Read lubukusu Khur. 16 Bible Online

Khur. 16 - lubukusu bible

Khur. 16

¹Baisiraeli bama e Elimu, mala boosi bacha mu sichiimi sia Sini siili akari wa Elimu ne Sinai. Eyo yaba endaalo eye likhumi na chiraano eye kumwesi kwe khabili khukhwama nga ne barura e Misiri.

²Baisiraeli boosi beng'ulung'unya khu Musa ne Aruni mu sichiimi.

³Baboolela Musa ne Aruni bali, “Andi Wele Omunyali Owa Bioosi akhwiirira mu sibala sie Misiri. Ebweeneyo abeele khwikhala ne khulia biuumbu bie chinyama ne kimikaati. Enywe mwakhureerire efwe mu sichiimi muno nio mukhwiire fweesi ne enjala?”

⁴ Nio Wele Omunyali Owa Bioosi aaboolela Musa ali, “Lola luno nja khumuchukhila biakhulia mweesi khukhwama mwikulu. Babaandu bakhoyeele bangale biboola endaalo ndala buli khu ndaalo. Mu ngila yino nenya khubakhaka manye ne banyala baria kamalaka kaase namwe tawe.

⁵Khu ndaalo ekhola sita berekekhe nibio bacha khwangala, mala bicha khuba bikali khukhwola khabili khukhilakho nibio bangalaanga buli ndaalo.”

⁶Khwako Musa ne Aruni baboolela Baisiraeli bali, “Luno ekolooba kane mumanye muli Wele Omunyali Owa Bioosi niye owabarusia mu Misiri.

⁷Kumutikhinyi mucha khubona luyali lwa Wele Omunyali Owa Bioosi. Sikila auliile lililung'unya lienywe khu niye. Sikila khuli naanu nio mukhwilung'unyilekho?”

⁸Nio Musa aababoolela ali, “Wele Omunyali Owa Bioosi acha khumuelesia enyama ekolooba ne kimikaati kumutikhinyi mulie mwikure. Alakhola ario sikila auliile lililung'unya lienywe likali khu niye. Efwe khuli naanu? Liling'ulung'unya lienywe se lili khwifwe tawe, lili khu Wele Omunyali Owa Bioosi.”

⁹Musa aboolela Aruni ali, “Boolela libuusiana lie Baisiraeli lioosi oli, ‘yiicha siimbi ebweeni wa Wele Omunyali Owa Bioosi, sikila auliile lililung'unya lienywe.’ ”

¹⁰Nga Aruni ne aboolela libuusiana lie Baisiraeli lioosi, bayuukha baloleelela lubeka lwe mu sichiimi. Ne lola, luyali lwa Wele Omunyali Owa Bioosi lwabonekhela mu lifuumbi.

¹¹Ne Wele Omunyali Owa Bioosi aboolela Musa ali,

¹²“Nauliile lililung'unya lie Baisiraeli. Baboolele oli, ‘Ekolooba kane mulie enyama, ne kumutikhinyi mucha khunyoola kimikaati kimikali. Nio mulamanya muli Ese ndi Wele Omunyali Owa Bioosi, Wele wenywe.’ ”

¹³Ekolooba chisiindu checha mala chechula mu kambi ne kumutikhinyi luume lwabotookhelela ekambi.

¹⁴Nga luume ne lwabalakala, bibiindu nga bikaati bitiiti biabonekha nga lifuro khu ngaaki khwe liloba.

¹⁵ Nga Baisiraeli ne babibona, se bamanya biina nibio tawe, mala bareebana bali, “Bino binaanu?” Musa aababoolela ali, “Sino sili siakhulia nisio Wele Omunyali Owa Bioosi alikho amuelesie enywe mulie.

¹⁶Lino nilio Wele Omunyali Owa Bioosi alakile: ‘buli mundu khwinywe angale nibio anyala khulia. Yangala, buli mundu endubi ndala khuloondekhana ne bukali bwe babaandu mu liiema liewe.’ ”

¹⁷Baisiraeli bakhola bario. Balala bangala bikali, babaandi bikeekhe.

