Read lubukusu Khur. 25 Bible Online

Khur. 25 - lubukusu bible

Khur. 25

¹Wele Omunyali Owa Bioosi aboolela Musa ali,

²“Boolela Baisiraeli bakholele siianwa. Bukula siianwa khukhwama khu buli mundu owirusia khukhumbaanila ese.

³Biianwa bino nibio okhoyeele obamiekho: esahabu, efwesa, kumukasa,

⁴buusi bubuusi, bunapeenda, bubesemu, engubo eya katani eyanabwa bulayi, engubo eye bufuumbo bwe chimbusi,

⁵kamasieelo ke kamamiiku kaakhilwe erangi embesemu, kamasieelo ke chimbusi, kumurongooro kumunyaali,

⁶kamafura ke mu chitaa, bibiindu bing'ayilisia bulayi khulwe mumafura ke khuchukha khu barobore ne khulwe bupaani,

⁷kamabaale ke bukusi, ne kamabaale kakaandi ke khurekekha mu efodi nende khulwe ngubo eye mu sifuba.

⁸Lekha babaandu bakholele Abuundu Atakatifu, nio embamenyemo.

⁹Khola liiema litakatifu lino ne bibiindu biamwo bioosi khuloondekhana ne sifwaani nisio kane emwekesie.

¹⁰“Lekha bakholele lisanduku khukhwama khu murongooro kumunyaali, buleeyi bikele bibili ne nusu, bukhiikha sikele silala ne nusu, ne buniina sifuba silala ne nusu.

¹¹Lifuunikhe ne esahabu yong'ene mukari ne nje ne olimalilile chimbeka choosi ne esahabu.

¹²Ne okhang'oone kamakhono kane ke khulisuta kae esahabu mala okikakie khu bikele bialio bine, kamakhono kabili buli lubeka.

¹³Khola chinguulo che kumurongooro kumunyaali ochifuunikhe ne esahabu.

¹⁴Ne ochire mu mikhono kibili buli lubeka lwe lisanduku chisute lisanduku.

¹⁵Chinguulo chirame mu makhono ne chikharusibwamo tawe.

¹⁶Ne olara mwisanduku kamalaka niko nja khukhuelesia.

¹⁷ “Khola sifuunikho sie esahabu yong'ene. Ekhoya ebe buleeyi bikele bibili ne nusu ne bukhiikha sikele silala ne nusu.

¹⁸Ne khola chikerubi chibili khukhwama khu esahabu. Bikhole khundulo khwe chimbeka chombi che sifuunikho.

¹⁹Chikerubi chibili echo chikhoya chaba siindu silala ne sifuunikho. Khola ekerubi ndala lubeka lulala ne ekiindi lubeka luluundi lwe sifuunikho.

²⁰Chikerubi chikhoya chaba ne chindaa chacho angaaki mala chifuunikhe sifuunikho. Chikerubi echo chikhoya chiloleelelane khu sifuunikho.

²¹Ra sifuunikho khungaaki khwe lisanduku. Ne ra mu lisanduku omwo kamalaka niko endikho nja khukhuelesia.

²²Nja khumwakaanana ebweeneyo. Ne khukhwama khu sifuunikho akari we chikerubi chibili che chindaa khu Lisanduku lie ndakaano, nja khukhuelesia kamalaka kase koosi khulwe babaandu ba Isiraeli.

²³“Khola emesa eye kumunyaali, eye buleeyi bikele bibili, bukhiikha sikele silala, ne buniina sifuba silala ne nusu.

²⁴Kifuunikhe esahabu yong'ene mala okimalilile ne esahabu okibotookhelesie.

²⁵Khola kumutalaachi kubotookhelesie emesa kukwoola bubalaayi sikalabo silala mala omaale esahabu khubotookhelesia kumutalaachi.

²⁶Khola kamakhono kane ke esahabu khulwe emesa mala okiboe khu mbeka chine, niio bikele bine bili.

²⁷Kamakhono kakhoya kaba ambi ne kumutalaachi nio kabe kamakhono ke khuramo chinguulo chisuta emesa. Bikhoya biaba ambi ne lukhingiki.

²⁸Khola chinguulo che kumurongooro kumunyaali mala ochifuunikhekho esahabu. Emesa ekhasutwe ne chinguulo chino.

²⁹Kholela emesa chipwakuli, ne bibuumba, khulwe bupaani, lundi khola bibuumba ne kimieendo khulwe khuchukha biianwa bie khunywa. Ebino bioosi bikhoya biakholwa khukhwama khu esahabu yong'ene.

³⁰ Kimikaati kie khubao khwa Wele Omunyali Owa Bioosi kikhoya kirebwe khu mesa ebweeni wase buli lwosi.

³¹“Khola siteetwe sie taa sie esahabu yong'ene. Sibale siasio ne kumukhono kwasio bikhoya bikholwe khukhwama khu esahabu embase. Bikoombe biasio ne bimuli biasio bikhoya bibe sisiindu silala ne siteetwe.

³²Chisakia sita chiicha khukhwama khu mbeka che siteetwe, chitaru khukhwama buli lubeka, chitaru lubeka lulala ne chitaru lubeka luluundi.

³³Bikoombe bitaru bikholwe nga bimuli bie kumurongooro alimondi ne bituumi biasio alala ne bimuli biasio khu lusakia lulala, ne lusakia luluundi lwosi lube lurio.

³⁴Ne khu siteetwe sie taa sisieene bikhoya biabakho bikoombe bine bibiakholwa nga bimuli bie kumurongooro kwa alimondi alala ne bituumi ne bimuli.

³⁵Buli simuli silala siikhoya siaba asi owa buli chisakia chibili khukhwama mu siteetwe. Ne simuli siikhoya siafwaanana siakholwa khukhwama khu siindu silala ne sie siteetwe.

³⁶Bimuli ne chisakia chabio, ne siteetwe sie taa bikhoya biakholwa khukhwama khu siindu silala. Bioosi bibe bibiabaswa khukhwama khu esahabu yong'ene.

³⁷Khola chitaa saba khulwe siteetwe mala ochire angaaki nio chikhosie ebweeni we siteetwe.

³⁸Chindaambi chayo ne chisahani chayo chibe che esahabu yong'ene.

³⁹Khola siteetwe khukhwama khu sitonyi silala sie sahabu yong'ene alala ne bibiindu bino bioosi.

⁴⁰ Khaka nga ne onyala mala obone oli wakholile bibiindu bino khuloondekhana ne sifwaani nisio nakhwekesia khu lukulu.