Read lubukusu Khur. 18 Bible Online

Khur. 18 - lubukusu bible

Khur. 18

¹Omusaayi owa Midiani Yetiro, paapa omukhwe owa Musa, aaulila koosi niko Wele aakholela Musa ne Baisiraeli. Aaulila nga Wele Omunyali Owa Bioosi ne abarusia mu Misiri.

² Nono Yetiro, paapa omukhwe owa Musa aba areera Sipora mukha Musa sikila beele Musa aamulekha ewabwe.

³ Sipora akobolayo ne babaana bewe babili. Mulala khu baana bewe aba bali Kerishomu,[16] sikila Musa aaloma ali, “Nabeele omuuyauuyi mu sibala siikwa.”

⁴Ne lisina lio okundi liaba bali Elieseri,[17] sikila Musa aloma ali, “Wele owa paapa wase anjeetile lundi ambonisie khukhwama khu Farao.”

⁵Yetiro aacha ne mukha Musa ne babaana ba Musa babili mu sichiimi niio Musa aaba ne apile ekambi a lukulu lwa Wele.

⁶Omundu aaboolela Musa ali, “Lola, raraao alikho echa niio oli no mukhasi wowo ne babaana.”

⁷Musa aarura acha khukhwakaanana ne raraawe omukhwe. Musa aamusikamila mala enyokha amwikwayila. Bareebana ke bulamu bwabwe nio bengila mu liiema lia Musa.

⁸Musa aaboolela Yetiro koosi niko Wele Omunyali Owa Bioosi aaba ne akholeele Farao ne babaandu ba Misiri khulwe Baisiraeli. Lundi amuboolela akhaba ke butinyu nibwo babaandu banyoola khu ngila nende nga nilwo Wele Omunyali Owa Bioosi ne aabaonia.

⁹Yetiro asangaalila kamalayi koosi niko Wele Omunyali Owa Bioosi aaba ne akholeele Isiraeli, nga ne abaonia khukhwama khu Bamisiri.

¹⁰Yetiro aloma ali, “Wele Omunyali Owa Bioosi afume, Wele omuonisie enywe khukhwama khu Bamisiri ne khu Farao.

¹¹Luno namanyile ndi Wele Omunyali Owa Bioosi ali omukali khukhila bawele babaandi boosi, sikila aonia Baisiraeli khukhwama khu Bamisiri babalekeelesia Baisiraeli.”

¹²Nio Yetiro aana siianwa sie khukhwosia ne chimbosio khu Wele. Aruni aacha ne basaakhulu Baisiraeli boosi khulia siakhulia ne paapa omukhwe owa Musa ebweeni wa Wele.

¹³Endaalo eyaloondakho Musa ekhala khuyaasia babaandu balomana. Babaandu bamwimao khukhwama kumutikhinyi khukhwola ekolooba.

¹⁴Yetiro nga ne abona koosi niko Musa aba ne akholela babaandu, amureeba ali, “Siina nisio olakholelanga babaandu sino? Siina sikila ne wikhala weng'ene ne babaandu boosi bakhwimileo khukhwama kumutikhinyi khukhwola ekolooba?”

¹⁵Musa akobosia raraawe omukhwe ali, “Khoyela khole lino sikila babaandu banjichakho khureeba lilienya lia Wele.

¹⁶Babaandu ne bali ne bulomani, banjichakho, ne khalakila omundu nowasie. Ne mbaboolela kamalaka ka Wele ne bukhalaki bwewe.”

¹⁷Nio Yetiro aloma ali, “Niko olikho okhola se kali kamalayi tawe.

¹⁸Ewe ne babaandu nibo oli nabo bano mulaluwa, sikila kimilimo kili kimisiro khwinywe. Se onyala wakikhola weng'ene tawe.

¹⁹Nono ndekeeresie! Ndakhukaambila mala Wele abe ne nawe! Cha ebweeni wa Wele khulwe babaandu mala oyile chikesi chabwe khu niye.

²⁰Okhoyeele obekisie kamalaka ka Wele ne bukhalaki bwewe ne khubenooselia nga nilwo bakhoyeele khumenya nende nisio bakhoyeele khukhola.

²¹Ne khutasa khwako, robora babaandu banyala khukhwama mu baandu bano boosi, babe nga babemeelesi be babaandu, babemeelesi be chielefu, chimia, kamakhumi karaano, ne kamakhumi. Bakhoyeele babe babaandu ba baria Wele banyala beyikinwa mala bakhanyala bafukiilila asoya tawe.

²²Lekha nibo bakhalake chikesi che babaandu biise bioosi. Banyala bakhureerera chikesi chimbandalafu, ne nibo babeene banyala bakhalaka bulomani butiiti. Elio licha khwanguya kimilimo kiowo, nga ne bacha khuyeetana busiro nawe.

²³Waaba ne okhola orio, nga Wele ne akhulaka, ocha khunyala kimilimo kiowo, ne babaandu bano boosi balaloota engo mu muleembe.”

²⁴Musa aulila likaambila lia Yetiro mala akhola koosi niko Yetiro aaloma.

²⁵Musa aarobora babaandu banyala khukhwama mu Isiraeli mwoosi mala aabakhola khuba babemeelesi khu baandu. Baba babemeelesi be chielefu, chimia, kamakhumi karaano ne kamakhumi.

²⁶Babaandu abo bakhalakanga chikesi che babaandu biise bioosi. Bareeranga chikesi chimbandalafu khu Musa ne kakhali bulomani butiiti babeene bakhalakanga.

²⁷Nio Musa alekha raraawe omukhwe aarekukha. Ne Yetiro aakobola mu sibala siewe.