Read lubukusu Khur. 27 Bible Online

Khur. 27 - lubukusu bible

Khur. 27

¹“Khola alutare khukhwama khu murongooro kumunyaali. Kikhole ebe elekhaana buleeyi ne bukhiikha. Ekhoya ebe eye buleeyi bikele biraano ne bukhiikha bwosi bikele biraano. Ne buniina bube bifuba bitaru.

²Kikholele chinjika chine khu khuumbo che chimbeka chayo chine. Chinjika echo chikhoya chaba siindu silala ne alutare. Ne obifuunikhe ne kumukasa.

³Kikholele chinyuungu khulwe likokhe, chimbako, bibuumba, chiuma, ne chinjo. Bibiindu bino bioosi bikhoya biakholwa khukhwama khu mukasa.

⁴Khola lutiimba lwe kumukasa mala ore khu khuumbo chine che lutiimba olwo kamakhono kane ke kumukasa.

⁵Ra lutiimba olwo lubeka lwe asi we likemo lia alutare, nio lutiimba olwo lwoole enusu eya alutare.

⁶Kholela alutare chinguulo che kumurongooro kumunyaali, mala ochifuunikhe ne kumukasa.

⁷Ra chinguulo echo mu makhono, chimbeka chombi cha alutare khulwe khusuta alutare.

⁸Khola alutare elangililile, eye chimbao, khuloondekhana nga ne wokesebwa khu sikulu.

⁹“Khola lumako lwe chipasia khulwe liiema. Lubeka lwe ebunafubo lumako lukhoya lwaba lwe chipasia cha katani endayi. Epasia eyo ebe eye buleeyi bikele emia ndala. Olwo lubeka lulala.

¹⁰Chinjeko che chipasia echo chibe kamakhumi kabili, ne bibale bie kumukasa kamakhumi kabili. Ne kakhali chingaki ne kimitiindi kiacho kie chinjeko bibe bie efwesa.

¹¹Akhaba lubeka lwe ebunaswa we lumako, epasia eye lumako ebe eye buleeyi bikele emia ndala chinjeko ne bibale biacho kamakhumi kabili bibe bie kumukasa. Ne kakhali chingaki ne kimitiindi bibe bie efwesa.

¹²Lubeka lwe mumbo lwe lumako chipasia chibe bukhiikha bikele kamakhumi karaano, chinjeko ekhumi ne bibale ekhumi.

¹³Bukhiikha bwe chipasia che lumako ebweeni lubeka lwe ebukwe bube bikele kamakhumi karaano.

¹⁴Chipasia khulwe lubeka lulala lwe silibwa chibe bikele ekhumi na biraano, ne chinjeko chitaru ne bibale bitaru.

¹⁵Ne lubeka luluundi lwe silibwa chipasia chibe buleeyi bikele ekhumi na biraano ne chinjeko chitaru ne bibale bitaru.

¹⁶Silibwa sie lumako sibe ne epasia ekhiinga eyoola bikele kamakhumi kabili. Epasia eyo ebe eye buusi bubuusi, bunapeenda, bubesemu ne bwe engubo endayi eya katani eyanabwa mu busicha. Epasia eyo ebe ne chinjeko chine ne bibale bine.

¹⁷Chinjeko choosi chibotookhelesia lumako chirebwekho kimitiindi kie efwesa. Chingaki chacho chosi chibe che efwesa ne bibale bibe bie kumukasa.

¹⁸Buleeyi bwe lumako lube bikele emia ndala, bukhiikha bikele kamakhumi karaano ne buniina bifuba biraano. Chipasia chikhoya chibe che engubo eya katani eyanabwa bulayi ne bibale bie kumukasa.

¹⁹Bibiindu bioosi bie mu liiema litakatifu khulwe burumikhi bwosi bwosi, chingaki choosi, ne chingaki choosi che lumako bibe bie kumukasa.

²⁰“Laka Baisiraeli bakhureerere kamafura kamalayi ke kumuseituni khulwe etaa, nio etaa eaambisibwe buli ekolooba.

²¹Aruni ne babaana bewe bakhoya baambisie e taa mu liiema lie kumuse enje we epasia eli ebweeni we Lisanduku lie Ndakaano. Ekhoya eburukhe ebweeni wa Wele Omunyali Owa Bioosi khukhwama ekolooba khukhwola kumutikhinyi. Lilaka lino likhoya liabiikhwa khulwa mindali mu Baisiraeli khulwe chiselukho chichiicha.