Read lubukusu Khur. 28 Bible Online

Khur. 28 - lubukusu bible

Khur. 28

¹“Reera Aruni wandaayo ne babaana bewe, Natabu, Abihu, Eliesa, ne Itamari niio oli. Baaule khukhwama khu baandu ba Isiraeli, nio bakholele nga basaayi.

²Nabila wandaayo Aruni chingubo chindakatifu che khumuelesia lukoosi ne lukoondo lulayi.

³Laanga babaandu basicha boosi nibo naelesia bukesi, mala obaboolele bakholele Aruni chingubo chindakatifu nio abe omwaule khukhukholela nga omusaayi mu milimo kiase.

⁴Chino nicho chingubo nicho bakhoyeele bakhole: Engubo eye mu sifuba, efodi, engubo endeeyi, ekaanjo eyanabwa mu busicha, sileemba ne kumusiipi. Banabile wandaayo Aruni ne babaana bewe chingubo che busaayi chino, nio bakholele nga basaayi.

⁵Bakhoya barumikhire buusi bwe esahabu, bubuusi, bunapeenda, bubesemu, nende bwe engubo endayi eya katani.

⁶“Lekha bakhole efodi eye buusi bwe esahabu, bubuusi bunapeenda, bubesemu ne engubo eya katani endayi. Bunabi bube bwe busicha.

⁷Efodi eyo ekhoya ebe ne bilaka bibili bie khu mabeka biaambaanie alala chikhuumbo chombi che kamabeka.

⁸Lukhoba lulwanabwa mu busicha khulwe efodi lukhoya lwanabwa khukhwama khu siindu silala. Kukhoya kukholwe ne buusi bwe esahabu, bubuusi, bunapeenda, bubesemu ne bwe engubo endayi eya katani.

⁹Bukula kamabaale kabili kamelamela mala okaandikekho kamasina ke babaana ba Yakobo.

¹⁰Kamasina ke babaana sita kaandikwe khu libaale lilala ne kamasina kakaandi sita khu libaale liliindi lilala. Ne kamasina ako kaandikwe khuloondekhana ne lisaalwa liabwe.

¹¹Aandika khu mabaale kabili ako kamasina ke ba okhwa Yakobo, nga omundu oandika kamasina khu miuuri. Nio okafuunikhe ne esahabu.

¹²Bukula kamabaale kabili ako mala okare khu bilaka bibili biili khu mabeka ka efodi. Lekha kabe nga kamabaale ke likhebulila khulwe babaana ba Isiraeli. Aruni acha khusutila kamasina kaabwe khu mabeka kewe, ebweeni wa Wele Omunyali Owa Bioosi khulwe likhebulila.

¹³Khola chinyilili chibili che esahabu chitiila kamabaale.

¹⁴Lundi khola kiminyololo kibili kimiborore nga kimikoye kie esahabu yong'ene mala okire mu nyilili che esahabu.

¹⁵“Ne naba engubo eye musifuba khulwe khurumikhira khukhola bukhalaki. Kikhole mu ngila eye busicha. Ekhoya yakholwa nga efodi ne yakholwa. Ekholwe ne buusi bwe esahabu, bubuusi, bunapeenda, bubesemu ne bwe engubo endayi eya katani.

¹⁶Ebe elekhaana buleeyi ne bukhiikha. Ebe eye chisendimita kamakhumi kabili na chine. Ebe enyala yafumbwamo khukhwola khabili.

¹⁷Kirekho chinyilili che kamabaale chine. Lunyilili lunyoa libaale libesemu lukali, linamaki ne libesemu.

¹⁸Mu lunyilili lwa khabili, lie lubookha, libuusi, ne lie kumutooba.

¹⁹Mu lunyilili lwa khataru libaale linakhanyuusi, lulwanda lumelamela ne linapeenda.

²⁰Ne mu lunyilili lwa khane, lie lubookha lukali limelamela ne lie kumutooba. Rumikhira esahabu khura kamabaale kano khu ngubo eye musifuba.

²¹Buli libaale khu mabaale ekhumi na kabili kano likhoya liaandikwakho lisina lia buli mwana owa Yakobo. Kamasina kano kabe nga kimiuuri, khulwe chikholo ekhumi na chibili.

²²Khola kiminyololo kie esahabu yong'ene kikiabororana oli kumukoye khulwe engubo eye musifuba.

²³Ne okholeele engubo eyo chimbete chibili che esahabu mala ore chimbete echo khu khuumbo chibili che silaka.

