Read lubukusu Khur. 26 Bible Online

Khur. 26 - lubukusu bible

Khur. 26

¹[21] “Khutasa khwako, khola mukari mwe liiema litakatifu chipasia ekhumi che ngubo eya katani eyanabwa bulayi ne buusi bubuusi, bunapeenda, ne bubesemu. Naba khu pasia chino chikerubi mu busicha.

²Khola buli engubo eya katani, buleeyi bikele kamakhumi kabili na munaane ne bukhiikha bikele bine. Chipasia choosi chikhoya chalekhaana, buleeyi ne bukhiikha.

³Nabila alala chiraano lundi nabila chiraano chichiindi alala orio.

⁴Ne rakho chimbete che ngubo embuusi khu likemo lienje lia buli sitonyi sie enje sie chisuuka nicho onabiile alala.

⁵Ra chimbete kamakhumi karaano khu situumi silala sie chisuuka ne chimbete kamakhumi karaano obibotookhelesie khu bumaliilisi bwe situumi sie khabili mala chimbete echo chiloleelelane.

⁶Khola chingaki che esahabu kamakhumi karaano mala ochirumikhire khuboa alala bipupu bie chipasia bibili bie liiema litakatifu nio libe lilala.

⁷“Lundi khola sifuunikho khukhwama khu bufuumbo bwe chimbusi obiimbile enje we liiema. Chipasia chino choosi alala chibe chipasia ekhumi na ndala.

⁸Khola choosi chilekhaane, buleeyi bikele kamakhumi kataru ne bukhiikha bikele bine.

⁹Olara alala chipasia chiraano chong'ene, ne chichiindi sita ochire alala. Fumbamo khabili esuuka ekhola sita eleleeche ebweeni we liiema litakatifu.

¹⁰Khola chimbete kamakhumi karaano khu likemo lie pasia emaliilisi lubeka lwe enje lwe chipasia che khunyoa chiraano. Lundi khola orio khu pasia chichiindi chosi.

¹¹Khola chingaki kamakhumi karaano che kumukasa mala ochikakie mu mbete oambaanie liiema litakatifu nio libe lilala.

¹²Ne Suunga sitonyi sie chipasia siramire e mukoongo we liiema litakatifu.

¹³Sitonyi sie chipasia siramire, silasuungwa chimbeka chombi che liiema litakatifu mala chilifuunikhe.

¹⁴“Khola sifuunikho khulwe liiema litakatifu. Sikhole khukhwama khu masieelo kamabesemu ke kamamiiku ne chimbusi.

¹⁵“Khola kimitalaachi kie kumurongooro kumunyaali nikio emia khulwe liiema litakatifu.

¹⁶Buli kumutalaachi kukhoya kube buleeyi bikele ekhumi, ne sikele silala ne enusu bukhiikha.

¹⁷Buli kumutalaachi kube ne biaambaania bibili biaambaania alala kimitalaachi. Khola orio khu mitalaachi kioosi kie liiema litakatifu.

¹⁸Khola kimitalaachi kamakhumi kabili khulwe lubeka lwe ebunafubo we liiema litakatifu.

¹⁹Ne khola bibale bie efwesa kamakhumi kane, bibili asi owa buli kumutalaachi khulwe biaambaasia bibili.

²⁰Lundi khola kimitalaachi kamakhumi kabili khulwe lubeka lwe ebunaswa we liiema litakatifu.

²¹Ne kholela kimitalaachi ekio bibale kamakhumi kane bie efwesa, buli bibili asi owa buli kumutalaachi.

²²Khola kimitalaachi sita, khulwe enyuma we liiema litakatifu lubeka lwe mumbo.

²³Lundi khola kimitalaachi kibili khulwe chikhuumbo che enyuma we liiema.

²⁴Kimitalaachi kie mukhuumbo kino kikhoya kiakabukhanamo asi, ne kakhali kikhoya kiaambanisibwa mungaaki mu mukhono kwe khunyoa. Kimitalaachi kibili ekio kikhoya kiakholwa mungila yino. Kiombi kilaba chi khuumbo chibili.

²⁵Khwako kicha khuba kimitalaachi munaane alala ne bibale biakio bie efwesa ekhumi na sita. Buli bibale bibili asi owa buli kumutalaachi.

²⁶“Khola kimilapa khukhwama khu murongooro kumunyaali. Kiraano khulwe kimitalaachi kie lubeka lulala lwe liiema,

²⁷kiraano khulwe kimitalaachi kie lubeka luluundi lwe liiema, ne kiraano khulwe kimitalaachi kie lubeka lwe mumbo, enyuma we liiema.

²⁸Khola kumulapa kwe akari kubire akari we kimitalaachi lubeka lulala lwe liiema khukhwola lubeka luluundi.

²⁹Fuunikha kimitalaachi ne esahabu ne okikholele kamakhono ke esahabu khutiililila kimilapa. Nio ofuunikhe, kimilapa kiosi ne esahabu,

³⁰Yimisia liiema khuloondekhana ne lirekekha nilio wokesebwa khu sikulu.

³¹“Khola epasia eye buusi bubuusi, bunapeenda, bubesemu ne engubo eya katani eyanabwa bulayi. Epasia eyo ekhoya enabilwekho chikerubi mu busicha.

³²Suunga epasia yino ne biaambaania bie esahabu khunjeko chine che kumurongooro kumuyaali chichafuunikhwa ne esahabu. Ne chire mu bibale bie efwesa bine.

³³ Ne suunga epasia eyo mungakia chayo. Reere Lisanduku lie ndakaano eye kamalaka mala olire enyuma we epasia. Epasia eyo elakabukhasia Abuundu Atakatifu khukhwama Abuundu Atakatifu Lukali.

³⁴Ra sifuunikho khu Lisanduku lie Ndakaano liili Abuundu Atakatifu Lukali.

³⁵Ne yimisia emesa enje we epasia lubeka lwe ebunaswa, ne siteetwe sie etaa lubeka lwe ebunafubo we liiema, siloleelelane ne emesa.

³⁶“Khola epasia khulwe kumuliango kwe liiema. Epasia eyo ebe eye buusi bubuusi, bunapeenda, bubesemu ne bwe engubo eya katani eyanabwa bulayi mu busicha.

³⁷Kholela epasia eyo chinjeko chiraano che kumurongooro kumunyaali mala ofuunikhe chinjeko echo ne sahabu. Akhaba chingaki chacho chosi ochifuunikhe ne esahabu. Nio ochikholele bibale bie kumukasa biraano.