Read lubukusu Khur. 2 Bible Online

Khur. 2 - lubukusu bible

Khur. 2

¹Mu siise esio omundu mulala khukhwama mu kholo eya Lawi acha aakhwa omukhasi khukhwama mu kholo yewe.

² Omukhasi oyo aesia mala asaala omwana owe sisoleeli. Nga omukhasi oyo ne abona ali omusoleeli aba owe lukoondo lulayi, aamukisa kimieesi kitaru.

³Ne nga akhilwa khumukisa khukhilakho ao, aabukula sikono sie bisele mala amaala enje wasio embula khukhiingilila kameechi kakhasiingilamo tawe. Nio araamo omwana oyo mala asira mu bisele bisiimbe bileeyi asikiingi sie luluuchi lwa Naili.

⁴Omukooko owo mwana oyo emela sinaao abone siina silamwikholekhakho.

⁵Omukhaana owa Farao eekha acha mu luuchi lwa Naili khukhwisiinga, bateendi bewe bakeendelanga khu sikiingi sie luluuchi. Omukhaana owa Farao aabona sikono mu bisele mala aruma omukholi wewe owe siikhaana khusireera.

⁶Nga ne asifuunula aabona omwana owe sisoleeli. Omwana oyo aba alikho alila, mala omukhaana owa Farao aamukholela siisa. Aaloma ali, “Yuno ali mulala khu baana be Baeburania.”

⁷Nio omukooko owo omwana oyo areeba omukhaana owa Farao ali, “Wenya nje khulangile omukhasi mueburania akhulelele omwana yuno?”

⁸Omukhaana owa Farao aamukobosia ali, “Yee, khoche.” Nio acha areera maawe owo mwana omwene.

⁹Omukhaana owa Farao amuboolela ali, “Bukula omwana yuno mala undelele. Khakhuruunge.” Nio omukhasi oyo aabukula omwana mala amulela.

¹⁰ Omwana nga ne achoa omukhasi oyo amuyilila omukhaana owa Farao. Omukhaana owa Farao amubukula aaba omwana wewe. Aamutiuukha lisina ali Musa[3], sikila aloma ali, “Namurusia mu meechi.”

¹¹ Endaalo ndala, Musa ne achoile, acha khubona babaandu bewe Baeburania mala abona nga nilwo baminikha mu khukhola kimilimo kimisiro. Lundi abona Omumisiri ne alikho aapa Omueburania, mulala khu baandu ba Musa omwene.

¹²Musa alola eyi neyi. Nga ne akhabonakho omundu yesi yesi omuboone tawe, eera Omumisiri oyo mala aamusiikha mu muyekhe.

¹³Nga ne akobolayo endaalo eya loondakho, aabona Baeburania babili balikho bapana. Aaboolela mulala owaba ne alikho arangana okundi ali, “Siina sikila ne uupa Omueburania wasio?”

¹⁴Omundu oyo aamukobosia ali, “Naanu owakhurobora ewe khuba omwami lundi omukhalaki wefwe? Wenya khu khunjira nga ne werire Omumisiri oyo?” Nio, Musa aaria mala ebaasia ali, “Khane ng'ali babaandu bamanyile sisiindu nisio nakholile.”

¹⁵ Nga Farao ne aulila kakekholekha, enya khukhwira Musa. Ne kakhali Musa elukha khukhwama khu Farao mala acha amenya mu sibala sia Midiani. Endaalo ndala, nga Musa aaba ne ekhaale a sebele,

¹⁶bakhaana saba ba Yetiro, Omusaayi owe Midiani, becha khutaa kameechi bechusie bibiindu bie khunyweseliakho bibiaayo bia paapa wabwe.

¹⁷Ne kakhali babaayi balala becha mala batimania bakhaana abo. Musa aacha abareesia, mala abanyweselia ne bibiaayo biabwe.

¹⁸Nga bakobola owa paapa wabwe Yetiro, aabareeba ali, “Siina sikila ne mukoboole khangu luno?”

¹⁹Bamukobosia bali, “Omumisiri niye okhureesiisie khukhwama khu baayi, lundi akhutayiile kameechi ne khu khunyweselia bibiaayo biefwe.”

²⁰Yetiro areeba bakhaana bewe ali, “Ali waena? Siina sikila ne mu mulekhile? Mulaange, eche khulie siakhulia naye.”

²¹Nio Musa afukiilila khumenya eyo, mala Yetiro aamuelesia omukhaana wewe Sipora aaba omukhasi wewe.

²²Sipora asaala omwana owe sisoleeli mala Musa aaloma ali, “Ese ndi omukwa mu sibala sino, khwako ndamutiuukha lisina ndi, Kerishomu.”[4]

²³Enyuma we kimiiko kimikali omwami owe Misiri aafwa. Baisiraeli baba balila khulwe kimilimo kiabwe kimisiro. Benya buyeeti mala khulila khwabwe khwolela Wele.

²⁴ Wele aulila khulila khwabwe mala aakhebulila endakaano yewe ne Aburahamu, Isaaka ne Yakobo.

²⁵Wele aabona Baisiraeli mala aamanya niko babaamo.[5]