Read lubukusu Khur. 15 Bible Online

Khur. 15 - lubukusu bible

Khur. 15

¹ Nio Musa ne Baisiraeli bembela Wele Omunyali Owa Bioosi kumwenya kuno: “Ndembela Wele Omunyali Owa Bioosi, sikila aanyolile bukhili mu luyali, efarasi no mundu ookitimia, abimwaatile mu nyanja.

² Wele Omunyali Owa Bioosi ali kamaani kase ne kumwenya kwase. Abeele buonia bwase. Yuno ali Wele wase, khamufumie. Wele owa paapa wase, khamuelesie luyali.

³Wele Omunyali Owa Bioosi ali omunamae. Wele Omunyali Owa Bioosi lili lisina liewe.

⁴“Kamakaari ke liie ka Farao ne banamae bewe, amwaata mu nyanja. Ne banamae bewe bakhulu balayi, besiikhile mu nyanja eya Shamu.

⁵Kameechi kakechuule kabafuuma, besiikha mu lusiba nga libaale.

⁶“Kumukhono kwowo kumuseecha, Ee Wele Omunyali Owa Bioosi, kuli ne kamaani. Kumukhono kwowo kumuseecha, Ee Wele Omunyali Owa Bioosi kuula omusiku.

⁷Mu bukali bwe kamaani kowo, oula basiku bowo, ewe orumanga lirima liowo, liboosia nga kumulilo ne kwosia lukhaanja.

⁸Khulwe khufua kumuuya khwowo, kameechi kebuusia alala, enyanja yebuusia alala mu situumi, kameechi ke lusiba kaandalala asi we enyanja.

⁹Omusiku aloma ali, Ndabatimakho mbanyoole. Ndakabaniamo kimiaandu kiabwe, mala mbukule bioosi nibio nenya. Ndachoola embalu yase, mala mbabunie.

¹⁰Ewe wakhola embeo yowo yaucha, mala enyanja yabafuuma, besiikha nga sibia mu meechi kamakali.

¹¹“Naanu mu bawele ooli nga ewe, Ee Wele Omunyali Owa Bioosi? Naanu ooli nga ewe, ooli omutakatifu lukali, onyala aakhola bikholwa bie khuukia ne kamayia?

¹²Ewe wasuta kumukhono kwowo kumuseecha, mala liloba liabamila.

¹³Warangiriire babaandu nibo wasikula, mu busiime bukhawa tawe. Wabarangirira ne kamaani kowo, khukhwola mu maloba kowo kamatakatifu.

¹⁴Babaandu be chikholo bauliile, ne balikho barenga. Bireengo biaamba Bafilisiti.

¹⁵Babemeelesi ba Edomu barangaraarwe. Babemeelesi ba Moabu, literema liabaambile. Bamenywa ba Kanaani boosi bafwiile kumwoyo.

¹⁶Literema ne buuri biabechilekho, khulwe kamaani kowo, basilile busa nga libaale, khukhwola nga babaandu bowo nibo wakula, Ee Wele Omunyali Owa Bioosi, ne babira.

¹⁷Okhabengisie, mala obabiaale khu sikulu siowo sisieene, Ee Wele Omunyali Owa Bioosi, abuundu niio warobora omenyeo, Ee Wele Omunyali Owa Bioosi, Abuundu Atakatifu niio wamweene wombakha.

¹⁸Wele Omunyali Owa Bioosi akhamiie mindali na mindali.”

¹⁹Baisiraeli bambukha enyanja khu liloba liliomu. Ne kakhali nga kamakaari ne chifarasi cha Farao ne bachitimia bengilamo, Wele Omunyali Owa Bioosi aakobosia kameechi, mala kabafuuma.

²⁰Nio Omung'oosi Miriamu, Omukooko owa Aruni, aabukula etamburini yewe, mala bakhasi boosi bamuloondakho, baapa chitamburini ne khukhina.

²¹Miriamu abembela ali, “Yimbila Wele Omunyali Owa Bioosi, sikila aniinisiibwe mu luyali, amwaatile mu nyanja chifarasi nende bachitimia.”

²²Nio Musa arangirira Baisiraeli khukhwama khu nyanja eya Shamu bacha mu sichiimi sia Siuri. Bakeenda mu sichiimi khu ndaalo chitaru ne se banyoolakho kameechi tawe.

²³Nio boola abuundu alaangwa bali Mara. Ne kameechi ke ebweeneyo kaba kamalulu. Khwako se banyala khukanywa tawe. Esio siakila balaanga abuundu ao bali Mara[13].

²⁴Babaandu belung'unya khu Musa ne bamureeba bali, “Khucha khunywa siina?”

²⁵Musa aalilila Wele Omunyali Owa Bioosi, mala Wele Omunyali Owa Bioosi amwekesia sitonyi sie kumurongooro. Musa asimwaata mu meechi, mala kameechi kaaba kamalayi khulwe khunywa. Ebweeneyo Wele Omunyali Owa Bioosi abaelesia kamalaka ke khumenya mala abakhaka. Aaloma ali,

²⁶“Mwaaba ne mundiira elala mala mukhole kaali ka ng'ali ebweeni wase ne muliinda kamalaka kase, se nja khumureererakho enywe bulwaale nibwo nareerera Bamisiri tawe. Khakhole ndio sikila Ese ndi Wele Omunyali Owa Bioosi omuonia wenywe khukhwama khu bulwaale bwenywe.”

²⁷Nio boola e Elimu, niio chisebele che kameechi ekhumi na chibili chaba ne kimirongooro kie kamakheendu kamakhumi saba. Bapa ekambi a meechi ao.