Read lubukusu Khur. 23 Bible Online

Khur. 23 - lubukusu bible

Khur. 23

¹ “Okhalomaloma kamakhuwa niko oulilekho busa tawe. Lundi okhayeeta omundu okholile kamabi khulwe khuaana buloli bwe bubeeyi tawe.

²Okhaloonda bakali mu khukhola kamabi tawe. Ne okharusia buloli mu makhuwa kosi kosi mu khuloonda busa ke bakali tawe. Wakhola orio aba ocha khwonaka bung'ali.

³ Ne okhakholela omutaambi siisa mu musaango kwewe sikila ali omutaambi tawe.

⁴ “Waaba ne wakaanana ne khaafu namwe epunda yo musiku wowo ne etibile, kikoboselie omweeneyo.

⁵Ne obona epunda yo mundu owakhubiila ne ekonile asi khulwe bisutwa bisiro okhalekha khumuyeeta tawe. Muyeete enyosie epunda yewe.

⁶ “Okhonaka bung'ali bwe kumusaango kwo omutaambi tawe.

⁷Okharakho omundu kumusaango kwe bubeeyi tawe. Lundi okheera omundu okhali ne bubi namwe omuluungi tawe, sikila se nja khubeela omundu okhola bumayaanu nga obwo tawe.

⁸Okhafukiilila asoya tawe. Sikila asoya ebofusia babemeelesi ne khurusia babaandu khu bung'ali.

⁹ “Okhanaania omukwa tawe, omanyile nga kumwoyo kwo omukwa ne kuli. Sikila mwesi mwaba baakwa mu Misiri.

¹⁰ “Ocha khumiicha mu mukuunda mwowo khu miiko sita ne khukesa biakhulia biamwo.

¹¹Ne kulekhe kukonele mu mwiiko kukhola saba, okhakulima tawe. Bataambi banyala balia sibuukhamo, ne chisolo che mundaa nacho chinyala chalia nibio bataambi balekhamo. Khola orio ne khu mikuunda kiowo kie kimisabibu nende kie kimiseituni.

¹² “Khola kimilimo khu ndaalo sita, ne kakhali ouluukha khu ndaalo eya saba. Khola orio nio chikhaafu chowo, chipunda chowo, banasioobi bowo, ne baakwa nibo oli nabo biuluukhe.

¹³“Ba barekeerefu khukhola koosi niko muboolele. Okhalomaloma khu masina ke bawele babaandi tawe, kamasina kano kakhaamakho mu khanwa mwowo tawe.

¹⁴“Mukhakholelenge ese chinaikara chitaru mu mwiiko.

¹⁵ Khola naikara eye Ndaalo eye Kimikaati kikhalimo limela tawe. Nga ne namulaka, lia kumukaati kukhalimo limela tawe khu ndaalo saba mu siise sisiaroborwa mu mwesi kwa Abibu. Sikila kumwesi okwo nikwo mwamilamo e Misiri. Omundu akheecha ebweeni wase ne akhali ne sisiindu tawe.

¹⁶ “Kholele Naikara eye Bisali eye bibiaamo bie khunyoa bie kimilimo kiowo, kie bikesa bie mu mukuunda mwowo. Kholele naikara eye binywa kumwiiko ne kulikho kuwa, ne olikho obuusia khukhwama mu mukuunda bibiaamo bie kimilimo kiowo.

¹⁷Babaandu benywe bakhoya becha ebweeni wo Mwami WELE khukhwola khataru mu mwiiko.

¹⁸“Mukhambelesia kamalasile ke embosio alala ne kumukaati kwe limela tawe. Kamafura ke siianwa sia naikara chino kakharamakho khukhwola kumutikhinyi tawe.

¹⁹ “Reera munju ya Wele Omunyali Owa Bioosi, Wele wowo likesa lie khunyoa khukhwama mu mukuunda kwowo. “Okhateekha limeeme namwe embusi emeeme mu mabeele ka maawe tawe.

²⁰“Lola, ndaruma Malaika ebweeni wenywe amuliinde khu lukeendo mala amwosie abuundu niio murekekheele.

²¹Muulile lundi mu murekeeresie nga ne aloma. Mukhamukholela sileka tawe, sikila mwakhola murio se acha khumubeela kamabi kenywe tawe. Ali ne kamaani kase.

²²Ne kakhali mwaba barekeerefu khurekeeresia niko aloma, mala mukhole koosi niko emuboolela, aba ndaba omusiku khu basiku benywe ne khubiila abo bamubiila enywe.

²³Malaika wase alamurangirira mala amuyile enywe mu sibala sie Baamori, Bahiti, Baperisi, Bakanaani, Baifi, ne Bayebusi. Ne ndabunia babaandu bano.

²⁴Mukhenamila bawele babwe namwe mukhabasaaya tawe, lundi mukhaloonda kimiima kiabwe tawe. Ne kakhali mwonakake bawele babwe ne khutechula chinjeko che bawele babwe.

²⁵Mukhoya mukholele ese, Wele Omunyali Owa Bioosi, Wele wenywe, ne ese ndabiita chikhabi biakhulia bienywe ne kameechi ne khurusiao bulwaale akari wenywe.

²⁶Mbao omukhasi ocha khukhobokha, namwe abe omukuumba mu sibala sienywe tawe. Ndamukhola enywe mu menye lukali.

²⁷“Ndara bireengo mu baandu baali ebweeni wenywe mala ngoyanisie babaandu nibo mukhakaanane. Khakhole basiku benywe boosi bamwilukhe enywe.

²⁸Khare bireengo[19] mu Baibi, Bakanaani ne Baiti mala bamwilukhe.

²⁹Se nja khubatimania mu mwiiko mulala tawe. Nakhola ndio, sibala sinyala sianjukhwa, ne chisolo che mundaa chinyala chatasikha mala chamuminya enywe bukali.

³⁰Ne kakhali khabaoone sia batiiti, khukhwola nga ne mulitasikha mwoole munyala mwabukula sibala.

³¹Khareeo chinjakha che sibala sienywe chaame khu nyanja eya Shamu khukhwola khu nyanja eye Bafilisiti, lundi khukhwama mu sichiimi khukhwola khu luuchi lwa Efurati. Khare bamenywa be mu sibala esio mu bunyali bwenywe mala mucha khubaoona barure ebweeni wenywe.

³²Se mukhoya mwakholakho endakaano yosi yosi nabo namwe ne bawele babwe tawe.

³³Se bakhoyeele bamenye mu maloba kenywe tawe. Bakhola bario bakila mwakholela ese bubwoni sikila mwaba ne mukholela bawele babwe, ng'ali kucha khuba kumureko khwinywe.”