Read lubukusu Khur. 13 Bible Online

Khur. 13 - lubukusu bible

Khur. 13

¹Wele Omunyali Owa Bioosi aaboolela Musa ali,

² “Njaulile ese babele boosi. Buli osaalwa omubele mu Baisiraeli abeele omundu namwe esaang'i bali babaase.”

³Musa aaboolela babaandu ali, “Khebulila endaalo yino, endaalo niyo mwarurira e Misiri, abuundu niio mwaba banasioobi. Sikila kamaani ka Wele Omunyali Owa Bioosi niko kakamurusia enywe khukhwama abuundu ano. Mukhalia kumukaati kulimo limela tawe.

⁴Luno mu mwesi kwa Abibu mulikho murura mu Misiri.

⁵Wele Omunyali Owa Bioosi akhamwolisie mu sibala sie Bakanaani, Bahiti, Baamori, Baifi, ne Bayebusi, nisio echubila bakuuka benywe khumua enywe. Sibala nisio kamabeele ne bubuukhi biseleetekhanga. Ne mwolilemo, mukhoya mwakhola naikara yino mu mweesi kuno.

⁶Chindaalo saba mulalia kimikaati kikhalimo limela tawe. Ne khu ndaalo ekhola saba naikara ya Wele Omunyali Owa Bioosi echa khubao.

⁷Lia kimikaati kikhalimo limela tawe mu ndaalo saba. Mukhabonekhakho ne kumukaati kulimo limela, namwe limela likhabonekhakho mwinywe mu maloba kenywe koosi tawe.

⁸Khu ndaalo eyo oliboolela omwana wowo oli, ‘Kano koosi kekholekha sikila niko Wele Omunyali Owa Bioosi aakholela nga ne narura e Misiri.’

⁹Naikara yino eliba likhebusia khwiwe nga sisiindu siboelwe khu mukhono kwowo namwe mu bweeni mwowo. Lundi naikara yino elimukhebusia khulomaloma kamakhuwa ka Wele Omunyali Owa Bioosi, sikila aabarusia e Misiri ne kamaani kewe kamakali.

¹⁰Khwako olaloonda lilaka lino mu siise sialio sisiarebwao buli mwiiko.”

¹¹“Wele Omunyali Owa Bioosi acha khumureera mu maloba ke Bakanaani, niko echubila enywe ne bakuuka benywe. Ne acha khumuelesia enywe,

¹² mukhoya mwara alubeka khu Wele Omunyali Owa Bioosi bibele bioosi. Buli sibele siosi siosi sie chiuunwa sili sia Wele Omunyali Owa Bioosi.

¹³Ne okhoya osikule buli punda embele ne limeeme. Ne okheenya khukisikula tawe, kiborore likosi lifunikhe. Okhoya wasikula buli mwana wowo omusoleeli omubele.

¹⁴Biise bibiicha omwana wowo omusoleeli ne alireeba ali, sino sili ne sifuno siina? Olimukobosia oli, ‘Wele Omunyali Owa Bioosi akhurusia efwe mu Misiri ne kamaani kamakali khukhwama mu banasioobi.

¹⁵Nga Farao ne aluma kumwoyo aaloba khu khufukiilila efwe khuche, Wele Omunyali Owa Bioosi eera buli sibele mu sibala sia Misiri. Eera babele be babaandu ne bibele bie chisaang'i. Esio sikila ne khuaana bibele bioosi nga chimbosio khu Wele Omunyali Owa Bioosi. Ne kakhali babaana babele khubasikula.’

¹⁶Sino sicha khuba nga simanyisio khu mukhono kwowo ne khu bweeni bwowo khukhwekesia mbo Wele Omunyali Owa Bioosi aakhurusia mu Misiri ne kamaani kewe kamakali.”

¹⁷Nga Farao ne alekhuula babaandu bacha, Wele se afukiilila babirire khu ngila eye mu sibala sie Bafilisiti tawe, akhaba niyo ne yaba enyiimbi. Sikila Wele aloma ali, “Bakhakhola bario bakaluukhana ne babona liie, mala bakobola e Misiri tawe.”

¹⁸Ne kakhali Wele aabayilila khu ngila eye mu sichiimi elola lubeka lwe Nyanja eya Shamu.[11] Baisiraeli baba bafwariire elala bulwaani bwabwe berekeekhe liie.

¹⁹ Musa aabukula kamakuumba ka Yosefu acha nako. Yosefu aba aakhola Baisiraeli bechuba. Aaloma ali, “Wele alibakhebulila, ne mukhoya musute kamakuumba kaase khukhwama abuundu ano.”

²⁰Baisiraeli ne bama e Sukoti bacha Etamu, khu ndulo khwe sichiimi.

²¹Kumuusi Wele Omunyali Owa Bioosi aabarangirira ne njeko eye lifuumbi khubekesia engila, ne siilo aabarangirira ne njeko eye kumulilo khubawa buwaanga, nio banyale khukeenda siilo ne kumuusi.

²²Enjeko eye lifuumbi yaba buli lwosi ebweeni we babaandu kumuusi, ne enjeko eye kumulilo siilo.