Read lubukusu Khur. 22 Bible Online

Khur. 22 - lubukusu bible

Khur. 22

¹“Omundu aaba ne eeba eeyi namwe likheese mala eera namwe aakusia, akhoya aane chieeyi chiraano khuruunga eeyi ndala, ne kamakheese kane khuruunga likheese lilala. Akhoya aruunge nibio eeba. Ne aaba ne akhalikho ne sisiindu tawe, acha khukusibwa khulwe bubwifwi bwewe.

²Omwifwi ne anyoolekhwa ne alikho aatula enju siilo mala eerwa, omwirire se ali ne kumusaango kwe khuchukha sifuki tawe.

³Ne kakhali omwifwi oyo aambwa enyanga ne erurire mala eerwa, aaba omwirire oyo ali ne kumusaango. Omwifwi oyo akhoya khuruunga. Ne kaaba bali se ali ne sisiindu sie khuruunga tawe, niye omwene alakusibwa khuruunga bubwifwi bwewe.

⁴“Ne sibaywa nisio eebile esio ne sinyoolekhana mumakhono ko mwifwi oyo ne sili silamu, omwifwi oyo alaruunga khukhwola khabili, ebeele ekhaafu, epunda namwe likheese.

⁵“Omundu aaba ne akila bibaywa biaaya mu mukuunda namwe mu liruuti lie kimisabibu lio owasie, namwe alekhuula bibaywa biewe biengila mu mukuunda[18] kwo mundu okundi, akhoya aruunge biakhulia bilayi biili mwiruuti liewe lie kimisabibu ne kumukuunda kwewe omwene.

⁶“Omundu aaba ne aambia kumulilo mu mukuunda kwewe mala kumulilo kwosia bisaala kwamalatana kwola mu mukuunda kwo mundu okundi mala kwosia biakhulia biewe owaambia kumulilo omwene akhoya aruunge bibioneekhe.

⁷“Omundu aaba ne afukiilila khubiikhila omundu okundi chirupia namwe kimiaandu kiewe mala bakiibila munju mwo oyo owabiikha, omwifwi aaba ne anyolekhana, acha khuruunga khabili.

⁸Ne omwifwi aaba ne akhanyolekhana tawe, omundu owaba ne abiikha kimiaandu acha khwicha ebweeni wa Wele mala okesie ne ali niye oweeba kimiaandu kio owasie namwe tawe.

⁹“Mu musaango kwosi kwosi kwe lilomana lie kimiaandu, liakhaba ne lili lie eeyi, epunda, likheese, engubo, namwe sisiindu siosi siosi sitibile, babaandu babili balomanila khu miaandu bakheche ebweeni wa Wele. Ne niye Wele acha khuloma ali, ali ne bubi acha khuruunga okundi khukhwola khabili.

¹⁰Omundu anyala afukiilila owasie amwekekha epunda yewe, eeyi, likheese, namwe sibaywa siosi siosi amwayile. Sibaywa esio sinyala siafwa namwe siaumisibwa namwe siebwa, omundu yesi yesi ne akhaboone tawe.

¹¹Niye bekekha akhoya ache ebweeni wa Wele Omunyali Owa Bioosi mala echube ali se eeba kimiaandu kio owasie tawe. Omweenesio afukiilile sisiechubo, ne niye ekekha akhalakilwa khuruunga tawe.

¹²Ne kakhali siaaba ne sieebwa khukhwama khu niye, akhoya aruunge omweeneyo.

¹³Siaaba ne sieerwa ne chisaang'i che mundaa, akhoya areere biramirekho nga buloli. Se akhoyeele aruunge sisiriirwe ne chisaang'i che mundaa tawe.

¹⁴“Omundu ne eola owasie sibaywa mala siaumiia namwe siafwa omweenesio ne akhaliio tawe, akhoya aruunge.

¹⁵Ne elio liekholekha omweenesio ne ali nasio, owasisaba akharuunga tawe. Ne siaaba ne siabukulibwa khulwe kumuruungo, kumuruungo okwo kulisiruunga.

¹⁶ “Omundu aaba ne areeba omukhaana owe yabwana okhaselelwa tawe mala acha naye, akhoya amukhwe mala abe omukhasi wewe.

¹⁷Ne paapa wo mukhaana aaba ne alobela elala khuelesia omundu oyo omukhaana, akhoya aruunge paapa wo mukhaana chirupia chicholaana ne bukhwe bwe be eyabwaana.

¹⁸ “Omukhasi yesi yesi oloka akhoya eerwa.

¹⁹ “Omundu yesi yesi ocha khu siaayo akhoya eerwa.

²⁰ “Omundu yesi yesi oaana embosio khu wele okundi ne akhali Wele Omunyali Owa Bioosi tawe akhoya abunisibwe.

²¹ “Se mukhoyeele mwakholela omukwa kamabi namwe mwamunaania tawe sikila enywe mwesi mwaba baakwa mu sibala sia Misiri.

²²Mukhapia siibi namulekhwa yesi yesi namwe omufuubi tawe.

²³Mwaba ne mubakholela murio mala bandilila ese, ng'ali khaulile bililo biabwe.

²⁴Mwakhola murio lirima liase likhabe likali mala mwiire enywe. Bakhasi benywe baliba banamulekhwa ne babaana benywe baliba bafuubi.

²⁵ “Mwaaba ne mwikopia chirupia khu baandu base baali bataambi, mukhabakhola nga babeoli ne bakholanga tawe. Ne mukhabayiimakho bukhala tawe.

²⁶ Waaba ne obukula engubo yo wasio nga kumusiingo oli kane akhuruunge, okhoya okikobosieyo enyanga ne khaakwa tawe.

²⁷Sikila niyo yong'ene eeli sisibiimbilo siewe simuelesia luluuya. Ebiimba siina? Kaaba bali andilila ese, ndamuulila sikila Ese ndi owe siisa.

²⁸ “Se okhoyeele ofwochole Wele namwe olaame omwimeelesi owe babaandu bowo tawe.

²⁹“Okhaayilila khuaana biianwa khukhwama mu likesa liowo ne khukhwama mu ndali yowo ne bilabile tawe. “Mbelesie babaana bowo babele be sisoleeli.

³⁰Okhole orio akhaba ne chikhaafu chowo chimbele ne kamakheese. Lekha esaliilwe embele ebe ne maawe khulwe chindaalo saba, mala umbelesie khu ndaalo ekhola munaane.

³¹ “Enywe muli babaandu base babaule. Khwako mukhaliakho enyama eyiriirwe ne chisolo che mundaa tawe, mukimwaatile chimbwa.