Read lubukusu Khur. 21 Bible Online

Khur. 21 - lubukusu bible

Khur. 21

¹Wele aaboolela Musa ali, “Kano kali kamalaka niko okhoyeele oeleesie Baisiraeli.

² Ne okula nasioobi omueburania, acha khukhukholela kimiiko sita. Ne mu mwiiko kwa saba alekhuulwe busa akharuungakho sisiindu siosi siosi tawe.

³Aaba ne echa ne ali omusuumba, akobolayo ne ali omusuumba. Aaba ne echa no mukhasi wewe akobolayo naye.

⁴Ne omwami wewe aaba ne amukhweela omukhasi, mala omukhasi oyo amusaalila babaana basoleeli namwe bakhaana, omukhasi ne babaana bewe baba bo mwami wewe. Ne nasioobi oyo akhoyeele aacha yeng'ene.

⁵Ne kakhali wakana nasioobi anyala aloma ali asiima omwami wewe, omukhasi wewe, ne babaana bewe, mala se enya khulekhwa abe omulekhuule tawe.

⁶Ne akhola ario, omwami wewe acha khumuyila khu Wele. Acha khumwiimia ebweeneyo a muliango namwe khu mwitalaachi kwe enju mala amufutule liiru ne lukela. Khwako nasioobi oyo acha khuba nasioobi wewe mu bulamu bwewe bwoosi.

⁷“Omundu aaba ne akusia omukhaana wewe abe nasioobi, omukhaana oyo se acha khulekhwa, nga nasioobi owe siseecha tawe.

⁸Aaba ne akhasiimisia omwami wewe, owenya khumukhwa nga omukhasi wewe tawe, aba omwami oyo acha khumulekha asikulwe no mulebe wewe. Omwami wewe oyo se acha khuba ne bunyali bwe khumukusia khu mureende tawe sikila omwami wewe abeele se aba omusuubilwa khu nasioobi oyo tawe.

⁹Omwami oyo aaba ne akula nasioobi owe siikhasi oyo khukhwela omwana wewe omusoleeli, akhoya amukholela nga omwana wewe owe siikhaana omwene.

¹⁰Omundu aaba ne akhwa omukhasi okundi, akhaboombia biakhulia bio mukhasi omukhulu, namwe, chingubo, lundi akhalekha khuuba naye nga omukhasi wewe tawe.

¹¹Ne aaba ne akhamukholela bibiindu bitaru bino tawe, akhoyeele amulekhe ache busa mala akharuungiakho omukhasi yuno kumuruungo kwosi kwosi tawe.”

¹² “Omundu yesi yesi ouupa omundu okundi mala amwiira akhoya eerwe.

¹³ Ne kakhali aaba ne amwiira ne akhamwiluungikhe tawe, anyala amulila abuundu niio nja khumuroborera.

¹⁴Ne Omundu aaba ne eera owasie ne amwiluungikhe, mucha khumurusia khu alutare yase mala akhoya eerwe.

¹⁵“Omundu yesi yesi oupa raraawe namwe maawe akhoya erwa.

¹⁶ “Yesi yesi owiiba omundu, akhaba ne amukusia namwe anyoolekhwa ne naye, akhoya erwe.

¹⁷ “Yesi yesi olaama raraawe namwe maawe akhoya erwe.

¹⁸“Babaandu babili ne balomana mala omundu mulala aapa owasie libaale namwe sifuusi, mala alekha khumwiira tawe, ne kakhali omundu niye apile alwaale.

¹⁹Enyuma wako aba ne enyokha mala akeendela khu siimbo yewe, omundu owamupa akhoya amuruunge khulwe biise nibio omulwale atibia, mala amusilikhe khukhwola nga ne aliona. Ne kakhali owamupa oyo akheerwa tawe.

²⁰“Omundu aapa nasioobi wewe, akhaba owe siseecha namwe owe siikhasi ne siimbo, mala nasioobi afwila mu makhono kewe, omundu oyo akhoya auukuumwa.

²¹Ne nasioobi oyo ne akhafwa endaalo ng'eneyo namwe eloondakho tawe, omwami wewe se akhoya auukuumwa tawe, sikila nasioobi ali wewe.

²²“Babaandu babili ne bapana mala baumisia omukhasi owaesia enda yarura. Ne kakhali omukhasi oyo ne akhaumiiakho osi osi tawe, omundu omuumisie akhoya aruunge kumuruungo. Ne akharuunge kumuruungo nikwo omuseecha owo mukhasi enya khuloondekhana ne likhalaka lie bakhalaki.

²³Ne omukhasi omwene aaba ne aumiia, siiukuumo sicha khuba bulamu buruunga bulamu.

²⁴ Emoni eruunga moni, liliino liruunga liliino, kumukhono kuruunga kumukhono, sikele siruunga sikele,

²⁵liliosia liruunga liliosia, bukhupe buruunga bukhupe, ling'uukha liruunga ling'uukha.

²⁶“Omundu aaba ne aapa nasioobi wewe owe siseecha namwe owe siikhasi emoni mala amubofusia, akhoya alekhuule nasioobi ache khulwe khuruunga emoni yewe.

²⁷Ne aaba ne amupongola liliino, akhoya alekhuule nasioobi ache khulwe khuruunga liliino liewe.

²⁸“Euunwa yaunaka omundu owe siseecha namwe owe siikhasi afwa, ekhoya yipwe kamabaale yiirwe. Ne enyama yayo ekhaliibwa tawe. Ne kakhali omweeneyo se ali ne bubi tawe.

²⁹Ne euunwa yaaba ne yanala khuuna babaandu ne bakhakaambila omweeneyo se akiboa tawe, nio yaunaka omundu aafwa, yiipwe kamabaale efwe, ne akhaba omweeneyo yesi eerwe.

³⁰Kakhaba kario, omwene aaba ne enya khukhwisikula aonie bulamu bwewe, akhoya aruunge kumuruungo nikwo bamurakho.

³¹Euunwa yaaba ne yiira omusoleeli namwe omukhaana owo mundu, omundu owe khaafu eyo akholelwe khuloondekhana ne lilaka lino liliene.

³²Euunwa yaaba ne yiira nasioobi owe siseecha namwe owe siikhasi, omweeneyo acha khuruunga omwene nasioobi bitonyi bie efwesa kamakhumi kataru, ne euunwa eyo echa khupwa kamabaale efwe.

³³“Kaaba bali omundu afuunula liloo namwe ayaba liloo mala alekhe khu lifuunikha tawe, mala eeyi namwe epunda yo mundu okundi ekwemo,

³⁴akhoya aruunge chirupia khu mweeneyo, mala efwiile echa khuba yewe.

³⁵Ne euunwa yo mundu yaaba ne yiira euunwa yo wasie, babaandu abo boombi bacha khukusia enamu mala bakabane chirupia, lundi bacha khukabana enyama eye uunwa efwiile.

³⁶Ne liaba ne limanyikhana lili euunwa abeele eli ne kumwiima kwe khuuna ne owakibaya se akiliinda tawe, akhoyeele aane euunwa khuruunga euunwa efwiile.