa kimikaati kikhalimo limela tawe, khukhwama khu sifu nisio bamia e Misiri. Bakhola bario sikila barura khangu mu Misiri ne se baba ne biise bie khukhola biakhulia tawe.

⁴⁰ Baisiraeli bamenya mu Misiri kimiiko chimia chine ne kamakhumi kataru.

⁴¹Endaalo niyo kimiiko chimia chine ne kamakhumi kataru yawelamo, chikholo choosi che babaandu ba Wele Omunyali Owa Bioosi charura e Misiri.

⁴²Siilo esio Wele Omunyali Owa Bioosi abaliinda ne khubarusia mu Misiri. Nono siilo sino sisieene sili siilo nisio Baisiraeli boosi barengechanga buli mwiiko khulwe khuaana luyali khu Wele Omunyali Owa Bioosi. Lirengecha lino lienyekha khukholwa ne chiselukho choosi.

⁴³Ne Wele Omunyali Owa Bioosi aboolela Musa ne Aruni ali, “Kano kali kamalaka ke Epasaka: Omukwa akhalia khu siakhulia sie Epasaka tawe.

⁴⁴Ne kakhali nasioobi yesi yesi niye mwakula ne chirupia anyala aaliakho enyuma we khukhebwa.

⁴⁵Omuuyauuyi namwe omukholi owe kumuruungo akhaliakho tawe.

⁴⁶ Siakhulia sioosi siikhoya sialiilwa munju ndala yong'ene. Enyama yosi yosi ekharusibwa enje tawe. Namwe mukhafunakakho bikuumba bie sisiaayo tawe.

⁴⁷Baisiraeli boosi bakhoyeele bakhole naikara yino.

⁴⁸Omukeni muuyi yesi yesi ouyila mwinywe mala enya khukhola nanywe Epasaka eya Wele Omunyali Owa Bioosi, akhoya aakheba babaandu bewe be siseecha boosi. Enyuma wako anyala echa mala akhola Epasaka. Alibalwa nga Omuisiraeli omusaalwa. Ne omusiinde akhaliakho Epasaka eyo tawe.

⁴⁹Kamalaka kano kali malala busa khu Baisiraeli ne khu bakeni ba babamenyamo.”

⁵⁰Baisiraeli boosi bakhola nga Wele Omunyali Owa Bioosi ne alaka Musa ne Aruni.

⁵¹Endaalo eyo ne eng'ene Wele Omunyali Owa Bioosi aarusia Baisiraeli khuloondekhana ne chikholo chabwe khukhwama mu sibala sia Misiri.