Read lubukusu Khur. 17 Bible Online

Khur. 17 - lubukusu bible

Khur. 17

¹ Libuusiana lioosi lie Baisiraeli liarekukha khukhwama mu sichiimi sia Sini. Bamanga abuundu alala ne bacha aandi khuloondekhana ne lilaka lia Wele Omunyali Owa Bioosi. Bapa ekambi e Refidimu, ne ebweeneyo kameechi ke khunywa se kabayo tawe.

²Khwako, Baisiraeli balomania Musa ne baloma bali, “Khue kameechi khunywe.” Musa abareeba ali, “Siina sikila ne mundomania? Siina sikila ne mukhaka Wele Omunyali Owa Bioosi?”

³Ne kakhali babaandu baba ne bulesia bukali bwe kameechi ebweeneyo mala belung'unya khu Musa. Baaloma bali, “Siina sikila ne wakhwamisia e Misiri khukhwiira efwe ne babaana befwe ne chikhaafu chefwe khulwe bulesia?”

⁴Nio Musa aalilila Wele Omunyali Owa Bioosi ali, “Khola ndiena babaandu bano? Bali siimbi khu khukhupa ese kamabaale.”

⁵Wele Omunyali Owa Bioosi aaboolela Musa ali, “Bukulakho basaakhulu balala Baisiraeli ne nawe, mala murangire ebweeni we babaandu. Bukula ne esiimbo niyo wapila luluuchi lwa Naili mala oche.

⁶Lola! Ndeema ebweeni wowo khu lwanda a Sikulu sia Sinai. Olapa lulwanda mala kameechi kalatubukhakho nio babaandu banywe.” Musa aakhola ario ebweeni we basaakhulu ba Isiraeli.

⁷Aatiuukha abuundu ao ali Masa ne Meriba.[15] Aatiuukhao ario sikila Baisiraeli balomania Musa mala bakhaka Wele Omunyali Owa Bioosi khulwe khureeba bali, “Wele Omunyali Owa Bioosi ali nafwe namwe tawe?”

⁸Nio Baamaleki becha bapana ne Baisiraeli a Refidimu.

⁹Musa aaboolela Yoshua ali, “Khuroborere babaandu mala muche mupane ne Baamaleki. Kumutikhinyi khwima khu sikulu khu ngaaki ne esiimbo eya Wele mu mukhono kwase.”

¹⁰Yoshua aakhola nga Musa ne amulaka mala aacha apana ne Baamaleki. Musa, Aruni ne Huri baniina khu sikulu.

¹¹Buli lwosi nga Musa ne aasutanga kumukhono kwewe mu ngaaki, Baisiraeli bakhilanga. Ne buli lwosi nga ne ekhisianga asi kumukhono, Baamaleki bakhilanga.

¹²Ne kakhali kamakhono ka Musa kaluilila. Nono babukula libaale bamureerera ekhalakho. Ne Aruni ne Huri basuta kamakhono kewe angaaki, mulala lubeka lulala okundi lubeka luluundi. Nono kamakhono ka Musa kaba mu ngaaki khukhwola nga enyanga ne yakwa.

¹³Khwako Yoshua aulila elala Baamaleki.

¹⁴ Nio Wele Omunyali Owa Bioosi aaboolela Musa ali, “Andika kano mu sitabu nga likhebulila. Ne boolela Yoshua kamakhuwa kano oli, ndabunisilia elala Baamaleki khukhwama khu sibala.”

¹⁵Nio Musa ombakha alutare mala akilaanga ali, “Wele Omunyali Owa Bioosi ali ependera yase.”

¹⁶Aaloma ali, “Suta angaaki ependera eya Wele Omunyali Owa Bioosi! Wele Omunyali Owa Bioosi acha khuchiililila khu khupana ne Baamaleki mindali na mindali.”