Read lubukusu Khur. 14 Bible Online

Khur. 14 - lubukusu bible

Khur. 14

¹Nio Wele Omunyali Owa Bioosi aaboolela Musa ali,

²“Boolela Baisiraeli bakoboleyo mala bape ekambi ebweeni wa Pi-hairoti, akari wa Mikitoli ne nyanja eya Shamu. Bakhoya bape ekambi ebweeni wa Baali-sefoni.

³Farao acha khwibaasia ali Baisiraeli balikho babubuukila mu sibala lundi ali sichiimi siabakhingiliile.

⁴Ndalumia kumwoyo kwa Farao ne acha khubaloondakho. Ne liula liase khu Farao ne banamae bewe boosi licha khundeerera ese efuma. Nio Bamisiri bacha khumanya bali Ese ndi Wele Omunyali Owa Bioosi.” Mala Baisiraeli bakhola bario.

⁵Nga omwami owa Misiri ne aboolelwa ali babaandu beluukhe, niye ne bakholi bewe bakaluukhasia chinganakani chabwe baloma bali, “Siina nisio khukholile sino? Khwalekhile Baisiraeli bachiile. Khwatibiisie bakholi befwe.”

⁶Nio Farao aarekekha likaari liewe lie liie. Aabukula banamae bewe alala ne naye.

⁷Lundi aabukula kamakaari ke liie chimia sita kakaroborwa, ne kamakaari kakaandi koosi ke sibala sia Misiri alala ne banamae bakhulu buli khu likaari.

⁸Wele Omunyali Owa Bioosi alumia kumwoyo kwa Farao omwami owa Misiri, mala Farao atima khu Baisiraeli. Ne kakhali Baisiraeli barekukha ne bakheembeelelakho tawe.[12]

⁹Banamae be sibala sia Misiri boosi alala ne chifarasi, ne kamakaari, kabwe batima khu Baisiraeli mala ba banyoola embi ne nyanja eya Shamu a Pi-hairoti ebweeni wa Baali-sefoni. Baba bapile abwenao ekambi.

¹⁰Baisiraeli nga babona Farao ne banamae bewe ne balikho becha baria lukali mala balilila Wele Omunyali Owa Bioosi abayeete.

¹¹Baboolela Musa bali, “Abeele biliindwa mu Misiri se bilimo tawe sikila ne wakhurusiisieyo khufwiile mu sichiimi? Siina nisio okhukholeele sino khulwe khu khurusia efwe mu Misiri?

¹²Se kali kano niko khwakhuboolela ne khuli mu Misiri khuli khulekhe busa mala khuchiililile khuba banasioobi be Bamisiri? Bwakhabeele bulayikho khuba banasioobi ebweeneyo khukhila khufwila mu sichiimi muno.”

¹³Ne Musa aboolela babaandu ali, “Mukharia tawe! Yiima busa, ne kane mubone buonia nibwo Wele Omunyali Owa Bioosi acha khumuelesia enywe luno. Bamisiri nibo mubona bano se mucha khubabona lundi tawe.

¹⁴Wele Omunyali Owa Bioosi acha khumupanila, ne mukhoya musile busa.”

¹⁵Wele Omunyali Owa Bioosi areeba Musa ali, “Siina ne undilila? Boolela babaandu ba Isiraeli bachiililile ebweeni ne lukeendo.

¹⁶Suta angaaki esiimbo yowo, mala okiekesielele khu nyanja okabukhasiemo kameechi, nio Baisiraeli bambukhile khu liloba liliomu mu nyanja.

¹⁷Ne nja khukhola kimiooyo kie Bamisiri kilume nio bamuloondekho mu nyanja. Ne nja khunyoola efuma sikila Farao ne banamae bewe boosi, kamakaari kewe, ne babaandu bewe batimia chifarasi.

¹⁸Ne malile ndio, Bamisiri balimanya bali, Ese ndi Wele Omunyali Owa Bioosi.”

¹⁹Nio Malaika owa Wele, owaba ebweeni we banamae ba Isiraeli, aakobola enyuma. Enjeko eye lifuumbi yosi yakobola enyuma wabwe yaba

²⁰akari we Bamisiri ne Baisiraeli. Lifuumbi liareera sisiilima khu Bamisiri. Ne kakhali liakhosiela Baisiraeli. Banamae be Bamisiri se banyala khukhwimbiya Baisiraeli tawe.

²¹Musa aakololosia kumukhono kwewe khu nyanja, mala Wele Omunyali Owa Bioosi auucha ekhuungu esiro eye ebukwe siilo sioosi. Ekhuungu eyo yakhola engila enyomu yabonekhana mu nyanja, ne kameechi kakabukhanamo.

²² Baisiraeli bambukhila khu liloba libalakafu, batikiywa chimbeka chombi ne kamasiisi ke kameechi.

²³Bamisiri baabatimakho mala bengila mu nyanja ne chifarasi chabwe, kamakaari nende batimia chifarasi.

²⁴Oli makhelebeende, Wele Omunyali Owa Bioosi aalola banamae be Bamisiri asi khubirira munjeko eye kumulilo ne lifuumbi mala abakoyania.

²⁵Akhola kimikuu kie kamakaari kiaanda. Nio Bamisiri baloma bali, “Wele Omunyali Owa Bioosi alikho apanila Baisiraeli khukhuula efwe. Lekha khwilukhe!”

²⁶Wele Omunyali Owa Bioosi aboolela Musa ali, “Kololosia kumukhono kwowo khu nyanja, nio kameechi kakobole khu Bamisiri, khu makaari kabwe ne khu batimia chifarasi babwe.”

²⁷Khwako Musa aakololosia kumukhono kwewe khu nyanja. Oli bwasia, kameechi kelao mu bweyaangu bwako. Bamisiri bakhaka khukhwibacha kameechi. Ne kakhali Wele Omunyali Owa Bioosi abunia Bamisiri mu nyanja.

²⁸Kameechi kakobola mala kafuunikha kamakaari, batimia chifarasi, ne banamae boosi be Bamisiri ba baba ne baloondile khu Baisiraeli mu nyanja. Mbao akhaba mulala khu nibo owarama tawe.

²⁹Ne kakhali Baisiraeli bakeenda khu liloba liliomu ne batikiiywe chimbeka chombi ne kamasiisi kabili ke kameechi.

³⁰Khwako Wele Omunyali Owa Bioosi aaonia Baisiraeli khukhwama khu Bamisiri endaalo ng'eneyo. Baisiraeli babona Bamisiri bafwiile, bali khu sikingiki sie nyanja.

³¹Nga Baisiraeli ne babona kumulimo kumuboofu nikwo Wele Omunyali Owa Bioosi aakhola khu Bamisiri, bamuria mala bamusuubila niye ne omukholi wewe Musa.