²⁴Ra kiminyololo kibili kie esahabu ekio mu mbete chibili chiili mu koona che silaka.

²⁵Chwiisilia chindulo chibili che kiminyololo khu nyilili chibili che esahabu eng'enang'ena mala obire khu bilaka bibili bie khu mabeka ka efodi ebweeni.

²⁶Nio khola chimbete chibili che esahabu mala ochichwiisilie khu likemo lie mukari lie engubo eye khu musifuba ambi ne efodi.

²⁷Khola chimbete chibili che esahabu mala ochichwiisilie ebweeni khu likemo lie bilaka bibili bie khu mabeka ka efodi mu munabo kwe lukhoba lwa efodi.

²⁸Boela alala chimbete che khu silaka sie khu sifuba ne chimbete cha efodi ne kumukoye kwe buusi bubuusi. Khola murio nio silaka sie khu sifuba sitiile khu lukhoba lundi silekhe khutebateba khu efodi tawe.

²⁹“Aruni akhasutile kamasina ke babaana ba Isiraeli mu silaka sie khu sifuba sie bukhalaki amwoyo kwewe ne alikho ne acha Abuundu Atakatifu. Kaliba kario nga likhebulila ebweeni wa Wele Omunyali Owa Bioosi buli lwosi.

³⁰ Ra Urimu ne Tumimu[22] mu silaka sie mu sifuba. Aruni acha khubisuta amwoyo kwewe ne alikho ne acha ebweeni wa Wele Omunyali Owa Bioosi. Nono Aruni akhasute bukhalaki bwe babaandu ba Isiraeli a mwoyo kwewe ebweeni wa Wele Omunyali Owa Bioosi buli lwosi.

³¹“Engubo endeeyi mukari mwa efodi ebe eye buusi bubuusi.

³²Ekhoya yaaba ne kumwanya kwe kumurwe. Kumwanya kuno kukhoyeele kubotookhelesibwe ne buusi nio efodi ekhatabukha tawe.

³³Khu likemo lie engubo eyo kholakho bifwaani bie kamatuunda kamakomanga ke buusi bubuusi, bunapeenda ne bubesemu kalibotookhelesie. Ne chikengele che esahabu chibe akari we bifwaani bie kamatuunda kamakomanga.

³⁴Buli e keengele eye esahabu ekhoya eloondekhane ne sifwaani sie lituunda likomanga. Khola murio khubotookhelesia likemo lioosi lie engubo.

³⁵Aruni akhoya efware engubo eyo ne akhola kimilimo. Chikengele chayo chipe chiuliilikhane ne alikho ne engila Abuundu Atakatifu ebweeni wa Wele Omunyali Owa Bioosi ne lundi ne arurao nio akhafwa tawe.

³⁶“Khola limili lie esahabu yong'ene mala oandikekho nga kumuuri oli ‘Endakatifu khu Wele Omunyali Owa Bioosi.’

³⁷Ne ochwiisilie limili elio khu sileemba khulwe khurumikhira kumukoye kwe buusi bubuusi. Limili elio libe sileemba ebweeni.

³⁸Aruni efwaare limili elio mala ebukulile kamabi kosi kosi kanyoolekhwa mu siianwa sitakatifu nisio Baisiraeli baleera nga biianwa biabwe bitakatifu. Limili elio libe khumurwe kwa Aruni nio biianwa ebio bifukiililwe ebweeni wa Wele Omunyali Owa Bioosi.

³⁹“Engubo eye lukoondo lulwaukhaane ebe engubo eya katani endayi, ne sileemba siosi sibe sie engubo eya katani endayi ne kakhali naba kumusiipi kwe buusi mu busicha.

⁴⁰“Nabila ba okhwa Aruni chikaanjo, chikhoba ne chikuutwa. Bibiindu ebio bikholwe khubaelesia luyali ne lukoondo lulayi.

⁴¹Ofwaare Aruni wandaayo ne basoleeli bewe bibiindu bino mala obachukhekho kamafura, obarekho kamakhono, obaaule nio bakholele ese nga basaayi.

⁴²Banabile chisirwari cha katani khulwe khubiimba siichula siabwe. Naba chisirwari chichama mu sibuno khukhwola khu maraango.

⁴³Aruni ne basoleeli bewe befwaare chisirwari chino ne bengila mu liiema lie kumuse namwe ne bacha siimbi ne alutare khukhola kimilimo Abuundu Atakatifu. Bakhola bario nio bakhereerera bumayaanu mala bafwe tawe. Elino liliba lilaka lia mindali khu Aruni ne lisaaye liewe enyuma wewe.