Read lubukusu Khur. 24 Bible Online

Khur. 24 - lubukusu bible

Khur. 24

¹Wele Omunyali Owa Bioosi aboolela Musa ali, “Yiicha niio ndi, ewe ne Aruni, Natabu, Abiiu, ne basaakhulu kamakhumi saba be Baisiraeli, mala musaayile ese sinaao.

²Ne kakhali ewe weng'ene owiicha niio ndi, babaandu nibo wichile nabo bakhanjimbiya tawe. Ne Baisiraeli bakhaniinakho becha khu sikulu tawe.”

³Musa acha aboolela babaandu kamakhuwa koosi ne kamalaka niko Wele Omunyali Owa Bioosi amuboolela. Babaandu boosi bakobosia alala bali, “khucha khukhola koosi niko Wele Omunyali Owa Bioosi alomile.”

⁴Ne Musa aandika kamakhuwa ka Wele Omunyali Owa Bioosi koosi. Oli kumutikhinyi makhelebeende, ombakha alutare mu maayo mwe sikulu mala arao kamabaale ekhumi na kabili, khuloondekhana ne chikholo ekhumi na chibili che Baisiraeli.

⁵Nio aruma basoleeli baele ba Isiraeli baana biianwa bie khukhwosia ne chimbosio che kumuleembe che chieeyi khu Wele Omunyali Owa Bioosi.

⁶Musa abukula malala khu malasile akachukha khu bibuumba, ne kakaandi akaanyaka khu alutare.

⁷Nio abukula sitabu sie ndakaano, mala asisoma babaandu ne barekereesie. Bakobosia bali, “Khularia Wele Omunyali Owa Bioosi ne khukhola koosi niko akhulakile.”

⁸ Ne Musa abukula kamalasile mala akaanyaka khu baandu. Aloma ali, “Lola kano kali kamalasile ke endakaano niyo Wele Omunyali Owa Bioosi akholile ne nanywe khuloondekhana ne kamakhuwa kano koosi.”

⁹Nio Musa, Aruni, Natabu, Abihu, ne basaakhulu Baisiraeli kamakhumi saba baniina khu sikulu

¹⁰mala babonana ne Wele owa Isiraeli. Asi wewe siabao sisialolekhana nga amukhe we kamabaale kamabuusi. Asi ao aba nga likulu likhalikho kamafuumbi tawe.

¹¹Ne Wele se akholakho basaakhulu be Baisiraeli bubi tawe. Babonana ne Wele, mala balia ne khunywa.

¹²Wele Omunyali Owa Bioosi aboolela Musa ali “Yiicha khu sikulu niio endi, mala olindilekho. Nja khukhuelesia kamabaale kabili ke kamalaka ne kamekisio niko naandika khulwe khukhwekesia babaandu.”

¹³Musa ne omukholi wewe Yoshua bacha[20], mala Musa aniina khu sikulu.

¹⁴Musa aboolela basaakhulu ali, “Khuliindile ano khukhwola nga ne khukobola. Lola Aruni ne Huri bali ne nanywe ano. Yesi yesi oli ne likhuwa, ache khu nibo.”

¹⁵Nio Musa aniina khu lukulu lwa Sinai, mala lifuumbi lialufuuma.

¹⁶Luyali lwa Wele Omunyali Owa Bioosi lwaba khu lukulu lwa Sinai, mala lifuumbi lialufuuma khu ndaalo sita, ne khu ndaalo ekhola saba Wele Omunyali Owa Bioosi alangila Musa khukhwama mu lifuumbi.

¹⁷Khu baandu Baisiraeli, libonekha lie luyali lwa Wele Omunyali Owa Bioosi liaba nga kumulilo kuburukha khu ndeleerwa khwe sikulu.

¹⁸ Ne Musa engila mu lifuumbi nga aba ne aniina khu lukulu. Amenya ebweeneyo khu ndaalo kamakhumi kane kumuusi ne siilo.