Read lubukusu Khur. 19 Bible Online

Khur. 19 - lubukusu bible

Khur. 19

¹Baisiraeli bama mu sibala sia Misiri mala boola mu sichiimi sia Sinai khu ndaalo enyoa eye kumwesi kwa khataru.

²Nga baama Refidimu boola mu sichiimi sia Sinai baapa ekambi ebweeneyo. Ekambi yino yaba embi ne sikulu sia Sinai.

³Nio Musa aacha khu sikulu khukhwakaanana ne Wele. Wele Omunyali Owa Bioosi aamulaangila khu sikulu mala amuboolela ali, “Boolela Baisiraeli, lisaaye lia Yakobo oli,

⁴‘Mwaboone niko nakholela Bamisiri nende nga nilwo namusuta enywe nga efuruusi ne sutila binywinywi biayo khu ndaa, mala namureera ano khwise.

⁵ Khwako, mwaba ne mucha khundia ne khuliinda endakaano yase, mulaba babaandu base khukhwama mu kholo choosi. Mucha khuba murio sikila sibala siosi sili sisiase.

⁶ Enywe mucha khuba bubwami bwe basaayi, lundi ekholo endakatifu. Kano niko kamakhuwa niko okhoyeele oboolele babaana Ba Isiraeli.’ ”

⁷Khwako Musa eekha asi mala alaanga basaakhulu be babaandu mala ababoolela kamakhuwa koosi niko Wele Omunyali Owa Bioosi aaba ne amulakile.

⁸Nio babaandu boosi bakobosia alala bali, “Khucha khukhola koosi niko Wele Omunyali Owa Bioosi alomile,” Ne Musa ayilila Wele Omunyali Owa Bioosi likobosia lie babaandu.

⁹Ne Wele Omunyali Owa Bioosi aboolela Musa ali, “Lola, ndakhwichila mwifuumbi lisiro, nio babaandu baulile ne ndikho ndomaloma nawe mala bakhusuubile ewe wesi buli lwosi.” Musa aaboolela Wele Omunyali Owa Bioosi niko babaandu baloma.

¹⁰Ne Wele Omunyali Owa Bioosi aboolela Musa ali, “Cha mala orekekhe babaandu luno ne kumutikhinyi. Bakhoya basiinge chingubo chabwe mala berekekhe endaalo eye khataru.

¹¹Endaalo eye khataru ng'eneyo ese Wele Omunyali Owa Bioosi kheekhe asi khu Sikulu sia Sinai, niio babaandu boosi balimbona.

¹² Ra lulwaakha lubotookhelele sikulu mala oboolele babaandu oli bakhaniina khu sikulu namwe khukhwimbiya lulwakha tawe. Omundu yesi yesi aaba ne etiila khu sikulu, acha khufwa.

¹³Omundu oyo akhaapwe kamabaale namwe alaswe buyiingo. Ne omundu yesi yesi se akhamwetiilekho tawe. Abeele omundu akheerwe, ebeele esaang'i akheerwe. Ne ekhoombi ne yiipa siise sileeyi, babaandu banyala baniine khu sikulu.”

¹⁴Nio Musa ekha asi khukhwama khu Sikulu mala aacha arekekha babaandu. Khwako basiinga chingubo chabwe.

¹⁵Ne Musa ababoolela ali, “Mwirekekhe khu ndaalo ekhola khataru. Khu ndaalo eyo mundu akhabaakho no mukhasi tawe.”

¹⁶ Kumutikhinyi kwe endaalo eya khataru likukuma ne lueni ne lifuumbi lisiro khu lukulu biabao. Ne ekhoombi yapa lukali. Babaandu boosi ba baaba mu kambi baterema khulwe buuri.

¹⁷Nio Musa arusia babaandu khukhwama mu kambi bache khukhwakaanana ne Wele. Babaandu beema mu maayo mwe sikulu.

¹⁸Sikulu sia Sinai sioosi siafuumwa ne liliisi, sikila Wele Omunyali Owa Bioosi asiikhakho mu mulilo. Liliisi khukhwamakho lianiina mu ngaaki nga liliisi lie liruumbi. Sikulu sioosi siaterema lukali.

¹⁹Nga luyoka lwe khoombi ne lwachiililila khuba lukali, Musa aalomaloma mala Wele amukoboselia mu likukuma.

²⁰Wele Omunyali Owa Bioosi ekha asi khu sikulu sia Sinai, khu ndeleelwa eye sikulu. Wele Omunyali Owa Bioosi alaanga Musa ache khu ndeleerwa khwe sikulu. Musa aniina khu sikulu.

²¹Wele Omunyali Owa Bioosi aboolela Musa ali, “Yiikha asi mala okaanie babaandu ne busa bakhola bario bakhalisia lulwakha bambona mala bakali khu nibo bafwa.

²²Ne lundi lekha basaayi babeecha niio ese Wele Omunyali Owa Bioosi ndi betakaase ne busa nja khubaelesia kumunaanio.”

²³Musa aaboolela Wele Omunyali Owa Bioosi ali, “Babaandu se banyala baniina khu sikulu sia Sinai tawe, sikila ewe wamweene wakhulaka oli khure khu sikulu lulwakha mala khulutakaase.”

²⁴Wele Omunyali Owa Bioosi aamuboolela ali, “Yiikha asi mala oniine wiiche ne Aruni. Ne okhalekha basaayi ne babaandu bakhalisiakho lulwakha becha niio ndi tawe. Ne busa ndababunia.”

²⁵Nono Musa ekha asi mala aboolela babaandu niko Wele Omunyali Owa Bioosi aaba ne alomile.