¹⁸ Nga ne babikela mu ndubi, babangala bikali se baba ne bibiarama tawe, ne abo babangala bikeekhe se bataamba tawe. Buli mulala angala nibio enya.

¹⁹Musa aababoolela ali, “Omundu akhalekhakho biarama khukhwola kumutikhinyi tawe.”

²⁰Ne kakhali balala se baulila Musa tawe mala balekha biakhulia biarama khukhwola kumutikhinyi. Nga bwasia biaba biechulemo chinyeende lundi biunya bubolo. Nio Musa abaambila lirima.

²¹Buli mutikhinyi sia mulala angala bikali nga nibio anyala khulia. Ne buli nga kumuumu ne kwarafuanga, bibiarama khu liloba biayengukhanga ne biwao.

²²Khu ndaalo ekhola sita bangala biakhulia khukhwola khabili, chindubi chibili buli mundu. Babemeelesi boosi be libuusiana becha mala baboolela Musa niko babaandu bakholile.

²³ Musa aababoolela ali, “Wele Omunyali Owa Bioosi alakile ali kumutikhinyi eli ndaalo eye khuola. Eli esabato endakatifu ya Wele Omunyali Owa Bioosi. Khupa kimikaati nikio mwenya khuupa, lundi muteekhe luno nibio mwenya khuteekha. Siosi siosi sicha khurama sikhoya sialekhwa mala siabiikhwa khulwe kumutikhinyi.”

²⁴Nono, babiikha sisiarama khukhwola endaalo eloondakho nga Musa ne abalaka. Ne se sionekha namwe siabamo chinyeende tawe.

²⁵Musa aloma ali, “Lia sino khu ndaalo yino, sikila luno eli esabato eya Wele Omunyali Owa Bioosi. Luno se mucha khunyoola siosi siosi enje tawe.

²⁶Mukhoyeele mwangale biakhulia khulwe chindaalo sita, ne kakhali endaalo eya saba, eli endaalo eya sabato. Mbao siakhulia sicha khubao tawe.”

²⁷Khu ndaalo eya saba babaandu balala barura enje khukhwangala biakhulia. Ne se banyoolakho siosi tawe.

²⁸Nio Wele Omunyali Owa Bioosi aareeba Musa ali, “Mulaloba khuria kamalaka kaase khukhwola liina?

²⁹Lola! Wele Omunyali Owa Bioosi aamuelesie enywe endaalo eye sabato. Khwako, khu ndaalo ekhola sita acha khumuelesia siakhulia simala chindaalo chibili. Buli sia mulala ekhale niio ali khu ndaalo eya saba mala akharura mungo mwewe tawe.”

³⁰Nio babaandu baola khu ndaalo eya saba.

³¹ Ne Baisiraeli balaanga siakhulia esio bali Mana.[14] Siakhulia esio siaba nga lumiicho luwaanga lwe kamaemba, mala echamu yasio yaba nga kumukaati kulikho bubuukhi.

³²Musa aaloma ali, “Lino nilio Wele Omunyali Owa Bioosi alakile: ‘Lekha endubi ndala eya mana mubiikhe khulwe chiselukho chenywe choosi nio chibone siakhulia nisio namuelesia enywe ne muli mu sichiimi lundi nga namwamia e Misiri.’ ”

³³ Musa aaboolela Aruni ali, “Bukula esaachi, mala oreemo endubi ndala eya mana, mala ebiikhwe ebweeni wa Wele Omunyali Owa Bioosi khulwe chiselukho chenywe choosi.”

³⁴Aruni akira ebweeni we Lisanduku lie ndakaano nio ebiikhwe nga Wele Omunyali Owa Bioosi ne alaka Musa.

³⁵ Baisiraeli balia mana khulwe kimiiko kamakhumi kane, khukhwola nga ne boola mu sibala sinyala siamenywamo. Balia mana khukhwola nga boola khu lwakha lwe sibala sia Kanaani.

³⁶(Endubi yaba sikelo silala khukhumi sie siikula).